Jawstʼatätawa

JEHOVÁ Diosan Qhanañchirinakapan Tantachasiñ Utapanxa, ¿kunjamas tantachäwinakax apaspacha uk jisktʼasirïtati? Uka tantachäwinakarux taqiniw sarapxaspa, ¿uk yatiyätati? Khitinakatï jutañ munapktaxa, jutapxasmawa, ¡jawstʼatäpxtawa!

Inasay nayraqat aka jisktʼanakat yatiñ munchisma: ¿kunatsa tantachasipxtxa?, ¿kunsa lurapxtxa?, ukat ¿ukar sariri yaqha jaqinakax kamsapxisa?, uka tuqinakata.

“Taqpach markaw tantachasiñapa”

Nayra tiemponakatpunwa, Diosar yupaychañatakisa Jupat yatiqañatakisa tantachasipxiritayna. Niya kimsa waranq maraw pasawayxi, ukhawa Israel markarux akham kamachix arsusïna: “Ukapachasti taqpach markaw tantachasiñapa, taqi jaqinaka, warminaka, wawanaka, ukhamaraki kawkïri yaqha markat jutir jaqinakatï jumanak taypin jakki ukanakasa, ukhamat uka leyinak leetʼasiri istʼapxañapataki, ukhamat [Jehová] Tatitu Diosamar jaysaña yatiqapxañapataki, ukhamaraki uka leyinakas siski ukhamarjam sarnaqapxañapataki” (Deuteronomio 31:12). Ukhamwa Jehová Diosar istʼapxañapatakisa yupaychapxañapatakisa israelitanakarux —waynitunakarus jilïrinakarus— yatichasirïna.

Ukat nayrïr cristianonakax jakapkäna uka tiemponxa, ukhamarakiw chiqa yupaychirinakax tantachasipxirïna. Akham sasaw apóstol Pablox qillqäna: “Thaqañasaw maynit maynikama kunjäman yanaptʼasiñasataki munasiñanïñasataki, ukhamarak suma luräwinak uñachtʼayasa. Janirakiw tantachasïwinakasar janix sarañasäkiti kunjämtix yaqhipanakax jan sarapkiti ukhama, jan ukasti maynit mayniruw wayttʼasiñasa, Tatitun jutäwipa jakʼankxatapa yatisinsti jukʼampïñapawa” sasa (Hebreos 10:24, 25). Kunjamtï mä familian walja tiempo juntuki sarnaqapxi ukhax jukʼamp mayachasipxixa, ukhamarakiw tantachasisax Diosar yupaychirinakax jukʼamp mayachasipxi.

Biblian yatichäwiparjamaw Jehová Diosan Qhanañchirinakapax Tantachasiñ Utanakapan semanan pä kuti tantachasipxi. Ukat sapa tantachäwin yatichaski ukax aka Uraqpachanwa yatichasiraki. ¿Kunatsa tantachasipxi? Biblian yatichäwinakap sum amuytʼañataki, ukarjam sarnaqañataki ukat uka arunakar wali askit uñjañataki. Ukampis sapa wakichäwixa mä amtamp uttʼayatawa. Ukatxa, qalltansa tukuyansa tantachasirinakax parlartʼasipxarakiwa, ‘ukhamat maynit mayniru yanaptʼasiñataki’ (Romanos 1:12). Sapa wakichäwixa, ¿kunjamas apasi?

Bibliat apstʼat arstʼäwi

Jehová Diosan Qhanañchirinakapan nayrïr tantachäwipanxa, Bibliat apstʼat mä arstʼäwiw utji, ukasti sábado jan ukax domingo uruw apasi, uka wakichäwix taqinitaki suma iwxtʼanakaniwa, ukaruw jilapartix sarapxi. Jesucristox ukhamarakiw taqinitak arstʼirïna, mä arstʼäwipaxa Wali Uñtʼat Arstʼäwi satarakiwa (Mateo 5:1; 7:28, 29). Apóstol Pablox ukhamarakiw Atenas markan arstʼirïna (Hechos 17:22-34). Niya ukhamarakiw uka tantachäwinxa, taqinitak suma arstʼäwinakax utjaraki, jichhak jutirinakatakis wali askirakiwa.

Canten alabanzas a Jehová * sat libron jikxataski uka mä qʼuchumpiw qalltasi. Khitinakatix munapki ukanakax saytʼasin qʼuchtʼapxarakispawa. Ukat mä qhawqha arunakamp Diosaruw maytʼasiraki, ukxaruwa, 30 minutonak Bibliat arstʼasiraki ( “Taqinitak aski arstʼäwinaka” siski uk uñxatʼarakma). Arstʼirixa, “Biblianakamat jiskʼa tʼaqanak thaqtapxam liytʼapxañäni” sasaw chʼamachtʼaraki. Jumax Bibliamsa apasirakismawa, jan ukax janïr tantachäwi qalltkipanwa Jehová Diosan mä Qhanañchiriparu mayirakisma.

