Pi mwaki alip mapol, pe tye ngat mo ma onongo ngeyo lagam me lapeny meno. I kare meno, two gemo obedo ka neko dano milion mapol ata. Lacen, lucayan guniang lok ada. Guniang ni gin ma kelo two pol kare obedo kwidi matino ma pe watwero nenogi ki wangwa. Niang lok ada acel meno okonyo dano me gengo ki cango two mapol, ma oweko dano bilion mapol dong gibedo pi kare malac dok ma komgi yot.

Lapeny mukene ma pigi tego i kwo kono? Itamo ni nongo lagam me lapeny magi bigudi nining?

• Lubanga en anga?

• Yecu Kricito en anga?

• Ker pa Lubanga obedo gin ango?

• Ngo ma bitimme i anyim?

Dano milion mapol gunongo lagam me lapeny magi dok man oweko kwogi odoko maber. In bene itwero nongo adwogi maber ki i ngeyo lagam me lapeny magi.

Iromo bedo ka pennye ni, ‘Twere nining me ngeyo lok ada i kom gin mo keken?’ Lapeny man rwatte pien ngeyo lok ada i kom jami mapol tye ka doko tek medde ameda. Pingo?

Dano mapol pe gigeno gamente, lutim biacara, nyo odi me poko lok angeya me waccigi lok ada. Pe yot ki dano me ngeyo ka jo mukene gitye ka tittigi lok ada, nyo tito tamgi, nyo kano ngec mukene, nyo waco lok goba. Kit macalo dano pe gigeno luwotgi dok pol pa ngec pe tye ada, omiyo tam pa dano i kom gin ma tye ada pe rwatte.

Kadi bed ariya magi tye, ento twere me nongo lagam i kom lapeny ma pigi tego i kwo. I yo ma nining? Ki keto i tic diro ma itiyo kwede i kwoni me nino ducu me yenyo lagam pi lapeny mukene.

I yo mo olo, in iyenyo lok ada nino ducu. Tam kong i kom kwo ma Jessica tye ka wok ki iye. En owaco ni: “Nyara bedo marac adada ka ocamo pwul, kadi wa moc pwul manok keken twero nekke woko.” Mitte ni Jessica onen ni cam mo keken ma en wilo obed ma pe kelo peko bot nyare. “Gin mukwongo ma atimo aye kwano ki diro coc ma i kom gin ma amito wilone wek aniang gin ma kirubo iye. Ka dok amedde ki timo kwed mukene kun bene agoyo wa cim bot jo nyo dul ma guyubo cam meno wek amok ada ka gwok nyo moc pwul mo pe orubbe iye i kare me yubone. Atiyo bene ki yo me kwed mukene ma genne me konya me moko ni yo ma dul meno otiyo kwede me yubo cam meno tye kakare.”

Twero bedo ni tuteni nino ducu me yenyo lok ada pe tek calo pa Jessica, ento calo Jessica, in bene itwero tic ki yo magi me yenyo lagam i kom lapeny ma itye kwede:

• Nong lok ada.

• Tim kwed mukene.

• Nen ni itye ka nongo ngec ki ka ma genne.

Yo adek magi twero konyi me nongo lok ada i kom lapeny ma pigi tego i kwo. Nining?

I kare ma Jessica obedo ka yenyo lok ada me Baibul, en otiyo ki yo ma jwi tiyo kwede ka tye ka kwedo lok madok i kom cam ma pe rwatte ki kom nyare. En owaco ni, “Kwan ki diro ki dok keto cwinya ka atye ka timo kwed okonya me niang lok ada ma tye i Baibul.” Calo Jessica, dano milion mapol gupwonyo gin ma Baibul waco i kom lapeny magi:

• Pingo watye kany?

• Ngo ma timme i komwa ka wato?

• Pingo wadeno can?

• Ngo ma Lubanga tye ka timone me giko pekki ducu?

• Watwero bedo ki yomcwiny i kwo me ot nining?

Iromo nongo lagam ma genne i kom lapeny magi ki mukene ki kwano Baibul kun bene itimo kwed mukene i kabedowa me Intanet me www.ps8318.com/ach.