JAN wali luratanakasat juchañchasiñajj mä jathi qʼepir uñtataw qʼal aynachtʼayistaspa. David reyejj juchanakapatwa chuym wal pisayasïna, ukatwa akham säna: “Mä jathi qʼepir uñtasitawa, qʼepiñas nayatakejj sinti jathiwa” sasa (Salmo 38:4). Jehová Diosajj janipuniw perdonkitaniti sasin amuyasaw yaqhep jilat kullakanakajj llakimp aynachtʼawayapjje (2 Corintios 2:7). ¿Juchanakam laykojj Diosat wali jayankkasmas ukhamti amuyasta? ¿Diosajj janipuniw jachʼa juchanakaj perdonkitaniti sasat amuyta? Jan llakisimti, Diosajj yanaptʼañwa muntam.

Jehová Diosajj taqe chuyma arrepentisirinakarojj janiw rechazkiti, antisas jupanakar yanaptʼañwa muni. Jesusajj herencia tukuntir waynatwa parläna, uka waynajj utapat sarjjasaw jan walinakan sarnaqäna, tiempompejj utapar kuttʼañwa amtjjäna. Kuttʼjjäna ukhajj ¿kunas pasäna? “Awkipasti jayankkipanwa jupar uñ[jäna], walpun uka wawapat sinttʼasïna. Ukatwa jupan ukarojj tʼijüna. Wali munasiñampiw qhomantäna, jampʼattʼarakïna” (Lucas 15:11-20). Diosajj uka munasiri khuyaptʼayasiri awkjamarakiwa. Diosarojj wal jakʼachasiñ munpachätajja, ukampis jupat wali jayankkasmas ¿ukhamti amuyasta? Diosajj jumar katoqañatakejj wal suyasktamjja.

“Wali jucharar jaqëtwa, juchanakajajj sinti jan walinakarakiwa, Diosajj janiw perdonkitaspati” ¿sasat amuyta? Ukhamächi ukhajja, kuntï Isaías 1:18 texton siski uka toqet amuytʼam: “Jehová Diosajj akham siwa: ‘Jutapjjam, kuna asuntonaksa jiwaskam askichañäni’. ‘Juchanakamajj llijkir wila colorjamäkchisa, khunur uñtasit janqʼor tukuyatäniwa’. Juchanakasajj mä janqʼo telar warjjatat jan apskay wila colorar uñtatäkchisa, Diosajj perdonistaspawa.

Jehová Diosajja, concienciamamp juchañchat tʼaqesiñam janiw munkiti. Diosampi perdonayasiñasa qʼoma conciencianïñas sumaki jikjjatasiñatakiw yanaptʼistu. ¿Kunsa jumajj ukatak lurasma? David reyitwa yateqasisma. Nayraqatajj jupajj akham sänwa: “Jehová Diosaruw jan wal luratanakaj-jja arsusëjja” sasa (Salmo 32:5). Diosajj akham sistamwa: “Kuna asuntonaksa jiwaskam askichañäni” sasa. Uka arunakar istʼam, oración toqes jupar jakʼachasirakim. Juchanakam yatiyam, kunjamsa jikjjatasta uksa yatiyarakim. Davidajj akham sasaw orasïna: ‘Juchajat qʼomachtʼasikitaya’, “Dios Tata, chuyma pʼakintatäki humildëkaraki uka jaqerojj janiw apanukkätati” sasa (Salmo 51:2, 17).

Ukjjarojja, Davidajj Diosan uttʼayat Natán profetapampiw yanaptʼayasïna (2 Samuel 12:13). Jichhürunakan ukhamarakiw Diosajj ancianonak congregacionanakan uttʼayi. Uka jilatanakajja, juchanakapat arrepentisirinakarojj wasitat Diosan amigopäjjapjjañapatakiw yanaptʼapjje,  uk lurañatakejj suma wakichtʼatäpjjewa. Jupanakajja Biblian ewjjanakapampiw Diosar mayamp serviñamatak yanaptʼapjjätam. Chuymaman sum jikjjatasiñamatakisa jan wali amuyunak apanukuñamatakis jumamp chikaw orapjjarakini (Santiago 5:14-16).

Juchanakasat Diosar arsusiñasa ancianonakamp parlir sarañas chʼamakïspawa. Davidatakejj juchanakap arsusiñajj chʼamarakïnwa. Mä qhawqha tiempojja, Davidajj janiw khitirus juchanakap arsuskänti sasaw Bibliajj qhanañchi (Salmo 32:3). Ukampis qhepat juchanak arsusiñasa jan wali luratanak askichañas wali askïtapwa Davidajj amuyjjäna.

Ukham luratapatjja, Davidajj wasitampiw kusisitäjjäna. Jupajj aka arunakwa qellqäna: “Khititï jan wali luratapat perdonatäki, juchapajj imjjatatäkaraki ukajj kusisitawa” sasa (Salmo 32:1). Akham sasaw Diosar mayisirakïna: “Jehová Dios Tata, parlayakitaya, ukhamat jachʼañchäwimat lakajajj parlañapataki” sasa (Salmo 51:15). Davidajj juchanakap arsusisajj chuymas chuymaw jikjjatasjjäna, Diosarus wal yuspäräna, ukaw taqe jaqenak nayraqatan Diosar jachʼañchañatakis chʼamañchtʼäna.

Jehová Diosajj qʼoma conciencianïñamwa muni. Jupampita promesanakapampit yaqha jaqenakar parlkäta ukhajja kusisita, qʼoma concienciani, taqe chuyma parlañamwa munaraki (Salmo 65:1-4). Diosajj ak lurañasatakiw invittʼistu: “Arrepentisipjjam, kuttʼanjjapjjarakim juchanakamajj qʼomachatäñapataki, ukhamat samarañ tiemponakajj Jehová Diosat jutañapataki” sasa (Hechos 3:19).

Qalltan parlaniwayktan uka Martha kullakajj akham siwa: “Yoqajajj Yatiyañataki ukat ¡Sartapjjañäni! sat revistanak apayasinkakitänwa. Mayampiw Jehová Diosamp sum apasiñ qalltayäta. Taqe juchanakajat oracionan Diosar perdón mayisiñajj wali chʼamänwa. Ukhamäkchïnsa ukwa lurayäta. ¡Jehová Diosan markaparojj 40 maranakatwa kuttʼanta! Walja maranakas Diosat jitheqtatästanjja, Diosajj wasitat markap taypinkañatakisa kunja munasirisa uk mayampi amuyañasatakis taqeniruw mä oportunidad churistu” sasa.