BLEMATSƐ David nɛ hi si ngɛ Israel ɔ lɛ tu munyu nɛ ɔ kɛ je yo ko yi. A tsɛɛ yo nɛ ɔ ke Abigail. Mɛni ha nɛ David je e yi, nɛ mɛni wa ma nyɛ maa kase ngɛ Abigail nɔ hyɛmi nɔ́ ɔ mi?

David na yogbayo nɛ ɔ be mi nɛ e ngɛ Matsɛ Saul nya fo tue ɔ. Abigail huno ji Nabal. Nabal ji niatsɛ, nɛ e ngɛ tohi fuu lɛe ngɛ yoku ko nɛ ngɛ Yuda woyi je ɔ nɔ. David kɛ nyumuhi nɛ a piɛɛ e he ɔ “bu” Nabal to hyɛli ɔmɛ kɛ e to ɔmɛ a he. Pee se ɔ, David tsɔ nihi konɛ a ya bi Nabal nɛ e ha mɛ ‘nɔ́ nɛ ngɛ e dɛ’ nɛ ji e niye ní ɔ eko. (1 Sam. 25:8, 15, 16) Ke o susu bɔ nɛ David kɛ nyumuhi nɛ a piɛɛ ehe ɔ bu Nabal to nɔ hyɛli kɛ e to ɔmɛ a he ha a he ɔ, jinɛ e sɛ nɛ e he ko wa ha Nabal kaa e ma ha mɛ nɔ́ nɛ a ngɛ hlae ɔ.

Se Nabal nɛ e biɛ ɔ sisi ji “kuasia” a tsu e biɛ ɔ nya ní. Nabal je we bumi kpo kɛ tsɔɔ David, nɛ e ha we lɛ níhi nɛ e bi lɛ ɔ. Enɛ ɔ he ɔ, David to kaa e maa gbla Nabal tue akɛnɛ e kɛ lɛ yi saminya a he je. Nabal kuasia jemi ɔ ma ha nɛ a tane e kɛ e we mi bi tsuo a yi.​—1 Sam. 25:2-13, 21, 22.

Benɛ Abigail ná le haomi agbo nɛ ma a, e kɛ kã tsu sane ɔ he ní. E je bumi mi nɛ e kpa David pɛɛ kaa e hyɛ Yehowa hɛ mi nɛ e ko pee yayami ko. E ha David nɛ e ma ba ye matsɛ pee se ɔ kɛ nyumuhi nɛ a piɛɛ e he ɔ niye ní fuu. David hu tsɔɔ kaa Yehowa lɛ gu yo ɔ nɔ kɛ tsi e nya konɛ e ko tɔ̃ Mawu nɔ. David de Abigail ke: “I naa Mawu si kaa e ha mo juɛmi. A maa gbaa mo kaa mwɔnɛ ligbi nɛ ɔ, o tsi ye nya nɛ ma ko pue muɔ si.”​—1 Sam. 25:18, 19, 23-35.

Ngɛ anɔkuale mi ɔ, wa ti nɔ́ ko be nɛ e maa suɔ nɛ e kase Nabal nɛ́ e bua jɔɛ kpakpa nɛ a pee lɛ ɔ he ɔ. Jehanɛ hu ɔ, ke wa yɔse kaa haomi ko miɔ nɛ e maa te si ɔ, wa bɔɔ mɔde kaa wa maa tsi nya. Niinɛ, waa kɛ la polɔ ɔ ma kpa gbi ngɛ nɔ́ nɛ e de Mawu ɔ he. E de ke: “Ha mi juɛmi, kɛ nile.”​—La 119:66.

Bɔ nɛ wa peeɔ wa ní ha a ma ha nɛ ni kpahi nɛ a yɔse kaa wa ngɛ juɛmi. A de wɔ jio, a de we wɔ jio, eko ɔ, e maa pee mɛ kaa bɔ nɛ e pee David ɔ, nɛ a ma de ke: “I naa Mawu si kaa e ha mo juɛmi.”