Kunatï jutïrin paskani uka toqet cheqa yatichäwi
¿Kunas jutïr urun pasani sasajj jisktʼasirïtati? Niyaw kunayman musparkañanakajj pasani sasaw Bibliajj qhanañchi, ukanakajj taqeniruw walinsa jan walinsa uñjasiyistani.
“Diosan Reinopan jakʼankjjatap” kunjamatsa yatsna uk Jesusaw qhanañchawayäna (Lucas 21:31). ‘Mä jachʼa markajj yaqha jachʼa marka contraw sartani, jachʼa terremotonakaw utjani, manqʼat pistʼañanakasa usunakasa ukjan akjanwa utjarakini’ sasaw Jesusajj säna, jichhürunakanjja ukhamapuniw pasaski (Lucas 21:10-17).
Akapach gobiernonakan ‘qhepa urunakapanjja’, jaqenakajj kunjamäpjjañapänsa, mä arunjja kuna jan walinaksa lurapjjañapäna taqe ukanakatwa Bibliajj qhanañcharaki. Uka toqet qellqat profeciajj 2 Timoteo 3:1-5 textonwa jikjjatasi. Uka texto liytʼasajja, jaqenakajj jichhürun cheqapuniw luräwipansa sarnaqäwipansa ukhamäsipki sasaw amuyäta.
¿Kunsa ukanakajj uñachtʼayistu? Niyaw Diosan Reinopajj walja musparkañanak apanini, ukanakaw aka oraqen suman jakasiña utjayani (Lucas 21:36). ‘Walja sumanakwa aka oraqetakisa ukan jakirinakatakis luräjja’ sasaw Diosajj Biblian qhanañchi. Ukanakat mä qhawqhanak uñjañäni.
MÄ SUMA GOBIERNO
Jesusaruw “munañanïñasa, jachʼa kankañasa, reinosa churatarakïna, taqe markankiri jaqenaka, kunayman kasta parlani jaqenakarakiw juparojj servipjjäna. Chʼamapajj pachpakïskaniwa, reinopasa janirakiw tʼunjatäkaniti” (DANIEL 7:14).
Kamsañsa muni. Taqe reinonakat sipansa Diosaw aka oraqpach apnaqer mä Reino uttʼayi, uka Reinon Reyipajj Jesusawa. Uka gobiernojj apnaqjjani ukhaw kusisita wiñayatak jakasjjañäni.
JAN USUNTAS JAKASIÑA
‘Janiw khitis siskaniti: “Usutätwa” sasajja’ (ISAÍAS 33:24).
Kamsañsa muni. Janipuniw jukʼampejj usuntjjañäniti, janirakiw discapacitadonakas utj-jjaniti. Wiñayatakiw jakasjjañäni, janirakiw jiwjjañäniti.
SUMANKAÑAN JAKASIÑA
Diosajj “aka oraq tukuskamaw nuwasiñ tʼakurayi” (SALMO 46:9).
Kamsañsa muni. Wiñayatak sumankañan jakasiñaw aka oraqen utj-jjani, guerrajj kuna jan walinaktï utjayki ukas janiw jukʼampejj utj-jjaniti.
AKA ORAQEJJ SUMA JAQENAKAMP PHOQANTATÄNIWA
“Ñanqha lurir jaqenakajj chhaqtjjaniwa; [...] llampʼu chuymaninakasti oraq katoqapjjani” (SALMO 37:10, 11).
Kamsañsa muni. Jan wali jaqenakajj janiw utj-jjaniti, Diosar istʼañ munapki uka jaqenakakiw utj-jjani.
AKA ORAQPACHAJJ MÄ SUMA PARAISÖJJANIWA
“Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini” (ISAÍAS 65:21, 22).
Kamsañsa muni. Aka oraqpachaw mä suma jardinar tukuyatäjjani. Diosarojj ‘aka oraqen’ munañamajj luratäpan sasin mayktan ukajj cheqapuniw phoqasini (Mateo 6:10).
Akanakajj inas gustarakiristam
BIBLIAT YATIÑATAK JISKTʼANAKA
¿Kunanaksa Diosan Reinopajj lurani?
Diosan Reinopajj aka oraq apnaqjjani ukhajj kunanakas utjani uk uñjam.
