Dai nahaloy pakatapos kan pangaturugan ni Hading Nabucodonosor manungod sa estatwa, nagpagibo siya nin dakulaon na estatwang gibo sa bulawan. Ipinabugtak niya iyan sa kapatagan nin Dura dangan ipinaapod an pinakaimportanteng mga opisyal kan Babilonya, kaiba si Sadrac, Mesac, asin Abednego, para magtiripon sa atubangan kan estatwa. Ipinagbuot kan hadi: ‘Pag nadangog na nindo an tanog kan mga trumpeta, plawta, asin arpa, magsurubsob kamo sa atubangan kan estatwa! Ta kun dai, iaapon kamo sa nagkakalayong hurno.’ Masubsob daw sa atubangan kan estatwa an tulong Hebreo, o si Jehova sana an sasambahon ninda?

Dangan ipinagbuot kan hadi na patugtugon an musika. Nagsurubsob an gabos asin nagsaramba sa estatwa. Si Sadrac, Mesac, asin Abednego lang an dai. Nahiling sinda kan iba kaya sinabi kan mga ini sa hadi: ‘Su tulong Hebreo habong magsamba sa estatwang pinagibo mo.’ Ipinaapod sinda ni Nabucodonosor asin tinaraman: ‘Tatawan ko kamo nin saro pang pagkakataon para sumamba sa estatwa. Kun dai kamo masamba, ipapaapon ko kamo sa laog kan hurno. Daing diyos na makakapagligtas saindo sako.’ Nagsimbag sinda: ‘Dai mi na po kaipuhan nin saro pang pagkakataon. Kaya kaming iligtas kan Diyos mi. Pero kun dai niya kami iligtas, O hadi, dai pa man giraray kami masamba sa estatwa.’

 Angguton si Nabucodonosor. Sinabi niya sa mga tawuhan niya: ‘Painiton an hurno nin pitong beses!’ Dangan pinagbutan niya an mga suldados: ‘Gapuson sinda asin iapon sa hurno!’ Mainiton an hurno kaya nagadan tulos an mga suldados pagrani duman. Buminagsak sa kalayo an tulong Hebreo. Pero kan siripon sinda ni Nabucodonosor, nahiling niya na may apat na lalaki imbes na tulo na naglalakaw-lakaw sa laog kan hurno. Natakot siya asin hinapot an mga opisyal niya: ‘Bakong tulong lalaki su iinapon ta sa kalayo? Apat an nahihiling ko, asin an saro sainda garo anghel!’

Nagrani sa hurno si Nabucodonosor dangan nag-apod: ‘Luwas na kamo, kamong mga lingkod kan Kahuruhalangkawing Diyos!’ Ngaralason an gabos kan mahiling ninda si Sadrac, Mesac, asin Abednego na dai man lamang naano kan kalayo. Dai nasulo an saindang kublit, buhok, pati bado, asin dai man lamang sinda namarong kalayo.

Nagsabi si Nabucodonosor: ‘Makapangyarihan an Diyos ni Sadrac, Mesac, asin Abednego. Isinugo niya an saiyang anghel para iligtas sinda. Daing diyos na arog kan sainda.’

Arog kan tulong Hebreo, determinado ka man daw na magin maimbod ki Jehova ano man an mangyari?