Dakul na estudyante ngunyan an nagkaklase bako sa saindang eskuwelahan kundi sa bago nindang “classroom”—an saindang harong. Kun saro ka sa sainda, paano ka mas makikinabang diyan? Uni an pirang suhestiyon. a

•  Limang tip na makakatabang saimo

•  An sinasabi kan ibang tin-edyer

•   Magplano kan mga gigibuhon mo. Magkaigwa nin regular na iskedyul, na garo nagkaklase ka sa eskuwelahan. Banga-bangaon kun pirang oras an itatao mo sa pagklase, sa mga gibuhon sa harong, asin sa iba pang importanteng bagay. Puwede mo iyan baguhon kun kaipuhan.

   Prinsipyo sa Bibliya: “Gibuhon nindo an gabos na bagay . . . sa organisadong paagi.”—1 Corinto 14:40, nota sa ibaba.

   “Isipon na nasa eskuwelahan ka talaga. Kaipuhan mong magibo an mga bagay-bagay sa tamang oras.”—Katie.

   Pag-isipan: Taano ta mas marahay na isurat mo an iskedyul mo tapos ilaag iyan sa madali mong mahiling?

•   Magkaigwa nin disiplina sa sadiri. Pag ginigibo mo an sarong bagay na kaipuhan gibuhon—dawa garo dai mo gusto—patunay iyan na nagma-mature ka na. Dai magpaliman-liman!

   Prinsipyo sa Bibliya: “Magin mahigos, dai pagparapaliman-limanan an saindong trabaho.”—Roma 12:11, nota sa ibaba.

   “An pinakamasakit su disiplina sa sadiri. Madalion sanang sabihon, ‘Atyan na lang ako maadal.’ Tapos dai ko man nagigibo, kaya natatambak lugod su mga dapat kong gibuhon.”—Alexandra.

   Pag-isipan: Taano ta makakatabang para magkaigwa ka nin disiplina sa sadiri kun maadal ka sa parehong lugar asin oras kada aldaw?

•   Magpili nin lugar kun sain ka maadal. Ihanda mo na an gabos na gagamiton mo. Gibuhon iyan na komportable, pero dai man sobra ta tibaad mapaturog ka lugod. Yaon ka diyan para mag-adal, bako para magpahayahay. Kun mayo kang mahanap na lugar, puwede mong gamiton an kusina o kuwarto pag oras mo nin pag-adal.

   Prinsipyo sa Bibliya: “An mga plano kan mahigos siguradong magigin mapanggana.”—Talinhaga 21:5, NWT.

   “Itago mo nguna an bola mo, mga video game, i-silent an cellphone, saka isaray an gitara. Kun gusto mo talagang makanuod, mahalaga na halion mo an mga bagay na makakaisturbo saimo.”—Elizabeth.

   Pag-isipan: Ano pa an puwede mong gibuhon sa adalán mo para mas makapag-adal ka?

•   Magtutok sa pinag-aadalan mo. Dai pagsabay-sabayon an mga kaipuhan gibuhon. Ta kun pagsasarabayon mo, dakula an posibilidad na masala ka saka mas haloy mo iyan na matatapos.

   Prinsipyo sa Bibliya: “[Gamiton] sa pinakamarahay an saindong panahon.”—Efeso 5:16.

   “Masakiton talagang magpokus pag kataid ko an cellphone ko. Nasasayang lang an oras ko ta mayo man akong natatapos.”—Olivia.

   Pag-isipan: Kaya mo daw na padiit-diit na dagdagan an oras mo sa pagpokus sa sarong assignment?

•   Magrelaks ka man. Puwede kang maglakaw-lakaw, magburubisikleta, o mag-ehersisyo. Makakatabang man kun may hobby ka. “Pero tapuson mo nguna su mga dapat mong gibuhon,” an sabi kan librong School Power. “Mas mae-enjoy mo an pagrelaks mo kun mayo ka nang pig-iisip na ibang gigibuhon.”

   Prinsipyo sa Bibliya: “Mas marahay pa an sarong hakbot nin pagpahingalo kisa sa duwang hakbot nin pagpapagal asin paglapag sa duros.” Parahulit 4:6, NWT.

   “Sa eskuwelahan may mga klase sa music o art na puwede mong laugan. Ngunyan na mayo na iyan, nakaka-miss palan. Kaya mas magayon kun iibanan mo an pag-adal mo nin hobby na nae-enjoy mo.”—Taylor.

   Pag-isipan: Anong pagrelaks an makakatabang saimo para magin ganado ka sa pag-adal mo?