Yesu abatasi ruru aboro ho ko afu raka ko ni ni motumo tipa yo. (Matayo 20:28) Ngba gi gene re, Baibiri nayamba Yesu nga “Batasi zegino.” (1 Yoane 4:14) Si nape gupai a nga: “I abata nga mbiko kura boro te; bambiko kura rimo zegino fu yo ku dagba aboro ani abata mbiko ho te.”​—Amokedi 4:12.

 Yesu ‘ahia kpio tipa aboro dunduko’ nga aguyo du na idapase kutiko. (AEbere 2:9; Yoane 3:16) Sidu, “Mbori azingisi ko dagba akangba,” na Yesu ki karagatiko ku ngbangbaturũ yo ni toro. (Amokedi 3:15) Yesu yo na rengba ka “batasa agu yo nambeda na Mbori mbiko ko, wa du he ya ko ni ungako kindi tipa kpara tipa yo.”​—AEbere 7:25.

Tipagine ani aida Yesu kpari ti ni tipa rani?

 Ani dunduko nga aboro ingapai. (ARomo 3:23) Ingapai ima maa ngbanda dagbarani na Mbori, na si nasarani ani kpiki. (ARomo 6:23) Ono Yesu nga “Azarõ” tipa aguyo dunduko du na idapase kuti gako motumo. (1 Yoane 2:1) Ko nakpara kubayo, kaa sana Mbori ko gi gayo akpee na ki mbupai fuyo ti gayo ingapai rii mburu gu motumo tumorii nga ga Yesu. (Matayo 1:21; ARomo 8:34) Mbori namangapai amanga kuti agu akpee Yesu afuhe fuko re mbiko si na ngbanya dagbaha na gupai Ko akpinyemuhe. Mbori akedi Yesu ku auru kpotosende no “aboro zegino bati abata mbiko ko.”​—Yoane 3:17.

Ya mo kina ida kuti Yesu sa nga gupai si aidaha tipa boro gbia bata?

 Oó. Wa vura duhe nga ani du wa ka ani idi kuti Yesu tipa ka gbia bata, dungu apai kinaho a si aidaha berani. (Amokedi 16:30, 31) Baibiri naya: “Ka kpotose zanga toro si du ni kpikpi he, kina wo ka idapase zanga mangaapai si ki du ni kpikpi he a.” (Yakoba 2:26) Tipa ka gbia bata, ani du wa:

•   Ka ani wirikipai tipa Yesu gbiati Bako nga Yekova.​—Yoane 17:3.

•   Ka ani sonosi idapase kuti yo.​—Yoane 12:44; 14:1.

•   Ka ani yugu gaani idapase ni gia ani sangba gayo azinahe. (Ruka 6:46; 1 Yoane 2:17) Yesu ayugu gupai nga anga agu aboro dunduko nayamba ko nga “Gbia” nika bata te ono ‘kina gu ni namanga wa Buba akpi nyemu he du ngbangbaturũ yo.’​—Matayo 7:21.

•   Ka ani aandu kumbatayo kindi kaa yugo gaani idapase zavura ti regbo fudifudiapai. Yesu ayugu gipai re gbaiga ho ko aya ni wẽ: “Gu ni nikaru ki da ho ragoho ka diga ni, ni abáta abata.”​—Matayo 24:13.