Kan may tiggutom sa Israel, nagbalyo sa Moab an Israelitang si Noemi kaiba kan saiyang agom asin duwang aking lalaki. Uminabot an panahon na nagadan an agom ni Noemi. An mga aki niya nag-agom nin mga Moabita, si Ruth asin si Orpa. Makamumundo ta nagadan man an mga aki ni Noemi.

Kan mabaretaan ni Noemi na tapos na an tiggutom sa Israel, nagdesisyon siyang magpuli. Nag-iba saiya si Ruth asin Orpa, pero mantang nasa dalan, nagsabi si Noemi sainda: ‘Nagin marahay kamong mga agom sa sakong mga aki asin marahay na mga manugang. Gusto kong mag-agom giraray kamo. Magpuli na kamo sa Moab.’ Nagsimbag an duwang babayi: ‘Padaba mi ika. Dai mi ika babayaan.’ Pigparasabihan sinda ni Noemi na magpuli na. Puminuli si Orpa, pero si Ruth dai. Sinabi saiya ni Noemi: ‘Mapuli na si Orpa sa saiyang banwaan asin sa saiyang mga diyos. Bumalik ka na kaiba niya, asin magpuli ka na sa harong kan saimong ina.’ Pero nagsabi si Ruth: ‘Dai taka babayaan. An banwaan mo magigin banwaan ko, asin an Diyos mo magigin Diyos ko.’ Ano daw an namatian ni Noemi kan sabihon iyan ni Ruth?

Nag-abot si Ruth asin Noemi sa Israel kan nagpupuon na an aranihan nin sebada. Sarong aldaw, nagduman si Ruth sa uma kan lalaking si Boaz, na aki ni Rahab, para mamurot nin natadang sebada. Naaraman ni Boaz na sarong Moabita si Ruth asin na dai kaini binayaan si Noemi. Sinabihan ni Boaz an saiyang mga paraani na dagdagan an tadang mga sebada para puruton ni Ruth.

 Kan bangging idto, hinapot ni Noemi si Ruth: ‘Kiisay kang uma nagtrabaho ngunyan?’ Nagsimbag si Ruth: ‘Sa uma kan lalaki na an pangaran Boaz.’ Sinabi ni Noemi sa saiya: ‘Paryente si Boaz kan agom ko. Duman ka lang sa uma niya magtrabaho kaiba kan ibang hoben na mga babayi. Dai ka maaano duman.’

Padagos na nagtrabaho si Ruth sa uma ni Boaz sagkod na matapos an aranihan. Narisa ni Boaz na mahiguson si Ruth asin na marahayon ining babayi. Kaidto, pag nagadan an sarong lalaki na dai nin mga aking lalaki, aagumon kan paryente niya an nabalo niyang agom. Kaya pinakasalan ni Boaz si Ruth. Nagkaigwa sinda nin aking lalaki na an pangaran Obed, na nagin lolo ni Hading David. Ugmahon an mga amiga ni Noemi. Nagsarabi sinda: ‘Inot, itinao saimo ni Jehova si Ruth, na nagin marahayon saimo, asin ngunyan tinawan ka niya nin makuapo. Pag-umawon lugod si Jehova.’