Cinshi Yehova Afwaya Ukuti Tulecita?
Palameni Kuli Lesa
Cinshi Yehova Afwaya Ukuti Tulecita?
INSHITA shimo cilafya sana ukupingulapo nampo nga tulingile ukumfwila umuntu nelyo ukukanamumfwila. Nga ca kuti umukalamba wa ncito alikalipa sana kabili alapatikisha abantu ukubomba mu kucilamo, ilingi line abantu tababomba no mutima onse. Nomba abapepa Yehova Lesa bena, bamupepa fye no mutima onse. Mulandu nshi? Pa kuti twasuke ici cipusho, natubelenge amashiwi yalandile Mose ayaba pa Amalango 10:12, 13. *
Ilyo Mose alepwisha ukulondolola ifyo Lesa ale-enekela abena Israele ukucita, aipwishe icipusho cacindama ica kuti: “Cinshi Yehova Lesa wenu alefwaya kuli imwe?” (Icikomo 12) Lesa alikwata insambu ya kutweba ukucita fyonse ifyo alefwaya. Pantu na kuba, e Shikulu Mulopwe, e watupangile kabili e utusakamana. (Amalumbo 36:9; Esaya 33:22) Yehova alikwata insambu ya kutweba ukuti tulemunakila. Lelo, tatupatikisha ukumunakila. Nomba cinshi Yehova afwaya ukuti tulecita? Afwaya ukuti tube ne “cumfwila ica kufuma ku mutima.”—Abena Roma 6:17.
Cinshi cingalenga ukuti tuleumfwila Lesa ukufuma pa nshi ya mutima? Cimo icingalenga ni cilya Mose alandile ilyo atile: ‘Muletiina Yehova Lesa wenu.’ * (Icikomo 12) Uku te kutiina ukukandwa nga twakaana ukumumfwila, lelo kutiina pa mulandu wa kuti twalimucindika kabili tulafwaya ukucita ifyo atweba. Nga cine cine tulatiina Lesa ukufuma pa nshi ya mutima, tatwakulacita ifingamukalifya.
Nomba mulandu nshi uukalamba uo tulingile ukubela ne cumfwila kuli Lesa? Mose atile: ‘Muletemwa Yehova Lesa wenu kabili mulemubombela no mutima wenu onse no mweo wenu onse.’ (Icikomo 12) Ukutemwa Lesa te kulanda fye ukuti nalimutemwa. Icitabo cimo cilondolola ukuti: “Ishiwi lya ciHebere ilya kutemwa inshita shimo lipilibula ukutemwa kwa kuti wacitapo na fimo.” Ici cine citabo citila ukutemwa Lesa kwalola mu kuti “twacitapo na fimo ifya kulanga ukuti twalimutemwa.” Aya mashiwi yalolele mu kuti, nga twalitemwa Lesa icine cine tukalacita ifintu ifyo twaishiba ukuti e fyo afwaya.—Amapinda 27:11.
Ni muli finshi twinganakila Lesa? Mose atile: “Mule-enda mu nshila shakwe shonse.” (Icikomo 12) Yehova afwaya ukuti tulecita fyonse ifyo atweba ukucita. Bushe ukunakila Lesa muli fyonse kuti kwalenga ifintu ukutubipila? Awe nakalya.
Nga tuleumfwila Lesa no mutima onse, tukapaalwa nga nshi. Mose alembele ati: ‘Mulekonka amafunde ya kwa Yehova . . . ayo ndemweba lelo, pa kuti ifintu filemuwamina.’ (Icikomo 13) Cine cine, amafunde ya kwa Yehova yonse, na fyonse ifyo atweba ukucita, fyabelako ukuti ifintu filetuwamina. Ifyo Lesa atweba ukucita te kuti filenge ifintu ukutubipila nakalya! Baibolo itila “Lesa kutemwa.” (1 Yohane 4:8) E ico kanshi amafunde Lesa atupeela yalenga ukuti tulemwenamo ino nshita na ku ciyayaya. (Esaya 48:17) Ukucita fyonse ifyo Yehova atweba, kuti kwatucingilila ku mafya ayengi pali ino nshita kabili kuti kwalenga twaisakwata amapaalo ya muyayaya ilyo Ubufumu bwakwe bukalateka. *
Yehova nga atweba ifya kucita, kwaba fye icintu cimo ico tulingile ukucita. Tulingile ukumumfwila no mutima onse. Nga twaba ne cumfwila kuli Yehova e lyo tukapalama sana kuli ena pantu ni Lesa uwaba ne citemwiko, uufwaya fye ukuti ifintu filetuwamina lyonse.
[Amafutunoti]
^ para. 1 Nangula aya mashiwi Mose alandile ale-eba abena Israele ba kale, na pali ino ine nshita kuti ya-afwa bonse abafwaya ukusekesha Lesa.—Abena Roma 15:4.
^ para. 3 Mwi buuku fye lyonse ilya Amalango, Mose alilandile sana pa kutiina Lesa, ukuti ababomfi ba kwa Lesa balingile ukumutiina muli fyonse ifyo balecita mu mikalile yabo.—Amalango 4:10; 6:13, 24; 8:6; 13:4; 31:12, 13.
^ para. 6 Nga mulefwaya ukwishibilapo ifyebo na fimbi, belengeni icipandwa 3 icitila, “Bushe Lesa Afwaya Isonde Ukuba Shani?,” mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.