Guirá íz, xidal xhermanno ni nodieʼ ló xchiin Dios riee Scuel de Galaad xtuny Watchtower, ni rac Centro Educativo de la Watchtower lainy Patterson (Nueva York). a Guirá ni riee scuel reʼ rasuidy ximod gony xchiin más galán lainy xcudx Jehová. Capacitación ni racaʼyibu rasuidyni layibu gacnéyibu né gony nadipyibu congregaciones né sucursales ni noʼ ló guidopynac Gudxlio.

 Galaad nacni toib scuel ro radxin herman de xidal lagary. Por ejemplo, clase 147, ni birecaa ló íz 2019, goyoʼ 56 herman de 29 gudxrop. Guirá ni riee scuel reʼ nodieʼyibu ló xchiin Dios, tipnésyibu nac betelitas, misioneros, precursores especiales o superintendentes de circuit.

 Ni ragoʼ scuel reʼ rioʼ xpueltni antes de guidxin guirá herman. Departamento de Viajes ni noʼ Central Mundial rasiʼ bolet par guirá ni tzee scuel reʼ. Por ejemplo, guirá herman ni goyoʼ ló clase 147, tigaaga xpoletyibu ni goyeeyibu né ni bibiguetyibu gosacni midid 1.075 dólares. Herman ni nac de islas Salomón tap buelt biaʼpyibu lainy roplan par labúu bidxinyibu Patterson, né par bibiguetyibu biaʼpyibu sa tzón buelt. Bunyibu viaj 35.400 kilómetros. Ni goyeeyibu né ni bibiguetyibu góc gaxt loguiaʼyibu midid 2.300 dólares por tigaagayibu. Par diti gac gaxt xiroʼ bidxiich, Departamento de Viajes raquiin toib programa par labúu guidzel bolet ni diti tampa rasac. Ná ma buny apartaryibu bolet, programa reʼ rayopysa bolet ni más barat dada chop tzón xomal antes ni siʼyibu láani. Departamento de Viajes láaca raquiin tipnés créditos xtuny aerolínea o millas xtuny viajero frecuente ni rascad tipnés buñ.

 Xidal herman ni riee scuel reʼ raquiin toib visa par labúu tzoʼ Estados Unidos. Por ngú, Departamento de Asuntos Legales ni noʼ Central Mundial racné layibu gapyibu toib visa ni raquiin buñ ni rasuidy stoib gudxrop. Par labúu gapyibu guirá guiich reʼ tigaagayibu rony gaxt midid 510 dólares.

 ¿Ximod racné lóono guirá capacitación ni racaʼyibu? Hendra Gunawan ni nac anciano lainy toib congregación niis Sureste Asiático, ná scareʼ: «Antes diti goyoʼ precursores regulares lainy congregación xtunydo. Per, órni bidxin galtzeʼel reʼ ni nac misioneros buny animaryibu stipnés par ñac precursores. Né ndeʼ buny que toibtica hermana goyee Scuel par Evangelizadores del Reino».

 Sergio Panjaitan rony dxiin né tipnés ni ma goyee scuel de Galaad lainy sucursal ni noʼ Sureste Asiático. Láabu nábu: «Capacitación ni cuaʼ guirá herman nigolú raquiinni diti nosi par layibu láaca par lóodo. ¡Bisuidyibu xiroʼgolu! Per xalagary guiatzyibu nisló stipnés, raniʼyibu ni bisuidyibu, diti riaayibu xcalnanyibu. Ndeʼ rony animar lóodo né láaca rachiinni lóodo gony animardo stipnés».

 ¿Ximod riax guirá gaxt ni rac loguiaʼ scuel reʼ? Riaxni né guirá donación ni raxelto par obra mundial. Xidal donación de clas reʼ radxinni ló donate.ps8318.com. Raxquixdo lóoto por guirá donación ni radudyto. Por láani xhermanno ni noʼ ló guidopynac Gudxlio labúu riee scuel reʼ.