¿Jutïrin kunas paspachäni?
¿Jutïrin kunas paspachäni?
KUNATSA UKA TUQIT YATIÑAX WAKISI. Mä jaqix jutïrin kuns katuqani jan ukax kunas utjani uk yatisaxa, ukarjamaw sarnaqi. Amuytʼañataki, khitinakatix jan kuna suytʼäwini jakapki uka jaqinakaxa akham sapxiwa: “Manqʼasiñäni, umtʼasiñäni, qharurux jiwxchiñänixaya” sasa (1 Corintios 15:32). Ukham amuyirinakaxa, manqʼañ tuqitsa jiljañaruw puripxi, machañanakan sarnaqapxi, ukat awisax llakimpiw apayasipxi, ukhamanakan sarnaqañax janiw chuym qhanartaykiti.
Ukampisa, suma jakañxa janiw jaqinakax apanipkaspati. Kunattix samanasa, umasa, uraqisa, sinti qʼañuchatäxapuniwa. Guerra nuclear sat nuwasïwiw utjani sasaw jukʼamp parlapxi ukat jaqi jiwayirinakarakiw jaqinakar wal axsarayaski. Usunakasa ukat qullqi tuqit pistʼañanakasa walja millón millón jaqinakaruw aka uraqpachan tʼaqhisiyaskaraki. Ukhamäkipansa, jiwasax suytʼäwinïsnawa.
Jaqinakaxa janiw kunas jutïrin pasani ukxa yatksnati, ukampis Jehová Diosax siwa “Nayaw taqi kunan tukusiñapsa, qalltatpach yatiyta, nayratpachrakwa kunatix qhipat luraskani ukanaksa yatiytxa” sasa (Isaías 46:10). Ukhamaxa, ¿jutïrinx kunas pasani uka tuqit Jehová Diosax kamspachasa?
¿Kamsis Bibliaxa?
Jehová Diosaxa, janiw aka Uraqsa ni aka Uraqin jakirinakarusa ukhamak chhaqtaykaniti. Jan ukasti, Bibliax siwa, Diosax ‘aka uraqi tʼunjirinakaruxa, tʼunjarakiniwa’ sasa (Apocalipsis 11:18). Alaxpachankir Apnaqäwipampiwa, Jehová Diosax aka Uraqit taqi jan waltʼäwinak chhaqtayxani ukat kuna amtampi taqi kunas luratäkäntix ukhamaruw wasitat kuttayxani (Génesis 1:26-31; 2:8, 9; Mateo 6:9, 10). Bibliat apstʼata akïr qillqatanakawa jutïrix kunjamäxanis ukat aka Uraqin utjasir jaqinakax kunjamsa jakasxapxani ukanakat sum amuytʼayistu.
Daniel 2:44: “Alaxpachankiri Diosax mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa, jan ukasti jupaw taqi yaqha reinonakarux tukjani, wiñayan wiñayapaw uka reinox utjarakini”.
Salmo 46:8, 9: “Tatitun muspharkañ luräwinakap uñjir jutapxam, uraqin lurki uka muspharkañ luräwinaka: aka uraq tukuskamaw nuwasiñ tʼakurayi; arconak jiskʼa jiskʼa pʼakinuqi, lansanak tʼunari, nuwasiñ carronaksa ninampiw phichhantaraki”.
Isaías 35:5, 6: “Ukapachaw juykhunakax uñjapxani, uqaranakas istʼapxarakini; suchunakasti taruja qallunakjamaw sinkʼusipxani, amutunakasti arnaqasipxarakiniwa. Wasara waña uraqinsti umax walpun jalsuni mä jachʼa jawirjama tukusa”.
Isaías 65:21, 22: “Jaqinakasti utanak utachasipxani, ukan jakasipxarakini, uvanak yapuchasipxani, uka yaputxa manqʼasipxarakini. Janiw ukanxa maynix yaqhan jakasiñapataki utachkaniti, janirakiw maynix yapuchkaniti mayninakan askipatakikixa”.
Juan 5:28, 29: “Horasax purininiwa taqi jiwatanakasti [Jesusan] arupx istʼapxaniwa. Ukatsti uka jiwatanakax jaktapxaniwa”.
Apocalipsis 21:3, 4: “Dios kipkarakiw jupanakampïni, jupanakan Diosaparakïniwa. Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusx[an]iwa”.
Biblian qhanañchäwipax kunatsa chuyma qhanartayistu
Taqi uka suma arunak istʼasaxa, qalltanxa, kawkit ukhamänix sañjamäspawa. Ukampis amtapxañäni, janiw jaqin arupäkiti jan ukasti Diosan arsüwinakapawa. Jehová Diosax ‘janiw kʼariskaspati’ (Tito 1:2).
Jumatix Diosan arsutanakapar atinisïta ukat mayitanakaparjam sarnaqarakïta ukhaxa, kusisitaw jikxatasïta, sinti jan waltʼäwinakansa chuymas qhanartataw jakarakïta. Janiw chʼaxwäwinakasa, ni usuntañanakasa, ni chuymankipstañasa, ni jiwañasa ukham sarnaqañ apaqkätamti. Kunattix Diosan Apnaqäwipax taqi jan waltʼäwinakwa chhaqtayxani.
¿Kunjamatsa ukham suytʼäwi jikxatarakisma? ‘Amtañanakamanxa machaqat amtxañamawa’ ukat “kunatix askïki, kunatix Diosarux kusisiyki, qʼumäkaraki” ukanak sum yatxatañamawa (Romanos 12:2). Jutïritak Diosan arsutanakapar jukʼampi atinisiñatakixa inas jukʼampi qhanañchtʼäwinak munsta, wali askipuniw ukanak yatxatañaxa. Janiw kunas ukham chuym qhanartaykiristamti.
[6, 7 jananakan fotonakapa]
¿Diosan Arupax jutïritakix kamsisa?