Сӱӱнчилӱ јарды «не ле укка, ӱйеге, тилге ле калыкка» јарлаарга, бис 750 кире тилдерге бичиктер кепке базып чыгарадыс (Ачылта 14:6). Мындый иш канайып эдилет? Бисте бастыра јердиҥ ӱстиле бичиичилер ле кӧчӱреечилер бар — олор ончозы Иегованыҥ Керечилери.

Текст озо баштап анлийский тилге бичилет. Бичиичилердиҥ бӧлӱги бастыра телекейлик тӧс башкаруда иштейт. Олорды Башкару јӧп башкарат. Бу бӧлӱк тӧс башкаруда ла филиалдарда бичиичилердиҥ ижин башкарат. Бичиичилер башка-башка ороондордо јадып турганынаҥ улам, бистиҥ бичиктерде јӱзӱн-башка кычыраачыларга јилбилӱ болуп турган башка-башка темалар јарталат.

Текст кӧчӱреечилерге аткарылат. Тӱзедилген ле јарадылган текст бастыра јердиҥ ӱстинде бар кӧчӱреечилерге электронный бӱдӱмдӱ аткарылат. Кӧчӱреечилер текстти кӧчӱрип, английский текстле тӱҥдештирет ле тӱзедет. Олор английский тилдеҥ бойыныҥ тилине тексттиҥ учурын чике кӧчӱрерге «чындыктыҥ бӱдӱмјилӱ сӧстӧрин» талдап аларга албадангылайт (Јарлыкчы 12:10).

Компьютерлер ишти тӱргендедет. Компьютер бичиичилерди де, кӧчӱреечилерди де солып болбос. Је башка-башка программалардыҥ, электронный сӧзликтердиҥ ле энциклопедиялардыҥ болужынаҥ улам, компьютерлер ишти тӱргендедерге болужат. Иегованыҥ Керечилери электронный система белетеп јазагандар (MEPS), оныҥ болужыла текстти јӱстер тоолу тилдерге бичиирге, јуруктарла колбоорго ло кепке базарына белетеерге јараар.

Бис нениҥ учун библиялык бичиктерди ас тоолу улус куучындап турган тилдерге де кӧчӱрерге, бастыра ийде-кӱчис бередис? Нениҥ учун дезе Иегова «ончо улус аргадалып, чынды [чике, ЈТ] билип алзын деп» кӱӱнзейт (1 Тимофейге 2:3, 4).

• Бистиҥ бичиктер канайып бичилет?

• Бистиҥ бичиктерди нениҥ учун андый кӧп тилдерге кӧчӱредис?