FRANK mo Jerry tufala i fesem wan problem we plante man oli save long hem. Taem tu man i no agri long wan samting, tufala tugeta i save kam kros long tufala, maet tufala i save talem se hemia i fol blong narawan. Sipos tufala i no kwik blong stretem problem ya, bambae tufala i no moa save fren gud.

Maet yu tu yu bin kasem wan problem olsem. Sipos yes, ating problem ya i mekem yu harem nogud. I tru, yumi evriwan i wantem gat pis mo yumi wantem fren gud wetem ol fren blong yumi, mo ol man we oli stap raonabaot long yumi. ?Olsem wanem yumi save wokem fasin ya, nating sipos yumi no agri long wan samting? ?Yumi gat stret tingting mo yumi rere blong fogivim narafala taem hem i mekem wan samting we i spolem filing blong yumi? ?I gat rod we yumi save folem blong stretem ol trabol blong yumi long fasin we i kaen, we yumi no faet?

Tingbaot trabol we Frank mo Jerry tufala i mekem. Plante taem ol fren oli no save joen gud taem oli gat sam defren fasin bakegen: (1) Jerry i tingbaot hem wan tumas, (2) Frank i toktok wetem Jerry long wan fasin we i mekem Jerry i harem nogud, (3) tufala tugeta i no moa save bos long tingting blong tufala, mo (4) tufala tugeta i no wantem talem sore long tufala.

Afta samtaem i pas, maet tufala i no moa mekem i strong tumas long tufala. Tufala i lego ol nogud tingting blong tufala, mo biaen tufala i mekem pis. ?Wanem i givhan long tufala blong mekem olsem? Tufala i folem sam nambawan rul we oli givhan long plante man blong oli winim ol hadtaem blong olgeta. Be i no hemia nomo, ol rul ya oli save mekem man i fren gud moa, afta we hem i kasem trabol wetem wan fren blong hem.

Ol rul ya, oli stap long Baebol. Oli givhan long yumi blong folem ol fasin we oli save givhan long yumi blong gat pis wetem narafala. Ol fasin olsem waes, sore long man, lav, mo longfala tingting.—Ol Proveb 14:29; 1 Korin 13:4, 5.

 Frank mo Jerry tufala i olsem gudfala eksampol, blong luk olsem wanem Baebol i gat paoa blong jenisim laef blong wan man. I gat plante stori we oli soemaot olsem wanem Baebol i jenisim laef blong ol man we fastaem oli mekem sam rabis fasin. Tingbaot stori blong Robert, we i laef long Ostrelia, we hem i winim fasin ya blong kros bitim mak. Mo stori blong Nelson we hem i wan man Estimo, we hem i sakemaot fasin ya blong no laekem nating narafala, mo hem i fren gud wetem wan man we fastaem tufala i enemi. ?Olsem wanem Baebol i jenisim laef blong tufala ya? Wekap! i askem kwestin long tufala blong faenemaot samting ya.

Mi mi gruap long wan famle we oltaem mifala i rao. Papa blong mi i wan man we i save kros kwik, mo oltaem hem i kilim mi. Samtaem hem i kilim mi gogo mi hafded. From samting ya, taem mi gruap mi gat fasin ya blong faet taem mi kros. Taem mi yangfala, mi spenem tu yia long wan skul we i blong trenem ol man blong oli wokem ol gudfala fasin. Biaen, mi mekem wan nogud fasin, ale oli putum mi long wan rabis kalabus. Taem mi kamaot long kalabus, mi mekem desisen blong go laef long Ostrelia.

?Taem yu jenisim ples, tingting mo fasin blong yu tu i jenis?

I no desisen blong mi we i mekem laef blong mi i jenis. Baebol nao i jenisim laef blong mi, taem mi stadi wetem ol Witnes blong Jehova. Nating se i olsem, mi traehad yet blong blokem fasin ya blong kros kwik. Samtaem tingting blong mi i foldaon mo mi kros bitim mak. Wan dei, mi tingbaot ol tok blong Baebol, we i stap long Ol Proveb 19:11 we i talem se: “Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.” Taem mi tingting dip long vas ya, mi tingbaot samting we i save kamaot sipos yumi gat ol nogud tingting, no yumi talem wan nogud tok, no yumi mekem wan nogud fasin long narafala. From samting ya, sloslo mi stat blong kasem ol stret save, mo gat longfala tingting, mo mi traehad blong fogivim narafala we i mekem i no stret long mi.

?Yu save talem wan eksampol?

