A mojañe ya mbunane bia nye’e:

Avale wo yem, Kalate Zambe a kobô ajô befam a binga be mbe be bili ngule mbunan. Be nga tôban avale minju’u bia fe bi atôbane den. “Be mbe mbialan ane bia” (Jacques 5:17) Abui ya été, é mbe é tôbane minju’u mia tyélé be minleme yôp. Bôte bevok be nga bili mintaé nlem amu mejô ya nda bôte, nge ma ya akônda. Minleme mi abui ya été, mi nga ke ôsu a ve be mekua, amu bikobe biap.

Ye bôte bete be nga lume Yéhôva mvus, éyoñe jia ya biyoñe bise? Téké’é. Abui ya été é mbe ane ntili besam, nnye a nga ye’elane na: “Me kobe ya zen aval ane ntômba ô nga dimi, tame jeñe mbo ésaé wôé amu me ne te vuane mebendé môé.” (Besam 119:176) Ye wo fe ô wô’ôtaneya nalé?

Yéhôva a se ngule ya vuane bebo b’ésaé bé ba kôlô mbame mintômba wé. Ve a jeñe be a zene ya bebo b’ésaé bé bevok. Tame yen aval avé Yéhôva a nga volô mbo ésaé wé Job. A nga tôban abui minjuk aval ane njañelan akum, awu ya bôt a mbe a nye’e a ngule ôkon. Job a nga jibi fe mbia bifia ya bôte be mbe na ba yiane ve nye ngule nyôl. To’o Job a nga jô mame me ne te yian, a nji lume Yéhôva mvus. (Job 1:22; 2:10) Aval avé Yéhôva a nga volô nye na a beta bi mbamba minfasan?

Yéhôva a nga volô Job a zene ya monyañe wé ya mbunan, Élihu. Éyoñe Job a nga mane kate mame ma ndeñele nye, Élihu a nga taté kôme vô’ôlô nye ôsusua na a zu yalan. Ye a nga komekane Job nge ve nye mekua na a wô’ô ôson? Ye a nga bili ôsimesane na a dañe Job? Momo! A ngule ya mbamba nsisim, Élihu a nga jô na: “Tame yen, me ne mfa’a ya be Zambe ve avale fe ane ô né, ma fe me ne mboban a metek.” Mvuse ya été nde Élihu a nga ve nye ngule nyôl: “Tame yen, angôndô wom aye bo te ve wo woñ nalé fe ntibane wom wo ye bo te adit be wo.” (Job 33:6, 7) Élihu a nji beta kô’ôlane mintaé Job a nga bili nleme wé été. Ve a nga liti na a nye’e nye, amu a nga ve nye melep a ngule nyôl e mbamba éyoñ. Mvolane Job a mbe a yi, ñwô le.

Bia yi na ô yeme na ôsimesane te, ñwô tin ékôan é nga bili éyoñe é nga tili nsoé kalate wu. Jam ôsu, bi nga taté jeñe na bi yemelan mame me nga bo na abui Bengaa be Yéhôva be mane voé nsisim. (Minkana 18:13) E di baa, bi nga ye’elan a fômbô mintilan. Bi nga yen aval avé Yéhôva a nga volô bebo b’ésaé bé ya melu mvus, éyoñe be nga tele aval été te. Di lale, bi nga nyoñe miñye’elane ya melu mvus; a yen aval avé mi ne volô bekristene ya melu ma. Mam mete mese mme me nga volô bia na bi kuli nsoé kalate wu. Bia ye’elane wo na ô lañe wô. Yeme fe na bia nye’e wo a nleme wongan ôse.

Tin Ékôane Bengaa be Yéhôva