NGAP 1
“M’aye jeñe nyi a nga dimi”
Ntômba ô jañeya. Wo too ô ja’a a mintômba mivok. Ane wo te ke wo kandan a nsamba mintômba ôte’ete’e ôte’etek. Éyoñe ji, ô ntele étam. Alu é nga zu, ô ne mbi’ili été, e vôme betite bevok be ne di wô tyi’ibi. Étune ja bem, ô nga wô’ô tyiñe mba’ale wé a zu a jeñe wô. Éyoñe mba’ale wé a yeneya wô, ane a be’e wô e yôp, a taté na a saé wô, a ke wô abemba e vôme mintômba mivo’o mi né.
YÉHÔVA fe a loene émiene na mba’ale mintômba. E kalate wé été, a jô bia na: “Mamien, ma m’aye jeñe mintômba miam, a m’aye toñe mie.”
“Mintômba ma nyoñe njuk”
Za a ne ntômba Yéhôva? Bi ne jô tyi’ibi na, ntômba Yéhôva ô ne môt a nye’e nye a kañe nye. Kalate Zambe a jô na: “Tameka zuan, nkañan a kumbu si; Zaka bi kutane meboñe si asu Yéhôva Nté wongan: Amu a ne Zambe wongan, a bia bi ne bôte ya ñyanebe wé.” (Besam 95:6, 7) Aval ane ntômba wo tôñe mba’ale wé, bekañe Yéhôva ba tôñe mba’ale wop. Ye be ne zôsôô? Teké’é. É ne kui éyoñ éziñe na, bebo b’ésaé be Yéhôva be bo “ntyamelan,” be bo “njañan,” nge “dimi fé.” (Ézéchiel 34:12; Matthieu 15:24; 1 Pierre 2:25, mfefé nkôñelan) To’o nalé, éyoñe môt a jô’é na minju’u mi kandé nye a Yéhôva aval ane jôme mendime m’awo’otô, Yéhôva a ke ôsu a simesane na a ye beta bulane be nye.
Ye Yéhôva a ngenane fo’o mba’ale wôé? Aval avé Yéhôva a liti na, a ne mba’ale wongane den? Yene mame melale ma:
A ve bia bidi ya nsisim. Yéhôva a ka’a mintômba mié na: “M’aye ve mie bidi bi mbamba ôbut; nne mi aye jô’ôbô mbamba abemba été wôé; a mi aye di mbamba ôbut.” (Ézéchiel 34:14) Yéhôva a vo’o ki kate ve bia abui bidi ya nsisim éyoñe j’ayiane. Ye wo simesan e môse Yéhôva a nga yalane meye’elane môé a zene ya nlô éfia éziñ, nkañete ya mengana bôt, nge ke vidéo? Ye ô nji yen été na, Yéhôva a nyane wo?
A ba’ale bia, a jibi fe bia. Yéhôva a ka’a na a ye ‘bulane wu be nga titan, a tiñeti wu ô nga bu’i, a ve wu ô nga kone ngu.’ (Ézéchiel 34:16) Yéhôva a ve ba be bili ate’e nlem, a ba minleme mi tyele yôp ngul ya jibi. Yéhôva a tiñeti nyô a nga bu’i, a bo na nleme wé ô voé a zene ya bebuni bevok. A tindi nyi a nga kôlô akônda amu mbia b’asimesane, nge nyi a nga kobe zene na a beta bulan.
A wô’ô bia mintaé. Yéhôva a jô mintômba mié na: “Aye nyii mie vôm ase mi nga mane tyamelan,” a beta fe jô na: “M’aye jeñe wu ô nga dimi.” (Ézéchiel 34:12, 16) E mise me Yéhôva, be nji yiane wua ntômba fé éyoñ ô ngenan ô tate. A yeme na, éyoñe ntômba ô jañeya, a yiane ke jeñe wô; a ne meva’a été éyoñ a yeneya wô. (Matthieu 18:12-14) A loene benya bebuni bé na “mintômba miam, mintômba ma nyoñe njuk.” (Ézéchiel 34:31, MN) Ô ne ntômba wua ya été.
E mise me Yéhôva, be nji yiane wua ntômba fé éyoñ ô ngenan ô tate. A ne meva’a été éyoñ a yeneya wô
“Beta’a bo melu mangan mimfefé aval ane melu mvus”
Amu jé Yéhôva a jeñe wo; amu jé a loene fe wo na ô bulane be nye? Amu a yi na ô bo mevak. A ve mintômba mié ngaka’a na: “Aye sôé mie bibotane ane mveñ.” (Ézéchiel 34:26, MN) Ngaka’a te é nji bo évôlevôla. Ényiñe jôé ya môs ôse é litiya wo de.
Simesa’an aval ényiñe jôé é mbe, éyoñ ô nga yeme benya mejôô mfa’a ya étôto’o éyôlé Zambe a ôvañ a bili asu môt a binam. Ô nga wô’ô aya éyoñ ô nga tabe beassemblée a bisulan a bebuni bevok? Aval ava’a ô mbe ô bili éyoñ ô mbe ô kañete bôte mejô me Zambe, a éyoñe be mbe be liti na ba nye’e me. Nga nleme wôé ô mbe meva’a été éyoñ ô mbe ô bulane nda jôé!
Ô ne beta bi meva’a mete. Bebo b’ésaé be Zambe ya melu mvus be nga ye’elane na: “Kôñelane bia be wo, a Yéhôva, a bi aye bo nkôñelan; Beta’a bo melu mangane mimfefé aval ane melu mvus.” (Minyône mi Jérémie 5:21) Yéhôva a nga yalane be, a be nga bulane ke kañe nye. Be nga beta wô’ô avale meva’a be nga bili ôsusua. (Néhémie 8:17) Yéhôva fe a ye bo wo avale da.
Ve é nji bo tyi’ibi na ô bulane be Yéhôva. Bi tame zu yene mame me ne ve jamete ayaé, a aval avé bi ne dañe me.
