NABAWTISMUHAN an ama ni John bilang Saksi ni Jehova sa sarong sadit na banwaan sa Gujarat, India, sa pagtatapos kan dekada nin 1950. Si John saka an lima niyang tugang na lalaki asin babayi saka an saindang ina gabos saradong Romano Katoliko, kaya kontra sinda sa relihiyon kan saindang ama.

Sarong aldaw, pinakiulayan si John kan saiyang ama na ihatod an sarong sobre sa sarong brother na amigo kaini sa kongregasyon. Alagad kan agang iyan, nalugadan nin grabe an sarong muro ni John kan binubuksan niya an sarong dakulang latang dram. Pero gusto niyang magkuyog sa saiyang ama, kaya binugkusan niya nin tela an nagdudugo niyang muro asin naglakaw na para ihatod an sobre.

Pag-abot ni John sa harong kan brother, an nagresibi kan sobre iyo an agom kaini, na sarong Saksi ni Jehova. Narisa kan sister na may lugad an muro ni John kaya nag-alok ini nin tabang. Kinua kan sister an first-aid kit niya, lininigan nin antiseptiko an lugad, asin binendahan an muro. Dangan tinimplahan kaini si John nin sarong tasa nin mainit na tsa. Mantang ginigibo kan sister an gabos na ini, mabuot niyang kinakaulay si John dapit sa Bibliya.

Sa puntong ini, nagpupuon nang magbago an paghiling ni John sa mga Saksi, kaya hinapot niya an sister dapit sa duwang tema na magkaiba sinda nin paniniwala kan saiyang ama—kun baga si Jesus an Diyos asin kun baga dapat na mamibi an mga Kristiyano ki Maria. An sister tataong mag-Gujarati, an nagimatan na lengguwahe ni John, kaya sinimbag niya ini sa lengguwaheng iyan gamit an Bibliya asin tinawan kan buklet na “This Good News of the Kingdom.”

Kan huri, kan binabasa na ni John an buklet, narealisar niya na idto na an katotoohan. Nagduman siya sa padi ninda asin ihinapot an duwang hapot niya kaidto. Naanggot na marhay an padi dangan ibinaribad ki John an sarong Bibliya asin nagkurahaw: “Nagigi ka nang Satanas! Pahilingan sako kun sain sinasabi sa Bibliya na bako si Jesus an Diyos. Pahilingan sako kun sain sinasabi sa Bibliya na dai dapat sambahon si Maria. Ipahiling mo!” Nabiglang marhay si John sa reaksiyon kan padi, kaya sinabi niya digdi, “Nungka na akong matungtong sa simbahan nin mga Katoliko.” Asin talagang dai na siya naglaog sa simbahan puon kaidto!

Nakipag-adal sa mga Saksi si John, inako an katotoohan, asin nagpuon na maglingkod ki Jehova. Pag-abot nin panahon, arog man kaiyan an ginibo kan iba pang kapamilya niya. Yaon pa man giraray ngunyan sa panuldong muro kan tuo niyang kamot an piklat kan malugad siya mga 60 taon na an nakaagi. Dai niya malilingawan an sarong akto nin Kristiyanong kabuutan na nagdara sa saiya sa sarong buhay nin dalisay na pagsamba ki Jehova.—2 Cor. 6:4, 6.