 Yatiyañataki sat revistat Yatxatäwi

Taqinitak arstʼäwi tukuyasxi ukxaruxa, Yatiyañataki sat revistat Yatxatäwiw apasiraki. Bibliat apstʼat mä yatichäwitwa mä hora yatxatasi, ukansti jisktʼanakaruw tantachasirinakax qhanañchtʼanipxi. Apóstol Pablox jakkäna uka tiempon kunjamtï Bereankirinakax yatxatapkäna uka kikparakiw aka wakichäwix apasi, Bereankirinakax “taqi chuymaw [...] ischʼukipxäna. Sapürurakiw Qillqatanaksa yatxatapxäna” (Hechos 17:11).

Uka wakichäwi qalltañatakix yaqha qʼuchuw qʼuchtʼasiraki, ukat aka pachpa revistatwa yatxatapxaraki, uksti Jehová Diosan Qhanañchirinakapaw churapxiristamxa. Akïr yatichäwinakax jichhakiw yatxatasiwayi: “Awk taykanaka, wawanakamar munasiñamp yatichapxam”, “Jan khitirus ñanqhat ñanqha kuttʼayapxamti” ukat “Niyaw tʼaqhisiñanakax tukusxani”. Jisktʼäwinakasay utjkchixa, janiw taqini arsupxañapäkapuniti. Khitinakatix arstʼapxi ukanakax utanwa liytʼaniwayapxi Bibliat apstʼat qillqatanaksa thaqtʼaniwayapxarakiwa, ukhamatwa arstʼañatakix wakichtʼasiniwayapxi. Tantachäwisti mä qʼuchumpi ukat Diosat mä maytʼasïwimpiw tukuyasxaraki (Mateo 26:30; Efesios 5:19).

Taman Bibliat Yatxatañataki

Jehová Diosan Qhanañchirinakapax chika semanax wasitampiw tantachasipxta. Tantachäwix kimsa wakichäwir jalanuqatawa, ukasti mä hora pusi tunka chikatani minutonakanwa apasiraki. Nayrïr wakichäwix Taman Bibliat Yatxatañataki satawa ukax 25 minutonwa apasi. ¿Kuna amtampis uttʼayasi? Biblia sum uñtʼañasataki, amuyañasataki, ukat ukarjam sarnaqañasataki, ukhamat  Criston suma arkiripäñataki (2 Timoteo 3:16, 17). Kunjamtï Yatiyañataki sat revistat Yatxatäwix apaskix ukhamarakiw jisktʼanakampi qhanañchtʼäwinakamp apasi, khitinakatix munapki ukanakakiw arstʼanipxaraki. Jehová Diosan Qhanañchirinakapan qillqat mä librotwa jan ukax mä folletotwa yatxatapxi.

Inas akham jisktʼasiraksta: Bibliat sipansa, “¿kunatsa tantachäwinakamanxa yaqha qillqatanakampit parlapxtaxa?” sasa. Diosar nayra tiempo yupaychirinakax janiw Diosan Arupak liyipxirïkänti. Bibliax akham siwa: “Jaqukipapxarakïnwa yaqha aruru [jan ukax qhanañchapxirïnwa, NM], ukhamat sum amuytʼapxañapataki” (Nehemías 8:8). Pasïr maranakakiw Isaías, Daniel ukat Apocalipsis tuqit parlir libronakat yatxatapxta, ukhamatwa jukʼampi sum amuytʼapxta.

Yatiyañataki Diosan Yatichäwipa

Taman Bibliat Yatxatañataki sat wakichäwi tukuyxasaxa, Yatiyañataki Diosan Yatichäwipa sat wakichäwiw qalltasiraki, 30 minutonaka, ukansti sum ‘yatichañatakiw’ yatichasi (2 Timoteo 4:2). ¿Janit wawamas jan ukax amigomas Diosat jan ukax Bibliat jisktʼirïktamxa? ¿Kamsirïtasa? Uka tantachäwinwa, jisktʼanakarux kunjamas qhanañchañax ukanakax yatichasi. Ukhamatwa Isaías profetjamax saraksna: “[Jehová] Tatitux yatichituwa qaritanakaru suma arunakampi chuymachañaxataki” sasa (Isaías 50:4).

Yatiyañataki Diosan Yatichäwipa sat wakichäwix mä arstʼäwimpiw qallti, ukasti Biblian mä jaljapat jan ukax pä jaljapat apstʼatawa, uka semananwa uka jaljanakxa liytʼawayapxi. Ukat arstʼir jilatawa, tantachasirinakarux mayiraki suma yatichäwinaka arstʼapxañapataki. Ukat uka Yatichäwir qillqayasirinakaw arstʼapxaraki.

Nayraqatar makatasawa, yatiqirinakax Bibliat liytʼapxi jan ukax kunjamsa Bibliat qhanañchtʼaspa ukwa uñachtʼayapxi. Ukxaruxa, suma yatxattʼat arstʼiriwa, arstʼirinakan parltʼäwinakapat chʼamachtʼañatakix makati, ukasti Benefíciese de la Escuela del Ministerio  Teocrático sat librorjamaw chʼamañchtʼi. Ukat qhipatwa jupanak saparuki kunjam lurañas wakisispa ukxa iwxtʼaraki.

