1 YATICHÄWI
“Chhaqat ovejanakarojj thaqäwa”
Mä chhaqat ovejat amuytʼañäni: uka ovejajj pasto manqʼkasaw tamat saraqawayi, jichhajj tamatsa awatiritsa jayarstʼatäjjewa. Kawkjantï aycha manqʼani animalanakajj utjki uka qollunwa sapak jikjjatasi, intis niyaw jalantañampïskaraki. Ukampis akatjamatwa mä aru istʼi, ukajj ¡awatiripan arupawa! Awatiristi ovejar uñjasajj tʼijukamaw jikjjati, ichtasajj isipar llawuntasaw utapar apjjaraki.
JEHOVÁ DIOSAJJ mä awatirïkaspas ukhamwa jupa pachpat Biblian qhanañchi. Jupajj akham siwa: “Naya pachpaw ovejanakajar thaqasin uñjarakï” sasa (Ezequiel 34:11, 12).
‘Ovejanakajarojj sum uñjäjja’
¿Khitinakäpjjes Jehová Diosan ovejanakapajja? Khitinakatï jupar munasipki ukat servipkaraki ukanakäpjjewa. Bibliajj akham siwa: “Jutapjjam, adorapjjañäni, altʼasipjjarakiñäni, jiwasar Lurir Jehová Dios nayraqatan qonqortʼasipjjañäni. Kuna laykutejj jupaw jiwasan Diosasajja, jiwasajj pastopankir markapätanwa, jupan uñjat ovejanakapätanwa” sasa (Salmo 95:6, 7). Kunjamtï ovejanakajj awatiripar arkapkejja, ukhamarakiw Jehová Diosan servirinakapajj mä awatiriparjam Jupar arkapjje. Ukampis uk lurañajj chʼamakïspawa. Awisajja Diosan servirinakapajj saranukuta, chhaqat ovejanakar uñtasitäpjjewa (Ezequiel 34:12; Mateo 15:24; 1 Pedro 2:25). Ukhamäkchi ukhasa, Jehová Diosajj janipuniw saranukupki ukanakat armaskiti.
¿Jehová Diosajj Awatirimäkaspas ukham amuyaskaktati? Jichhürunakanjja, ¿kunjamsa mä Awatirïkaspas ukham Diosajj uñjaskistu?
Diosajj jupar serviñatakiw yanaptʼanak churistu. Jehová Diosajj akham siwa: “Suma pastoni oraqenakanwa manqʼayäjja [...]. Ovejanakajj uka suma pastoni oraqen winkurapjjani, [...] suma pastonak manqʼasipjjani” sasa (Ezequiel 34:14). Jehová Diosajj walja yanaptʼanakwa jupar serviñatakejj tiempopar churistu. Diosajj oracionanakamar ¿kunjamsa qellqatanak toqe, discursonak toqe jan ukajj videonak toqe jaysäyätam uk amtasktati? Ukhamächi ukhajja, Diosajj jumat wal llakisitapwa amuypachäta.
Jan walinakatwa jarkʼaqestu yanaptʼarakistu. Jehová Diosajj akham siwa: “Saranukutanakarojj kuttʼayanïwa, usuchjatanakarojj vendanakampiw chʼoqtʼarakï, tʼukha ovejanakarusti chʼamañcharakïwa” sasa (Ezequiel 34:16). Llakinakamp aynachtʼatanakarojj Diosaw chʼamañchtʼi. Usuchjat ovejanakaparus qolljjattʼiwa, uka ovejanakaparojj inas congregacionankir mä jilatasa jan ukajj mä kullakas usuchtʼawaychi. Diosan markapat saraqatäpki ukanakarusa, aynachtʼayir amuyunakapar atipjañatak chʼamachasipki ukanakarus kuttʼanipjjañapatakiw Diosajj yanaptʼaraki.
Chhaqtan ukhajj Diosaw thaqistu. “Kawkja cheqanakarutï anatatatäpkäna taqe uka lugaranakatwa jupanakar salväjja”, “chhaqat ovejanakarojj thaqäwa” sasaw Jehová Diosajj arsuwayi (Ezequiel 34:12, 16). Tamat jitheqtatanakajj janis mayamp kuttʼanirjamäpkaspa ukham janiw Diosajj amuykiti. Mä ovejan chhaqatätap jankʼakiw jupajj amuyi, ukatwa thaqher sari, jikjjatasasti wal kusisiraki (Mateo 18:12-14). Jehová Diosajj cheqpach servirinakaparojj akham siwa: “Nayan uñjata ovejanaka” sasa (Ezequiel 34:31). Jumajj Diosan ovejaparakïtawa.
Tamat jitheqtatanakajj janis mayamp kuttʼanirjamäpkaspa ukham janiw Diosajj amuykiti. Ovejapar jikjjatasasti jupajj wal kusisi
“Urunakaj-jja kunjamäkäntï nayra tiemponakajj ukhamaruy tukuyam”
¿Kunatsa Jehová Diosajj jupan ukar kuttʼañam muni? Kuna laykutejj kusisit jakasiñamwa muni. Ovejanakajarojj “bendicionanakajj jallur uñtataw purjjatani” sasaw Diosajj arsuwayi (Ezequiel 34:26). Ukajj janiw aleq arunakakïkiti. Juma pachpaw uka arunak phoqasir uñjawaytajja.
Jehová Diosar uñtʼañ qalltkayäta ukhajj kunjamsa jikjjatasiyäta uk amtasim. Sañäni: Diosan sutip yatisasa, jaqenakatakejj kuna amtanisa uk yatisasa, ¿kunjamas jikjjatasiyäta? Asambleanakanjja, ¿jilat kullakanakampïsajj kunja chʼamañchtʼatas jikjjatasiyäta uk amtastati? Ukat Biblian suma yatiyäwinakap suma chuyman jaqenakar yatiyasajja, ¿janit kusisita chuymas chuyma utamar kuttʼirïkta?
Mayampiw kusisit jikjjatasirakisma. Diosan nayra servirinakapajj akham sasaw orasipjjäna: “Jehová Dios Tata, juman ukar kuttʼayanipjjakitaya, nanakajj jankʼakiw juman ukarojj kuttʼanipjjäjja. Urunakaj-jja kunjamäkäntï nayra tiemponakajj ukhamaruy tukuyam” sasa (Lamentaciones 5:21). Uka arunakarojj Diosajj istʼänwa ukat wasitatwa markapajj kusisit jupar sirvjjäna (Nehemías 8:17). Jumarojj ukhamarakiw yanaptʼätam.
Ukampis Jehová Diosan ukar kuttʼaniñatakejj yantʼanakar atipjañaw wakisi. Kunjamsa uka yantʼanakar atipjasma uk jichhajj yatjjatañäni.
