DAI lubos maisip ni Jose na taga Arimatea kun paano siya nagkakusog-buot na magdulok sa Romanong gobernador. Si Poncio Pilato midbid na matagason an payo. Pero tanganing matawan si Jesus nin lubong na may dignidad, kaipuhan na may makiulay ki Pilato na itao an bangkay ni Jesus. Alagad, ibang-iba sa inaasahan ni Jose an nangyari huling dai man nagin masakit kaulay si Pilato. Kan makumpirmar ni Pilato hali sa sarong opisyal nin hukbo na gadan na si Jesus, pinaonrahan niya si Jose. Kaya ngunyan, dawa mamundo pang marhay si Jose, nagdali-dali siya pabalik sa lugar na pinaggadanan ki Jesus.—Mar. 15:42-45.

• Siisay ining si Jose na taga Arimatea?

• Ano an koneksiyon niya ki Jesus?

• Asin taano ta dapat kitang magin interesado sa istorya mapadapit sa saiya?

Sa ipinasabong na Ebanghelyo ni Marcos, inapod si Jose na “sarong iginagalang na miyembro kan Konseho.” Digdi, an Konseho iyo man sana an Sanhedrin, an korte suprema asin an pinakahalangkaw na grupo administratibo kan mga Judio. (Mar. 15:1, 43) Kaya si Jose saro sa mga lider kan banwaan. Iyan an dahilan kaya may pribilehiyo siyang makaulay an Romanong gobernador saka kun taano ta mayaman siya.—Mat. 27:57.

Bilang grupo, an Sanhedrin anggot ki Jesus. Nagkurumplutan an mga miyembro kaiyan tanganing ipagadan siya. Pero si Jose inapod na “marahay saka matanos [na] tawo.” (Luc. 23:50) Bakong arog kan kadaklan sa mga kairiba niya sa Sanhedrin, onesto asin malinig an saiyang pamumuhay saka ginigibo an pinakamakakaya tanganing masunod an mga pagbuot nin Diyos. “Naghahalat [man siya] kan Kahadian nin Diyos,” na tibaad iyo an dahilan kaya nagin disipulo siya ni Jesus. (Mar. 15:43; Mat. 27:57) Posibleng huli sa pagpapahalaga niyang marhay sa kun ano an totoo asin sa hustisya kaya nagkainteres siya sa mensahe ni Jesus.

Sinasabi kan Juan 19:38 na si Jose “sarong disipulo ni Jesus alagad patago dahil sa takot niya sa mga Judio.” Ano an ikinakatakot ni Jose? Aram niya na nauuyam ki Jesus an mga Judio asin na determinado sindang itiwalag sa sinagoga an siisay man na magpahayag na nagtutubod siya ki Jesus. (Juan 7:45-49; 9:22) Kun an saro matiwalag sa sinagoga, siya tutuyaon, rarayuan, asin isisikwal kan mga kapwa niya Judio. Kaya nagduwa-duwa si Jose na hayagan na sabihon na nagtutubod siya ki Jesus. Kun gigibuhon niya iyan, mawawara an saiyang posisyon asin mararaot an saiyang reputasyon.

Bako lang si Jose an nasa arog kaining sitwasyon. Sigun sa Juan 12:42, “dakul an talagang nagturubod [ki Jesus] maski an mga tagapamahala, alagad dai ninda ini ipinapahayag dahil sa mga Fariseo, tanganing dai sinda matiwalag sa sinagoga.” An saro pa iyo si Nicodemo, na miyembro man kan Sanhedrin.—Juan 3:1-10; 7:50-52.

Pero si Jose, sarong disipulo, kaso mayo siyang kusog nin buot na sabihon iyan nin hayagan. Seryosong bagay iyan, lalo na may koneksiyon sa sinabi ni Jesus: “An lambang saro na nagpapahayag sa atubangan nin mga tawo na midbid niya ako, ipapahayag ko man sa atubangan kan sakuyang Ama na nasa langit na midbid ko siya. Alagad an siisay man na nagninigar sa atubangan nin mga tawo na nagtutubod siya sa sako, ninigaran ko man sa atubangan kan sakuyang Ama na nasa langit na disipulo ko siya.” (Mat. 10:32, 33) Dai man talaga pignigaran ni Jose si Jesus, pero mayo man siyang kusog nin buot na sabihon na midbid niya ini. Kun ika, ano an gigibuhon mo?

Pero may marahay na bagay na ginibo si Jose. Sinasabi kan Bibliya na dai niya sinuportaran an pakana kan Sanhedrin laban ki Jesus.  (Luc. 23:51) May mga nagsasabi na posibleng mayo kaidto si Jose kan binibista si Jesus. Ano man an nangyari, siguradong ikinauyam na marhay ni Jose an grabeng inhustisyang iyan—pero mayo man siyang magigibo tanganing mapugulan iyan!