Ukampis janiw yatiqirinakakix askinak apsupkiti, jan ukasti tantachasirinakax sum liyiñsa sum parlañsa ukat sum yatichañsa yatiqapxarakiwa. Yatiyañataki Diosan Yatichäwip tukuyasax Yatiyañataki Tantachäwiw mä qʼuchump qalltaraki.

Yatiyañataki Tantachäwi

Tantachäwin qhip qhipa wakiyäwipaxa, Yatiyañataki Tantachäwi satawa. Kunjamatsa Diosan Arupat sum yatiyasispa uka tuqitwa, arstʼäwinakampi, uñachtʼayäwinakampi ukat entrevistanakampi yatichasi, ukat tantachasirinakas arstʼanipxarakiwa. Jesusax ukhamarakiwa, arkirinakapar janïr yatiyir khitkasax tantachtʼasin kunjamsa lurapxañapa uk yatichäna (Lucas 10:1-16). Ukham waktʼayasiwayasax wali askinakwa yatiyir sarasax jikxatapxäna, uksti Jesusaruw yatiyapxäna (Lucas 10:17). Ukat maynit mayniruw yatiyasipxäna sasaw Bibliax saraki (Hechos 4:23; 15:4).

Kunjamas aka 35 minutonakataki wakichäwix apasini ukax Diosan Apnaqäwipat Yatiyañataki sat qillqatanwa sapa phaxsix mistu. Jichhakiw aka yatichäwinakat yatichasiwayi: “Jehová Diosar yupaychir familianaka”, “Kunatsa kuttʼaskaktanxa” ukat “Cristot yatiqasis yatiyapxañäni”. Tantachäwi tukuyxañatakixa mä qʼuchuw qʼuchtʼasi ukat tamankir mä jilatarakiw mä oracionampi tukuyxaraki.

Uka tantachäwir saririnakax kamsapxisa

Taqpach tamanakaw taqinir sum katuqtʼañatakix chʼamachtʼasipxi. Amuytʼañataki, Andrew sat chachaxa, walja kutiwa Jehová Diosan Qhanañchirinakap contra parlir istʼatayna. Ukampis tantachäwin sum katuqtʼapxatayna ukhax wal muspharatayna. Jupax akham siwa: “Wali askipunitaynaw tantachasiñ utar sarañaxa, taqiniw suma munasiñamp katuqtʼapxitu, ukat taqinirakiw jakʼachtʼasipxitu” sasa. Ukat Canadá markankir Ashel sat tawaqux niya ukhamwa saraki: “Tantachäwix wali khusapunïnwa. Arstʼaski ukxa sumpun amuytʼaniwayta” sasa.

José sat chachax ukham jikxatasirakikïna, jupasti Brasil markan qamasi. Wali qhuru jaqïkchisa, Tantachasiñ Utaruw jawstʼapxatayna. Jupax akham siwa: “Tantachasirinakatxa niya taqiniw nayar uñtʼapxitäna, ukampis taqiniw munasiñamp katuqtʼapxitu” sasa. Japón markan utjasiri Atsushi sat mä chachax akham sasaw amtaraki: “Kunapachatï qallt qalltan Jehová Diosan Qhanañchirinakapan tantachasiñ utapar sart ukhaxa, chiqpachansa mayjaw amuyasiyäta. Ukampis mayni jaqinakjamäskatapxa ukhakiw amuyta ukat sum jikxatasiñaj munapxatapsa ukhakiw amuyarakta” sasa.

Jumax jawstʼatarakïtawa

Kunjamtï uka arunakan amuytʼawayktaxa, wali askiw tantachäwinakar sarañaxa. Ukhamatwa Bibliat yatiqasax Jehová Diosar jukʼamp uñtʼäta ukat juparakiw juman askimatak yaticharakïtamxa (Isaías 48:17).

Jehová Diosan Qhanañchirinakapan tantachäwipanxa janiw qullqix mayiskiti. ¿Nänakamp chik tantachasir sarañ munasmati? Tantachasiñ Utar wali munasiñamp jawstʼatätawa.

[Qhanañchäwi]

[22 janan recuadropa]

 Taqinitak aski arstʼäwinaka

170 arstʼäwinakatsa jila arstʼäwinakaw utji, ukanakax Bibliat apstʼatawa, yaqhipanakax akanakawa:

◼ Aka ñanqha pachanxa kunjamsa jan axsrasa jakassna

◼ ¿Kunatsa Biblian iwxanakaparjam sarnaqañasa?

◼ ¿Khitikis jaqinakar sum apnaqaspa?

◼ Jichhasa jutïr urunakansa suman wali kusisitaw jakasirakisma

◼ ¿Diosax kunjam jaqits uñtʼistu?

[22 janan fotopa]

Bibliat arstʼäwi

[22 janan fotopa]

Yatiyañataki sat revistat Yatxatäwi

[23 janan fotos]

Taman Bibliat Yatxatañataki

[23 janan fotopa]

Yatiyañataki Diosan Yatichäwipa

[24 janan fotopa]

Yatiyañataki Tantachäwi