Die Duiwel en die demone beïnvloed die mensdom in so ’n mate dat die Bybel sê: “Die Bose beheer die hele wêreld” (1 Johannes 5:​19, New Century Version). Die Bybel identifiseer maniere waarop die Duiwel sy invloed op mense uitoefen.

•   Misleiding. Die Bybel spoor Christene aan om “teen die duiwel se bose sette te stry” (Efesiërs 6:​11, NCV). Een van sy sette is om mense te mislei sodat hulle glo dat sy agente eintlik knegte van God is.​—2 Korintiërs 11:13-15.

•   Spiritisme. Die Duiwel mislei mense deur middel van geestemediums, fortuinvertellers en diegene wat waarsêery en astrologie beoefen (Deuteronomium 18:10-12). Dwelmmisbruik, hipnose en meditasietegnieke wat die verstand leegmaak, stel ’n persoon ook bloot aan demoonbeheer.—Lukas 11:24-26.

•   Valse godsdiens. Godsdienste wat valse leerstellings leer, mislei mense sodat hulle aan God ongehoorsaam is (1 Korintiërs 10:20). Die Bybel noem sulke valse opvattings “leringe van demone”.—1 Timoteus 4:1.

•   Besetenheid. Die Bybel meld gevalle waar bose geeste beheer oor persone oorgeneem het. Soms is demoonbesetenes met blindheid of stomheid geslaan of het hulle hulleself beseer.—Matteus 12:22; Markus 5:2-5.

Hoe om die Duiwel se invloed te vermy

 Jy hoef nie in vrees vir demoonbeheer te lewe nie, want die Bybel toon hoe jy die Duiwel suksesvol kan teëstaan:

•   Leer hoe om die Duiwel se metodes te identifiseer sodat jy nie “onkundig omtrent sy planne” is nie.—2 Korintiërs 2:11.

•   Neem Bybelkennis in, en pas dan toe wat jy leer. Die toepassing van Bybelbeginsels sal jou teen die invloed van die Duiwel beskerm.—Efesiërs 6:11-18.

•   Raak ontslae van enigiets wat met demoonbedrywighede verband hou (Handelinge 19:19). Dit sluit musiek, boeke, tydskrifte, plakkate en video’s in wat spiritisme bevorder.