YEHOWA kɛ e he to to hyɛlɔ ko kaa jã a he si abɔ. E ma nɔ mi kɛ ha wɔ ngɛ e Munyu ɔ mi ke: “Imi nitsɛ ma hla ye to ɔmɛ a se blɔ, nɛ ma hyɛ a nɔ.”​—Ezekiel 34:11, 12.

Mɛnɔmɛ ji Yehowa tohi? Ngɛ e kpiti pomi mi ɔ, Yehowa to ɔmɛ ji nihi nɛ a suɔ lɛ nɛ a jaa lɛ. Baiblo ɔ de ke: ‘Nyɛɛ ba nɛ waa ngɔ wa hɛ mi kɛ bu si, nɛ wa ja lɛ. Nyɛ ha nɛ wa kpla si ngɛ Yehowa, wa bɔlɔ ɔ nane nya. Ejakaa wa Mawu ji lɛ! Wɔ ji e ma a nɛ; lɛ nɛ hyɛɛ wa nɔ; wa ngɛ kaa tohi nɛ e ngɛ tsɔe.’ (La 95:6, 7) Kaa bɔ nɛ tohi nyɛɛɔ to hyɛlɔ se ɔ, jã kɛ̃ nɛ Yehowa jali hu suɔ wawɛɛ kaa a maa nyɛɛ a Nɔ Hyɛlɔ ɔ se. Se anɛ lɔ ɔ tsɔɔ kaa yayami ko be a he lo? Dɛbi. Be komɛ ɔ, Mawu we bi peeɔ kaa “tohi nɛ gbɛ fia,” ‘tohi nɛ laa,’ aloo a “laa blɔ kaa tohi.” (Ezekiel 34:12; Mateo 15:24; 1 Petro 2:25) Ke e ba jã po ɔ, Yehowa kua we mɛ. E ngɛ hɛ kɛ nɔ fɔmi kaa a maa kpale kɛ ba e ngɔ.

 Anɛ o he ye loloolo kaa Yehowa ji o Nɔ Hyɛlɔ lo? Mwɔnɛ ɔ, mɛni Yehowa peeɔ kɛ tsɔɔ kaa e ji To Hyɛlɔ? Ha wa susu níhi etɛ nɛ e peeɔ ɔ a he nɛ waa hyɛ:

E lɛɛ wɔ ngɛ mumi mi. Yehowa de ke, ‘Ma ha nɛ a ma ya ye ní ngɛ tue mi jɔmi mi ngɛ yo ɔmɛ a nɔ, kɔ̃ ɔmɛ a mi, kɛ hehi nɛ nga mumu ngɛ.’ (Ezekiel 34:14) Be tsuaa be ɔ, Yehowa haa wɔ mumi mi niye ní kpakpa slɔɔtoslɔɔtohi ngɛ be nɛ sa mi. Anɛ o ma nyɛ ma kai nɔ́ ko nɛ o kane, munyu ko nɛ o bu tue, aloo video ko nɛ o hyɛ nɛ ha o sɔlemi ko heto lo? Anɛ lɔ ɔ ha we nɛ o ná nɔ mi mami kaa Yehowa susuɔ o he lo?

E buu wa he nɛ e yeɔ bua wɔ. Yehowa wo si ke: “Ní nɛmɛ nɛ tla blɔ ɔ, ma ya tsɔ̃ mɛ kɛ ba; ní nɛmɛ nɛ plaa a, ma fĩ a pa amɛ a nɔ ha mɛ; hiɔtsɛmɛ ɔmɛ hu ma tsa mɛ.” (Ezekiel 34:16) Yehowa woɔ nihi nɛ yeyeeye peemi ha a gbɔjɔ aloo a kɔni mi wo nyu ɔ he wami. Ke eko ɔ, nyɛmimɛ ɔmɛ ekomɛ a ní peepee ha nɛ Yehowa to ɔmɛ ekomɛ plaa a, Yehowa fĩɔ a pa amɛ a nɔ ha mɛ, nɛ e yeɔ bua mɛ konɛ a ná he wami ekohu. E ngɔɔ nihi nɛ a tla blɔ ɔ kɛ ni nɛmɛ nɛ a hɛɛ susumi nɛ dɛ ɔ kɛ baa e ngɔ ekohu.

