Kɛ mɔ e kwlakwla e ti Adan i mma mun’n ti’n, e kwla se kɛ e kwlaa e ti awlobo kunngba nunfuɛ. Ɔ fata kɛ awlobo kun nunfuɛ’m be klo be wiengu yɛ be bu be wiengu sran. Sanngɛ andɛ’n nɛ́n i sɔ yɛ e wun i-ɔ. E Si Ɲanmiɛn kusu i klun jɔmɛn i sɔ’n su.

“Ɔ fata kɛ sran kun klo i wiengu kɛ ɔ fa klo i bɔbɔ i wun’n sa.”—SAUN YOLƐ 19:18.

“Amun klo amun kpɔfuɛ mun titi.” —MATIE 5:44.

Maan e fa e ɲin e sie i ndɛ nga 1 Korɛntifuɛ Mun 13:4-7 kɛn i klolɛ’n su’n i su.

“Sran ng’ɔ klo sran’n, ɔ trɛ i awlɛn, kpɛkun ɔ yo sran ye.”

Maan e bu ndɛ nga i akunndan: ?Kɛ e yo like tɛ wie mɔ e wiengu’m be tra be awlɛn e wun mɔ be yo e ye, kpɛkun be faman e wun ya’n, wafa sɛ yɛ e wun yo e-ɔ?

“Sran ng’ɔ klo sran’n, i ɲin bloman sran like su.”

Maan e bu ndɛ nga i akunndan: ?Kɛ e wiengu’m be kle kɛ be lafiman e su mɔ be ɲin blo e wun’n, wafa sɛ yɛ e wun yo e-ɔ?

Sran ng’ɔ klo sran’n “ɔ bumɛn i ngunmin i wun akunndan.”

Maan e bu ndɛ nga i akunndan: ?Kɛ e kan ndɛ mɔ e wiengu’m be sie be su e nuan bo kpɛkun be seman kɛ saan fii e di be ndɛ liɛ nga be kan’n su’n, wafa sɛ yɛ e wun yo e-ɔ?

“Sran ng’ɔ klo sran’n, ɔ faman sa siemɛn i klun.”

Maan e bu ndɛ nga i akunndan: Ɲanmiɛn yaci be nga be yo sa tɛ mɔ be kaci be nzuɛn’n, be wun sa’n cɛ be. I nuan Ndɛ’n se kɛ: “Ɔ kaman sran i ijɔlɛ’n su sa tititi. Ɔ faman ya siemɛn i klun.” (Jue Mun 103:9) Kɛ e yo sran kun i sa m’ɔ yaci cɛ e’n, i sɔ’n yo e fɛ. I sɔ’n ti’n, e kusu sɛ be yo e sa’n, ɔ fata kɛ e yaci e cɛ.—Jue Mun 86:5.

“Sran ng’ɔ klo sran’n, sa tɛ yolɛ’n yomɛn i fɛ.”

Maan e bu ndɛ nga i akunndan: Sɛ kekle o e su’n, e kunndɛman kɛ i sɔ’n ti’n e wiengu’m be klun jɔ. I wafa kunngba’n sɛ e wiengu’m be su fɛ’n, kannzɛ be yoli e sa bɔbɔ’n, ɔ fataman kɛ fɛlɛ mɔ be su fɛ’n ti’n e di aklunjuɛ.

Sɛ e kunndɛ kɛ Ɲanmiɛn yra e su’n, ɔ fata kɛ e klo sran’m be kwlakwla. Nán e fa e ɲin e sie i be afuɛ’n, nin be finwlɛ’n, nin asɔnun nga be kɔ nun’n, be su. Ninnge nga e kwla yo fa kle kɛ e klo e wiengu mun’n, be nun kun yɛle kɛ maan e ti be wun ɲanman nun.