• Lubanga aye ma oyero. “An dong atyeko keto kabakana . . . Abimiyi lurok me bedo ginaleyani, ki lobo ducu bene bibedo meri.”​—Jabuli 2:6, 8.

• Lakwar Kabaka Daudi. “Gityeko nywalo botwa latin, gimiyo botwa latin laco . . . Dong medde me locce ki kuc ma bia iye ka gikke bibedo pe, i wi komker pa Daudi, ki i wi kerre, me mokone ocung matek ki gwokone wek pe opoti.”​—Icaya 9:6, 7.

• Kinywalo i Beterekem. “Ento in, Beterekem . . . , dano ma bibedo laloc i Icrael bibino pi an kun a ki i in . . . En bibedo dit nio i agik me lobo.”​—Mika 5:2, 4.

• Dano gukwere dok guneke. “Dano gicaye, ma pe waparo pire wacel. . . . Yam gicobe pi balwa, giketo ret i kome pi timwa marac.”​—Icaya 53:3, 5.

• Kicero ki i kin jo muto ci kimine deyo madwong. “In pe ibitenya ata i lobo pa jo muto, pe ibiweko danoni ma geni donyo i bur lyel. . . . I tung cingi lacuc tye iye gin ma yomo cwiny dano nakanaka.”​—Jabuli 16:10, 11.

I tekwaro pa dano, tye ngat acel keken ma opore me bedo Laloc, dok ngat meno obedo Yecu Kricito. Ki lok ada, lamalaika otito ki Maliam, min Yecu ni: “Lubanga bimiye komker pa kwarone Daudi. . . . Kerre pe bigik.”​—Luka 1:31-33.

Yecu pe odoko laloc i lobo kany. Me ka meno, en biloyo dano ki i polo macalo Kabaka me Ker pa Lubanga. Gin ango ma weko en bedo Laloc mupore? Nen kong jami ma Yecu otimo i kare ma en tye i lobo.

•   Yecu onongo paro pi dano. Yecu okonyo co ki mon, jo matino ki jo muteggi, labongo paro pi rwomgi. (Matayo 9:36; Marako 10:16) I kare ma ladobo mo olege ni: “Ka imito, itwero lonyo koma,” kica omako Yecu ci ocango ladobo man.​—Marako 1:40-42.

• Yecu opwonyowa kit me yomo cwiny Lubanga. En owaco ni: “Pe wutwero tic pi Lubanga ka dok wutiyo pi lim bene.” En bene owaco ni omyero water jo mukene kit ma wan wamito ni guterwa kwede​—cik man pud dong pire tek ya! Medo i kom meno, en onyuto ni Lubanga tye ki miti pe i kom gin ma watimo keken ento wa i kom tamwa kacel ki kit ma wawinyo kwede. Pi meno, wek wayom cwiny Lubanga, omyero wagwokke adada ki gin ma watamo i cwinywa. (Matayo 5:28; 6:24; 7:12) Yecu otito bene ni wek wabed ki yomcwiny me ada, omyero wapwony gin ma Lubanga mito ni watim dok watimgi.​—Luka 11:28.

• Yecu opwonywa kit me nyuto mar bot jo mukene. Lok ki tic pa Yecu onongo tye ki teko dok ogudo cwiny jo ma winye. Baibul tito ni: “Lwak guuro kit pwonnye matek, pien opwonyogi calo ngat ma tye ki twero.” (Matayo 7:28, 29) En opwonyogi ni: “Wumar lukworwu.” En bene olego wa pi jo ma guweko kineke ni: “Aba, wayi tim kica botgi, pien pe gingeyo gin ma gitye ka tiyone.”​—Matayo 5:44; Luka 23:34.

Yecu opore adada me bedo Laloc me lobo-ni ma konyo dano dok lakica. Ento en bicako loc awene?