Ndefwaisha Ukwisabeba Ati, “Bonse E po Tuli!”

Uwashimika ili lyashi ni Abigail Austin

Bushiku bumo mu April 1995, ninshi na buca na bwino, twapangene na bamo mu cilonganino cesu ica Inte sha kwa Yehova ukuyashimikila akasuba konse ku ncende sha mu ma farmu mu England. Twaendele mu mabumba mabumba. Abakalamba bandi ba Sarah, na bacibusa besu ba Deborah, e lyo na batata na bamayo twaendele pamo muli motoka imo e lyo bambi nabo baendele pamo mu myotoka shimbi. Lelo mukupumikisha fye, kwaishile motoka iyalebutuka sana, yaishile ku lubali twali no kupunka motoka yesu. Nine fye napuswike. Pali iyi nshita nali fye ne myaka 9.

PA NUMA ya milungu ibili e lyo napuputwike pantu pali iyi yonse inshita nalifwile icipuupu. Icipanga candi calisansawike, badokota balimbikile utushimbi utwingi mu mutwe pa kutila icipanga cikatane. Nangu cali ifi, nalipolele bwangu. Balupwa basukile banjeba ifyacitike, lelo nshasumine ifyo banjebele. Naletontonkanya ukuti abafyashi bandi no mukalamba wandi bafwile balishile mu kumpempula ilyo nali mu cipatala ninshi nalifwa icipuupu, kabili nalefuluka sana ukubamona. Ilyo nabwelelemo ku ng’anda e lyo nasumine ukutila ca cine balifwa. Nalyumfwile ububi nga nshi.

Nomba finshi fyangafwile ukushipikisha?

Abafyashi E Balengele Ukuti Nkose mu Kupepa

Twafyelwe 5, ine nine nali kasuli. Ilyo ubu busanso bwacitike, ba Sarah bali ne myaka 22, ba Shane bali na 20, ba Jessica bali na 17 e lyo Luke ali na 15. Abafyashi besu bali abasuma nga nshi kabili baletusakamana bwino. Batata ba Steve bali ni baeluda mu cilonganino ca Inte sha kwa Yehova ica West Yorkshire mu Shipley. Aba mu cilonganino balibatemenwe nga nshi pantu lyonse balebika amano ku fyo bambi balefwaya ukulanda nabo kabili balebafwa no kubafwa. Bamayo ba Carol nabo balibatemenwe sana mu cilonganino pantu balesunga bwino abakote bonse abali mu cilonganino. Balitemenwe ukupekanishisha ifwe fwe baice amaparte kabili baletwafwa ukusanga ifibusa fisuma. Pa ng’anda pa mwesu paleisa sana abeni. Abafyashi besu batufundile ukuba ne cikuuku e lyo no kulalangulukilako abena mupalamano besu.

Cila cungulo pali Citatu twalesambilila Baibolo ngo lupwa. Limo limo twalecita ifilangililo fya mu Baibolo kabili twalefwala ne mikansu nga ilya abalembwa mu Baibolo balefwala. Ilyo twali fye abaice, bamayo na batata baletusambilisha ifya kupekanya ukulongana ne fya kushimikila abantu twalesanga pa mayanda ifyaba mu Baibolo. Nangu ca kuti abafyashi besu balikwete ifya kucita ifingi pa kuti batusakamane fwe bana basano, baleba na ifwe inshita iikalamba kabili baletwafwa ukukosha bucibusa bwesu na Yehova.

Ilyo ba Sarah, ba Shane, na ba Jessica bapwile amasukulu batendeke bupainiya, ukulashimikila inshita iikalamba, na ba Deborah nabo e fyo bacitile. Ba Sarah na ine twaleumfwana sana. Bali kwati ni mayo kabili nga naisala isukulu twalebombela pamo ukwafwa bambi ukusambilila Baibolo. Isho inshiku shaliweme nga nshi. Nalemona ifyo bapainiya bonse bali aba nsansa kabili naletemwa ukuba na bena. Nalepanga ukuti nga napwisha isukulu nkalabombela pamo na ba Sarah bupainiya.

Ilingi line mu nshiku sha mwikalwe, ulupwa lwesu pamo na bambi mu cilonganino twalecitila ifintu pamo. Ici calengele ifwe fwe baice na bakalamba ukutemwana e lyo no kuba ifibusa. Ala mwandini nshaishibe ukuti ifi fibusa fisuma fyali no kwisangafwa no kunsansamusha ku ntanshi!

 Ifyacitike pa Numa ya Busanso

Ilyo nafumine mu cipatala, nabwelelemo ku ng’anda ku mwesu. Ba Shane na ba Jessica balebombesha pa kutusakamana ifwe bonse, pantu balebomba incito ya nshita inono e lyo pa nshita imo ine balebomba na bupainiya.

