Ee, Satana e ko aba. Ni “kateka wa ici calo,” malaika uwaishileba umubi kabili uwapondokele Lesa. (Yohane 14:30; Efese 6:11, 12) Baibolo ilasokolola ifyo Satana aba ilyo imulondolola no kumwita aya mashina:

•   Satana, icalola mu kuti “Uukanya.”—Yobo 1:6.

•   Kaseebanya, icalola mu kuti “Uwa lwambo.”—Ukusokolola 12:9.

•   Insoka, ishiwi Baibolo ibomfya ilipilibula “Uwa bucenjeshi.”—2 Korinti 11:3.

•   Katunka.—Mateo 4:3.

•   Uwa bufi.—Yohane 8:44.

Satana te bubifi fye ubwaba mu mitima ya bantu

 Bamo bamona ukuti Satana bubifi fye ubwaba mu mitima ya bantu. Lelo, mu Baibolo mwaliba ilyashi umo Lesa alelanshanya na Satana. Lesa alipwililika, kanshi talelanda no bubifi ubwa mu mutima wakwe. (Amalango 32:4; Yobo 2:1-6) Na kabili, Satana alitunkile Yesu, ushakwete ulubembu. (Mateo 4:8-10; 1 Yohane 3:5) Kanshi Baibolo ilanga ukuti Satana e ko aba, te bubifi fye ubwaba mu mitima ya bantu.

 Bushe tulingile ukupapa ifi abengi bashasumina ukuti Satana e kwaba? Awe, pantu Baibolo itila Satana alabomfya ubucenjeshi pa kufikilisha amapange yakwe. (2 Tesalonika 2:9, 10) Inshila imo abomfya ya kupofwisha abengi pa kuti beishiba ukutila e ko aba.—2 Korinti 4:4.

  Ubufi: Lusifa lishina na limbi ilya kwa Satana.

 Icishinka: Ishiwi lya ciHebere ilyo bapilibula mu ma Baibolo yamo ati “Lusifa” lipilibula ukuti “uubalika.” (Esaya 14:12) Ifikomo fyabalilapo filanga ukuti ili ishiwi lilosha ku Shamfumu sha bena Babiloni, isho Lesa ali no konaula pa mulandu wa cilumba. (Esaya 14:4, 13-20) Ishiwi lya kuti “uubalika” balelibomfya ku kupumya ishamfumu sha bena Babiloni ilyo babacimfishe.

  Ubufi: Lesa e ubomfya Satana pa kupingula abantu.

 Icishinka: Satana te mubomfi wa kwa Lesa, mulwani wakwe. Satana Kaseebanya alakaanya abantu ababombela Lesa kabili alababepesha.—1 Petro 5:8; Ukusokolola 12:10.