Andɛ’n, be diman be nga be sa mian aliɛ nin lawlɛ wun’n, be yalɛ. Be nun wie’m be kunndɛ kɛ be cici be wla. Ɲanmiɛn kunndɛ kɛ e ti be nga be sa w’a mian’n be wun ɲanman nun. Ɔ maan kɛ e yo sɔ’n, i klun jɔ e wun kpɛkun ɔ yra e su. ?Wafa sɛ?

“Sɛ a lɛ ninnge naan ɔ wiengu leman wie’n, nán yo i anwɛn.”—NYANNDRA MUN 3:27.

Cɛn kun’n, Zezi kannin ndɛ kun. Ɔ seli kɛ bian kun ko tɔli awiefuɛ’m be nun. Kɛ ɔ yoli sɔ’n, be deli i sa nun ninnge’m be kwlaa kpan, be boli i. Kɛ ɔ ka kan ɔ́ wú’n, be yacili i lɛ be ɔli. (Liki 10:29-37) Ɔsiaunnvuɛ wie wunnin bian’n naan w’a niɛn i lika. Kannzɛ be finwlɛ’n timan kun’n, sanngɛ ɔ niannin bian sɔ’n i lika kpa.

Bian klun ufuefuɛ sɔ’n yoli bian’n i ayre kpɛkun ɔ mannin sika naan be fa niɛn i lika. Sanngɛ nɛ́n i ngba-ɔ. Ɔ fɔnvɔli i kpɛkun like ng’ɔ ko yo naan bian’n i sa w’a mianman like wie wun’n, yɛ ɔ yoli-ɔ.

?Ngue yɛ ndɛ sɔ’n kle e-ɔ? Zezi waan ɔ fata kɛ e ti e wiengu’m be wun ɲanman nun. (Nyanndra Mun 14:31) Ɲanmiɛn Ndɛ’n se kɛ ɔ ka kan’n, Ɲanmiɛn wá yó maan sran’m be su diman yalɛ kun yɛ ɲrɛnnɛn kwlaa wíe. Sanngɛ e kwla usa e wun kɛ: ?Wafa sɛ yɛ Ɲanmiɛn yó i sɔ like liɛ’n niɔn? ?Yɛ blɛ benin nun-ɔn? Ndɛ akpasua nga i sin liɛ’n nun’n, é wá kán like nga Ɲanmiɛn wá yó mán e’n, i ndɛ.