E le kaa e sa nɛ e hyɛ wa nɔ. Yehowa de ke: “Ma kpaka mɛ kɛ je he tsuaa he nɛ a gbɛ fĩa a. Tohi nɛ laa a, ma ya hla mɛ.” (Ezekiel 34:12, 16) Ngɛ Yehowa blɔ fa mi ɔ, ke to ko laa a, e ngɛ hɛ nɔ kami kaa e maa na lɛ ekohu. Ke to ko laa a, e le nɛ e hlaa e se blɔ, nɛ ke e na lɛ ɔ, e bua jɔɔ. (Mateo 18:12-14) Ngɛ anɔkuale mi ɔ, e tsɛɛ e sɔmɔli anɔkualetsɛmɛ ɔmɛ ke “ye tohi nɛ i ngɛ lɛe.” (Ezekiel 34:31) Mo hu o piɛɛ to nɛ ɔmɛ a he.

Mɛni he je nɛ Yehowa ngɛ o se blɔ hlae nɛ e ngɛ mo tsɛe nɛ o kpale kɛ ba e ngɔ ɔ? Ejakaa e suɔ nɛ o ná bua jɔmi. E wo si kaa e maa ‘jɔɔ e to ɔmɛ kaa bɔ nɛ hiɔmi nɛɛ’ kɛ pueɔ si ɔ. (Ezekiel 34:26) Yehowa ngɛ e si womi nɛ ɔ nɔ yee. Mo nitsɛ o na enɛ ɔ he odase.

Mo kai níhi a si kpamihi nɛ o ná be mi nɛ o ba le Yehowa a. Kaa nɔ hyɛmi nɔ́ ɔ, benɛ o ba le anɔkualehi nɛ haa nɔ bua jɔmi nɛ kɔɔ Mawu biɛ ɔ, kɛ e yi mi tomi kɛ ha adesahi ɔ he ɔ, kɛ o pee o ní ha kɛɛ? O kai bɔ nɛ ke waa kɛ nyɛmimɛ Kristofohi ya kpehi nɛ wa tsui nɔɔ wa mi ha a lo? Ke o ya fiɛɛ sane kpakpa a kɛ tsɔɔ nɔ ko nɛ e bua jɔ munyu ɔ he nɛ o kpale kɛ ba we mi ɔ, anɛ o bua jɔɛ, nɛ o tsui hu nɔɛ o mi lo?

O ma nyɛ ma ná bua jɔmi nɛ ɔ ekohu. Mawu sɔmɔli nɛ hi si blema a sɔle ke: ‘Yehowa, moo kpale wɔ kɛ ba o ngɔ ekohu! Kpale wɔ kɛ ba wa da he ekohu! Ngɔɔ wa blema hɛ mi nyami ɔ kɛ ha wɔ ekohu.’ (Kɔmɔ Yemi 5:21) Yehowa ha sɔlemi nɛ ɔ heto, nɛ e we bi ɔmɛ kpale kɛ ba e ngɔ nɛ a ba sɔmɔ lɛ kɛ bua jɔmi ekohu. (Nehemia 8:17) Yehowa maa pee jã nɔuu kɛ ha mo.

Enɛ ɔ tsuo se ɔ, e be gbɔjɔɔ kaa nɔ ko maa kpale kɛ ba Yehowa ngɔ. Mo ha nɛ wa susu haomi komɛ nɛ o kɛ ma nyɛ maa kpe kɛ bɔ nɛ o ma plɛ kɛ da nya ha a he nɛ waa hyɛ.