Иегованыҥ Керечилериниҥ озодоҥ бери эҥ ле аҥылузы — теократиялык ӱредӱ болуп јат. Каандык керегинде јарды јарлаарга бойыныҥ ӧйиниҥ кӧп сабазын берип турган јарчыларга аҥылу сургалдар белетелген. Сургалдардыҥ болужыла јарчылар бойыныҥ ижин толо бӱдӱрер аргалу (2 Тимофейге 4:5).

Пионер иштиҥ сургалы. Јарчы пионер болуп, ӧйин толо берип, бир јыл иштеп салза, ол јуугындагы Кандыктыҥ Туразында 6 кӱнниҥ туркунына ӱренетен ӱредӱге кычырылат. Бу сургалдыҥ амадузы — пионерге Иегова Кудайга оноҥ тыҥ јууктаарга, јарлаар иштиҥ ончо аргаларын оноҥ јакшы тузаланарга ла Кудайга оноҥ ло ары чындык иштеерге болужары.

Каандыктыҥ јарчыларыныҥ сургалы. Бу сургалдыҥ амадузы — болуш керек болуп турган јерлерде иштеерге белен болгон ченемелдӱ пионерлерди 2 айдыҥ туркунына ӱредип салары. Олор, јерде јӱрген эҥ ле улу Јарчыныҥ, Иисус Христостыҥ теминеҥ ӱренип, «Мен белен! Мени ий!» деп, айдадылар (Исаия 6:8; Иоанн 7:29). Ӧскӧ јерде јарлаарга кӧчӱп тургандарга, кандый ла айалгаларга эптежерге белен болор керек. Кӧчип барган јердиҥ культуразы, кӱн-аайы ла аш-курсагы кижиниҥ темиккенинеҥ чек башка болордоҥ айабас. Јаҥы тил де ӱренерге келижер болор. Бу сургалга кижи албаган акалар, кижиге барбаган эјелер ле эмеен-ӧбӧӧн улус кычырылат. Олордыҥ јажы 23 — 65 јетире болор учурлу. Мындый сургал јарлаар ишке керектӱ ич-кӧгӱс кылык-јаҥдарды тыҥыдарга ла Иегова ла Оныҥ организациязы олорды толо тузаланзын деп, јаҥы темигӱлерге ӱренип аларга болужат.

Каруулчы Бакананыҥ библиялык Галаад сургалы. «Галаад» деген сӧс «межелик керечи» эмезе «керелердиҥ чогынтызын» темдектейт. Бу сургал 1943 јылда тӧзӧлгӧн. Оноҥ бери сургалды ӱренип божоткондордыҥ тоозынаҥ 8 000-наҥ кӧп улус, сӱӱнчилӱ јарды «јердиҥ јаказына јетире» јарлазын деп, миссионерлер болорына кӧстӧлгӧндӧр (Апостолдордыҥ ижи 13:47). Мынаҥ улам јаан једимдер болгон. Галаад Сургалды божоткондор Перу деген јерге баштапкы ла катап келерде, ондо бир де јуун болбогон, је эмди јуундардыҥ тоозы 1 000-наҥ кӧп! Бистиҥ миссионерлер Јопон јеринде иштеп баштаарда, Керечилердиҥ тоозы 10-го до јетпес болгон, је бӱгӱн олор 200 000-наҥ кӧп. Бу сургалда 5 айдыҥ туркунына студенттер Кудайдыҥ Сӧзин тереҥ шиҥдеп ӱренгилейт. Бу сургалга специальный пионерлер, миссионерлер, филиалдыҥ ишчилери ле аймак кӧрӧӧчилер кычырылат. Бу эрчимдӱ ӱредӱ олорды Кудайдыҥ организациязын бастыра јердиҥ ӱстинде тыҥыдарына белетейт.

• Пионер иштиҥ сургалыныҥ амадузы кандый?

• Каандыктыҥ јарчыларыныҥ Сургалы кемдерге белетелген?