Sambilileni Icebo ca kwa Lesa

Mulandu Nshi Abena Kristu Babatishiwilwa?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe ulubatisho lwa Bena Kristu lwalola mwi?

Ulubatisho e nshila tulombelamo Lesa ukuti tube ifibusa fyakwe. Kanshi Umwina Kristu afwile ukubatishiwa ninshi nakula ica kutila kuti asambililila pali Lesa no kuba umusambi wa kwa Yesu, te lintu ali akanya iyo. (Imilimo 8:12; 1 Petro 3:21) Tuba abasambi ba kwa Yesu nga twasambilila e lyo no kulakonka ifyo alanda.—Belengeni Mateo 28:19, 20.

Mu nshiku sha batumwa ba kwa Yesu, abantu abengi tabashingashingile ukusambilila pali Lesa na Yesu. Ku ca kumwenako, ilyo umuntu umo asambilile ukuti imfwa ya kwa Yesu yalileta ipusukilo, apo pene fye asangwike umusambi wa kwa Yesu. Muno nshiku, abantu abengi abafwaisha ukwishiba icine balipingulapo ukuba abasambi ba kwa Yesu.—Belengeni Imilimo 8:26-31, 35-38.

2. Mulandu nshi Yesu abatishiwilwe?

Yesu ali ne myaka nalimo 30 ilyo Yohane Kabatisha amubatishe pa kumutumpika mu menshi mu Mumana wa Yordani. Ulubatisho lwa kwa Yesu lwalepilibula ukuti alipingwilepo ukulacita ukufwaya kwa kwa Lesa. (AbaHebere 10:7) Ici casanshishemo ukufwa pa kuti alubule abantunse ku lubembu. Na lintu ashilaisa pano isonde, Yesu alitemenwe Wishi, Yehova, kabili lyonse fye alemumfwila.—Belengeni Marko 1:9-11; Yohane 8:29; 17:5.

  3. Mulandu nshi Abena Kristu balingile ukubatishiwilwa?

Ifwe twalipusanako na Yesu, pantu tuli babembu. Na lyo line, imfwa ya kwa Yesu ilalenga twaba ifibusa fya kwa Lesa. (Abena Roma 5:10, 12; 12:1, 2) Na kuba kuti twaba pa bantu ababa mu lupwa lwakwe. (2 Abena Korinti 6:18) Kuti twacita shani pa kuti tube mu lupwa lwakwe? Tufwile ukuipeela kuli Yehova mwi pepo, ukumulaya ukuti twakulacita ukufwaya kwakwe ubumi bwesu bonse. Nga twaipeela, tufwile ukubatishiwa, ukulanga apabuuta ukuti twaliipeela.—Belengeni Mateo 16:24; 1 Petro 4:2.

4. Kuti mwacita shani pa kuti mubatishiwe?

Inte sha kwa Yehova balasambilila Baibolo na bonse abafwaya ukupalama kuli Lesa. Ukusambilila Baibolo no kulasangwa ku kulongana kwa Bena Kristu kukalenga ukuti mukatemwe sana Lesa no kumutetekela nga nshi. Kukalenga no kuti mukakwate imibele ne misango iisuma. Ukutemwa sana Lesa, ukumutetekela, e lyo no kuba ne mibele imbi iyo atemwa kukamwafwa ukutwalilila ukubombela Yehova nge fyo mwamulaile ilyo mwaipeele.—Belengeni Yohane 17:3; AbaHebere 10:24, 25.

Nga mulefwaya ukwishibilapo na fimbi, belengeni icipandwa 18 mu citabo citila Bushe Cinshi Baibolo Isambilisha? icalembwa ne Nte sha kwa Yehova.