Anɛ ke pee ɔ, o kaiɔ ní komɛ nɛ haa nɛ o náa bua jɔmi benɛ o piɛɛ Yehowa we bi a he ɔ lo? Anɛ o kai asafo mi kpe ko nɛ o ya nɛ e wo mo he wami, loo ngɛ kpokpa nɔ kpe ko nɛ a pee nɛ ha nɛ o ná bua jɔmi wawɛɛ nitsɛ, loo níhi a si kpami ko nɛ ngɛ bua jɔmi nɛ o ná ngɛ fiɛɛmi tso mi, loo ní sɛɛmi nɛ ngɛ bua jɔmi nɛ o kɛ nyɛmi ko sɛɛ ɔ lo? O hɛ ji Yehowa nɔ; nɛ lɛ hu e hɛ ji o nɔ. E kaiɔ anɔkuale nɛ o ye lɛ benɛ o ngɛ lɛ sɔmɔe ɔ, nɛ e suɔ wawɛɛ kaa e maa ye bua mo konɛ o kpale kɛ ba e ngɔ.

Yehowa de ke: “Imi nitsɛ ma hla ye to ɔmɛ a se blɔ, nɛ ma hyɛ a nɔ. Bɔ nɛ to hyɛlɔ hlaa e tohi nɛ gbɛ fia, nɛ e buaa a nya ekohu ɔ, jã ma hla ye to ɔmɛ a se blɔ. Ma kpaka mɛ kɛ je he tsuaa he nɛ a gbɛ fia.”​—Ezekiel 34:11, 12.