Wan dei, wan fren blong mi i kros long mi mo i tok nogud long mi long fes blong ol narafala. Mi mi no minim blong mekem fren ya i harem nogud olsem. Taem fren blong mi i tok nogud long mi, mi mi stap kwaet nomo, mo mi toktok kwaet long hem. Mi folem advaes we i stap long Baebol we i talem se: “Sipos wan man i mekem i nogud long yufala, bambae yufala i no givimbak fasin ya long hem.” Ale, kwiktaem nomo mi go talem sore long hem. (Rom 12:17) Taem tingting blong fren blong mi ya i godaon, mi go luk hem mo mitufala i stori. Biaen mi kasem save se hem i gat sam problem wetem famle blong hem. Ale, mitufala i mekem pis, mo biaen hem i givim wan kot long mi olsem wan presen. Mi mi no bin tingbaot se bambae mi save mekem wan gudfala fasin olsem.

?Yu yu mekem wanem taem i gat trabol long famle?

Mi mo woman blong mi, mitufala i gat wan boe we i gat 20 yia. Olsem ol narafala famle, mifala i gat ol defdefren tingting. Be mi mi lanem plante gudfala fasin, taem mi stadi Baebol. Wan long ol fasin ya, hemia blong talem se, “mi mi sore.” Ol gudfala tok olsem oli save mekem tingting blong man i kwaet, mo i save blokem trabol we i save kamaot, speseli taem famle i no glad long wan samting.

!Yes! Taem mi yangfala, mi joen long wan grup blong politik we mifala i agensem gavman. Mo tu, mi no laekem nating wan grup blong politik pati we oli stap faet from we oli wantem rulum taon blong mifala. From samting ya, mi wantem blong kam wan man blong faet. Ale, mi lanem olsem wanem blong yusum ol tul blong faet, mo mi kilim eni man we i mekem mi kros.

?Wanem i mekem se biaen yu jenisim fasin blong yu?

Mi stat blong stadi Baebol mo mi folem ol tijing we mi lanem. I gat 2 tijing blong Baebol we i tajem hat blong mi. Faswan hemia se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:12) Mo nambatu se: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22:39) Mi makem se Witnes we i stadi Baebol wetem mi, i soemaot lav ya nating se hem i blong wan defren laen, kantri mo hem i toktok wan defren lanwis. Ale, mi wantem kam olsem hem. Biaen tingting blong mi i kamtru, mi save mekem olsem hem. Ol fren blong mi oli sapraes mo oli no moa fraet long mi.

?Samtaem yu mekem ol nogud fasin ya bakegen?

Yes, be i no long fes blong plante man. Samtaem i had blong mi bos long fasin blong kros. Wan taem, mi kros mo mi kilim woman blong mi, afta mi harem nogud bigwan from fasin we mi mekem. Be hem i kaen long mi, mo i fogivim mi. Samting ya i mekem mi bos long fasin blong mi, speseli taem mi kros.

Yu talem se naoia ol man oli no moa fraet long yu. ?Yu save talem wan eksampol?

Yes. Wan dei mi mitim wan man we i holem wan impoten posisen blong wan politik pati, we fastaem mi stap faet agensem olgeta. Nem blong man ya Augusto. Taem mi mitim hem, hem i fraet lelebet long mi, be mi toktok kaen long hem, mo mi talem long hem blong i no tingbaot se mitufala i defren, mo mi singaot hem blong kam long haos blong mi. Hem i glad blong kam, mo hem i sapraes blong luk we fasin blong mi i jenis. Samting ya i pulum Augusto blong i stadi Baebol. Mo naoia mitufala i no jes gud fren, be mitufala i olsem tru Kristin brata.

I gat plante samting we oli joen blong mekem ol trabol ya oli kamaot, mo i had blong man i kasem save. I no evri man we oli gat fasin ya blong fogivim narafala, speseli taem i gat tu defren grup we oli faet agensem olgeta. Nating se i olsem, Baebol i givim wan gudfala advaes we i talem se: “Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.”—Rom 12:18.

Ol man ya we yumi ridim stori blong olgeta, oli soemaot se waes we oli kasem taem oli stadi long Baebol, i save givhan long wan man blong jenisim laef blong hem. Yes, Baebol i gat paoa blong “brekemdaon ol strong ples blong haed blong Setan.” (2 Korin 10:4) Waes blong God we i kamaot long Baebol i save givhan long man. Ol Proveb 3:17, 18, i talem se: “Hem i save mekem laef blong yu i ron gud, nao bambae yu stap gud oltaem long laef blong yu. Ol man we oli holem waestok oli glad oltaem nomo, mo hem bambae i mekem olgeta oli gat laef.”

?Yu yu wantem gat pis oltaem mo kasem moa glad? ?Yu yu wantem fren gud wetem wan man, we neva bambae hem i lego yu taem i gat trabol? Sipos yes, yu no mas ting se i had. Baebol i save soem rod long yu, blong yu folem.