Ba Nte banensu abengi abali mu cilonganino mu mwesu nabo bene baletwafwa. Aba bantu balitwafwile icine cine! Baletupeela ifya kulya, ukutuwamisha ing’anda, ukutushitila ifyo twalekabila e lyo no kutucapila ifya kufwala ukufikila fye ilyo twali na maka ya kucita ifi fyonse fweka. Ala twalitashishe nga nshi! Twalepokelela ifya bupe ifingi e lyo na makardi ukufuma kuli bamunyinefwe abali mupepi e lyo na bali ku fifulo fimbi. Ici calangile fye apabuuta ukuti mu kuteyanya kwa kwa Yehova twalitemwana cine cine.

Pa numa ya mwaka umo, bandume yandi na nkashi inandi bapingwilepo ukuti nalekabila ukuba mu lupwa ulwa kuti balensakamana bwino. Indupwa shimo abali ne cikuuku mu cilonganino cesu batile kuti batemwa ukunsunga. Abakalamba bandi balitontonkenyepo sana no kusala ulupwa, ulwali no kunkusha bwino no kusambilisha pali Lesa, ulo na bamayo na batata ababapo nga e lo basalile. Casangilwe ukuti kwali ulupwa lumo ulwamoneke ukuti, kuti lwansakamana bwino sana. Ba Billy abali baeluda mu cilonganino cesu na bena mwabo ba Dawn, bali fibusa sana no lupwa lwesu kabili balikwete umwana uwa myaka isano Lois. Balimpokelele mu ng’anda mu mwabo kabili ukutula fye ilya nshita balansunga bwino kwati fye mwana wabo uwa kuifyalila. Nangu ca kutila Lois ena aba bafyashi bakwe, tatala omfwapo akaso ukuti na ine balansakamana kabili ukufikila fye na lelo tulomfwana sana kwati twafyalwa fye inda imo.

Ifyo Nashipikishe

Pa kubalilapo fye naletontonkanya umulandu ubusanso bwa musango yu bwacitikile ulupwa lwesu, pantu batata, bamayo, ba Sarah, na ba Deborah balitemenwe sana Yehova e lyo na bantu bambi. Lelo naibukishe ilyashi lya kwa Yobo uwacetekele sana Lesa te mulandu ne fyo alufishe abana bakwe. (Yobo 1:19, 22) Natontonkenye ukuti, ‘Pa kubalilapo fye Satana aletele amacushi ne mfwa mu calo, kanshi kuti atemwa nga ca kuti ubu busanso bwalenga twaleka ukubombela Lesa.’ (Ukutendeka 3:1-6; Ukusokolola 12:9) Na kabili naibukishe ukuti Yehova alitutemwa, alitulaya no kuti akabuusha abafwa. (Yohane 5:28, 29) Mu paradaise iikaba pano pene pe sonde, nkesamonana no lupwa lwendi e lyo na ba Deborah! Ilyo naletontonkanya pa fyo cikaba mu paradaise e lyo naletemenwako sana Yehova.

Nga nasanga abantu abakwata amacushi napitamo, ndomfwa sana ubulanda nga ca kuti tabaumfwapo ubulayo bushaiwamina ubwa kubuuka ubwaba mu Baibolo. Apo Yehova e lyo ne cilonganino cakwe e balenga tushipikishe muli aya macushi yonse, na ine ndafwaya ukwebako bambi pali ili isubilo.

Nalimo icatucitikila kuti calenga abafyashi bamo ukuipusha abati, ‘Bushe twalisambilisha bwino abana besu pali Yehova ica kuti nangu twalifwile bakatwalilila ukumubombela?’

Ncita ifintu kwati fye bamayo na batata e po baba. Nalishiba ukuti nga ca kuti e po bali nga balefwaya ukuti ndebombesha sana ukwafwa bambi nga filya fine nabo balecita. Ukutula fye apo napwishisha isukulu ndabomba bupainiya kabili Lois nao alitampa bupainiya kabili tubombela pamo. Bandume yandi balyupa e lyo na nkashi yandi na o alyupwa, bonse babombela Yehova ne nsansa mu filonganino baba.

Ndefwaisha ukwisamona icalo cipya ica kwa Lesa e lyo no kwisamona uko abantu bakabuuka! Ilya inshita takwakabe ukukalipwa nelyo ukufwa. (Ukusokolola 21:3, 4) Apo nalishiba ukuti tukaba bonse pamo na kabili, cilanenga ukutwalilila ukucita ifyo ndecita pali ino nshita te mulandu na mafya. Ndefwaisha nga nshi ukwisakumbatila bamayo, batata, na ba Sarah na ba Deborah no kubeba ati, “Bonse e po tuli!”

[Icikope pe bula 18]

Uwa bubili ukufuma ku kuso e Abigail, ali no lupwa ulumusunga