Kan gadan na si Jesus, minalataw na nadaog na ni Jose an saiyang takot, asin nagdesisyon siyang suportaran an mga parasunod ni Jesus. Maririsa sa Marcos 15:43 na iyan an nagin desisyon niya: “Nagkusog-buot siyang magduman ki Pilato asin hinagad niya an hawak ni Jesus.”

Posibleng yaon kaidto si Jose kan magadan si Jesus. Sa katunayan, mas nainot pa siyang nakaaram kisa ki Pilato na gadan na si Jesus. Kaya kan hagadon ni Jose an bangkay, “gustong maaraman [kan gobernador] kun baga gadan na si Jesus.” (Mar. 15:44) Kun nahiling mismo ni Jose an labi-labing pagsakit ni Jesus sa hariging pasakitan, posible daw na napahiro kaiyan an saiyang konsiyensiya asin nakapagdesisyon nang dapat siyang manindugan para sa katotoohan? Posible iyan. Ano man an nangyari, ngunyan uminaksiyon na siya. Dai na siya magigin patagong disipulo.

Kahagadan sa katugunan nin mga Judio na ilubong an mga nasentensiyahan nin kagadanan bago magsulnop an saldang. (Deut. 21:22, 23) Pero arog kan pagkamidbid ta sa mga Romano, an bangkay kan mga ginadan na kriminal magsalang pinapabayaan na sanang malapa sa harigi o iinaapon sa ordinaryong lulubngan. Alagad habo ni Jose na mangyari iyan ki Jesus. May ipinagibo siyang bagong lulubngan na tinuki sa gapo  harani sa lugar na pinaggadanan ki Jesus. Dai pa ini nagagamit kaya ipinapahiling kaini na kababalyo pa sana ni Jose sa Jerusalem haling Arimatea * asin na itinatagama niya kuta iyan para magin lulubngan kan saiyang pamilya. (Luc. 23:53; Juan 19:41) Sarong ebidensiya nanggad kan pagkabukas-palad ni Jose an paglubong niya ki Jesus sa magigin lulubngan niya kuta pag-abot nin panahon. Kautuban ini kan hula na an Mesiyas ilulubong ‘kaibanan kan mga mayaman.’—Isa. 53:5, 8, 9.

Sinasabi kan apat na Ebanghelyo na pakakua ni Jose kan bangkay ni Jesus sa harigi, pinatos niya iyan nin marahay na klaseng telang lino asin ilinaag sa sadiri niyang lulubngan. (Mat. 27:59-61; Mar. 15:46, 47; Luc. 23:53, 55; Juan 19:38-40) An solamenteng espesipikong sinambit na nagtabang ki Jose iyo si Nicodemo, na nagdara nin mahamot na mga sangkap. Prominenteng tawo an duwang ini, kaya harayo an posibilidad na sinda mismong duwa an nagdara kan bangkay. Posibleng marhay na ipinagibo ninda sa mga suruguon ninda an aktuwal na pagdara asin paglubong. Naggamit man sinda nin mga suruguon o dai, bakong basta-basta an ginibo ninda. An siisay man na magduta sa sarong bangkay magigin maati sa laog nin pitong aldaw, asin gabos na madutaan ninda magigin maati man. (Bil. 19:11; Hag. 2:13) Kakaipuhanon nindang rumayo sa mga tawo sagkod na matapos an semana nin Paskuwa asin dai sinda dapat makikabtang sa gabos na seremonya asin selebrasyon sa semanang iyan. (Bil. 9:6) Sa pag-asikaso niya kan lubong ni Jesus, posibleng marhay na tuya-tuyaon siya kan mga amigo asin mga kairiba niya. Pero sa puntong ini, andam na siya sa ano man na magigin konsekwensiya kan pagtao niya nin may dignidad na lubong ki Jesus asin kan hayagan niyang pagpamidbid bilang disipulo ni Cristo.

Pagkatapos kan rekord kan Ebanghelyo dapit sa paglubong ki Jesus, mayo nang sinambit an Bibliya manungod ki Jose na taga Arimatea, kaya siguradong maihahapot ta: Ano na an nangyari sa saiya? An totoo, dai ta aram. Pero sigun sa mga napag-ulayan ta, dakula an posibilidad na hayagan niyang ipinamidbid an saiyang sadiri bilang Kristiyano. Masasabi niyato ini huling sa panahon nin pagbalo asin kasakitan, an saiyang pagtubod asin kusog nin buot nag-uurog imbes na nagluluya. Marahay na senyales iyan.

An istoryang ini nagtatao nin hapot na marahay na pag-isipan niyato: Igwa daw nin ano man na bagay—posisyon, karera, materyal na bagay, pagkamuot sa pamilya, o dawa an sato mismong katalingkasan—na mas pinapahalagahan niyato kisa sa satong relasyon ki Jehova?