NLÔ AJÔ 11

Aval avé ô ne bu’ubane Kalate Zambe?

Vô’ôlô nkobô

Ye e kuiya wo môs éziñe na wo kômbô taté ésaé éziñ, ve wo yene je ayaé? Asu na é bo wo tyi’ibi, ô ne bo je ôte’ete’ ôte’etek. Nne nlañane Kalate Zambe wo bobane fe nalé. Ve ô ne sili womiene na: ’Nne ñhe mé taté vé?’ Nlô ajô wu wé liti bone be mam be ne volô wo na ô lañ a yé’é Kalate Zambe.

1. Amu jé bia yiane lañe Kalate Zambe môs ôse?

Môt a lañe Bible, nge ke “metiñe me Yéhôva” môs ôse, é bi abui mevak, a mam mese a bo mé wulu mvo’é. (Lañe’e Besam 1:1-3.) Ô ne taté na wo nyoñe bone minut môs ôse asu na ô lañe Kalate Zambe. Ane éyoñ ja ye lôt, wé tu’a nye’e nlañane Kalate Zambe.

2. Jé wo yiane bo asu na Kalate Zambe a bo wo mfi?

Asu na Kalate Zambe a bo wo mfi, wo yiane nyoñ éyoñe ya fase mame wo lañ. Wo yiane lañe Kalate Zambe a bindi nye. (Josué 1:8) Nté wo lañ, sili’i womien minsili mi: ‘Jé jame di da ye’ele ma a lat a Yéhôva Zambe? Aval avé me ne tôñe mam mete ényiñe jam? Aval avé me ne belane bifuse bite asu na me volô bôte bevok?’

3. Éyoñ évé ô ne lañe Kalate Zambe?

Ye e ne wo ayaé na ô bi éyoñe ya lañe Kalate Zambe? Abui ya be bia e tebeya été éte. Jeñe’e na ô “yeme belan éyoñe” jôé. (Beéphésien 5:16, Traduction du monde nouveau) Asu na ô bo de, jeñe’e ngum éyoñ môs ôse na ô lañe Bible. Bôte béziñ be nga tyi’i na ba lañe Bible ndibe ntyé. Bevok ba bo de amôs, éko éziñ éyoñe be bili mon awo’an. Bôte bevo’o ke ba lañe Bible mame ngô’é, ôsusua na ba ke bômbô si. Wo simesane na éyoñ évé é ne bo mvo’é asu dôé na ô lañe Bible?

TUKA’A FAK

Yene’e mam ô ne bo asu na nlañane Kalate Zambe ô bo zam. Yene’e fe aval ô ne yeme kômesane asu na ayé’é Kalate Zambe e bo wo mfi.

Ô ne yé’é na wo nye’e nlañane Kalate Zambe aval ane môt a yembane bidi a ngenane teke tame di, akekui a nye’e bie

4. Yé’é na wo nye’e nlañane Kalate Zambe

Ô ne yen ayaé ya taté na wo lañe Bible, ve ô ne yé’é na wo nye’e nlañane Kalate Zambe aval ane môt a yembane bidi a ngenane teke tame di, akekui a nye’e bie. Lañe’e 1 Pierre 2:2, mvuse ya valé, yala’ane nsili wu:

Ye wo simesane na nge wo lañe Bible môs ôse, jam ete dé so wo mevak, a wé kômbô ke ôsu a bo de mban?

Futi’i VIDÉO asu na ô yen aval avé bôte béziñ be nga taté na ba nye’e nlañane Bible. Mvuse ya valé, yala’ane minsili mi.

VIDÉO: Bisoé bia ye’é nye’e Mejô me Zambe (5:33)

Vidéo ate a liti na bisoé bite bi nga dañe minju’u mivé?
Jé é nga volô be na be ke ôsu a lañe Bible mban?
Jé be nga bo asu na be tu’a nye’e nlañane Bible?

Meleb asu na ô taté nlañane Bible:

Jeñe’e Bible a ne tyi’ibi ya lañ. Ô ne belane Traduction du Monde Nouveau nge a kuiya nkobô wôé, nge ke nkobô ôfe ô ne ngule ya lañ.
Taté’é na wo lañe bifase ya Bible wo dañe nye’e. Ô ne belane nkpwas ô ne nlô ajô na “Lañe’e Bible môs ôse.”
Futi’i ndem asu na ô yeme vôme wo te su’u nlañan. Ô ne belane nkpwase ya kalate nyi ô ne nlô ajô na “Tôñe’e nlañane ya Bible wôé.”
Bela’an application JW Library^®. A ne volô wo na ô lañ nge ke vô’ôlô nlañane Bible a zene ya téléfôn wôé nge minsini mfe.
Bela’ane Beappendice ya Traduction du Monde Nouveau. Wé koone minkpwas a Lexique be ne volô wo éyoñe wo lañe Bible.

5. Kômesa’an ayé’é Bible dôé

Lañe’e Besam 119:34, mvuse ya valé, yala’ane nsili wu:

Amu jé e ne mfi na ô taté ye’elan ôsusua na wo lañe Bible nge ke na wo kômesan ayé’é Bible dôé?

Ô ne bo aya asu na e bo wo mfi ayé’é Bible dôé? Nté wo kômesane nlô ajô éziñe ya kalate nyô, bo’ avale di:

Lañe’e mebeñ m’ôsu ya nlô ajô.
Lañe’e bifuse ya Kalate Zambe bi ne été a jeñe na ô yene nja ô ne zañe bifuse bite a nlô ajô wo yé’é.
Futi’i ndem bifia bia yalane nsili ôse; nalé é volô wo na ô tu’a wô’ô nlô ajô ôte éyoñe mia ñye’ele wôé mii laan.

Ye wo too ô yemek?

Bengaa be Yéhôva ba belan abui minkôñelane ya Bible. Ve ba dañe belane La Bible, Traduction du monde nouveau, amu a ne mbamba nkôñelan, a ne tyi’ibi ya wôk, a éyôlé Zambe é ne été.—Lañe’e nlô ajô ô ne na “Ye Bengaa be Yéhôva be bili Kalate Zambe wop?” anjeñe mefoé dangan.

BÔTE BÉZIÑ BA JÔ NA: “E yé’é Bible a ne angôndô ya ayaé. Me nji bi éyoñ a ngule ya bo de.”