MVUSE Samson, Samuel a nga taté na a tyi’i ayoñe Israël mejô. Émien a mbe nkulu mejô. Ane bone be Israël be nga jô nye na b’ayi njô bôte si jap ane meyoñe mevok. Ja’a na ñyian ôte ô nga ve Yéhova nlem abé, a nga kate Samuel na a bo ane b’ayi. Ane Zambe a nga tobe môt a mbe a sulu émiene si na a bo njô bôt. A mbe jôé na Saül. Ve mvuse ya valé, Njô bôte Saül a nga bete émiene yôp a bo melo. Nde Yéhova a nga jô Samuel na a tobe môte mfe a ye bo njô bôte ya ayoñ Israël. Ane a nga tobe ndômane môt é mbe jôé na David. Ve jame da, abui mimbu é nga lôt asu na David a nyoñ éto njôan.

David a nga ke jome bobenyañe be nga to bezimbi ya nkane bita Saül, éyoñe te a nto mone ésoé ndôman. Nkane bita Saül ôse ô nga to ô ko Goliath woñ. Beta mone bezimbi ate a nga to a bo’o bone be Israël a Zambe wob ase nkpwala. David a nga wô’ô jamete ôlun, ane a nga kañese na a ke wosane a émômôtô ate. David a nga bili ve toloo a mekôk. To’o nalé, mone ésoé ndôman ate a nga ke wosan a Goliath, a nga to bebé meta éla. Amu Goliath a nga biasé nye mis, nde David a nga jô nye na a ne nkômesan a lôte nye. David a nga wosane Goliath a to mebune be Yéhova Zambe! Nde David a nga wôé nye fo’o ve a ôkô’ô wua. Ane a nga tyi’i nye nlô a nyoñe nkpwaté mekône wé. Éyoñe te nkane bezimbi Bephilistin ô nga tube mbil amu be nga ko woñ abui.

Saül a nga taté semé David abui amu beta ayo’o wé. Ane a nga téle nye njô ya nkane bezimbi wé ôse. Ve mvuse ya valé Saül a nga bo David éviele amu David a mbe a wumu abui. Éyoñe David a nga yene na awu é nto nye bebé, ane a nga ke mintubuk tañe mimbu abui. To’o nalé, David a nga ke ôsu a semé Njô bôte Saül amu Yéhova Zambe nye a nga tele nye éto te. Éyoñe Saül a wuya bita, ane David a nga bo njô bôt ane Yéhova a nga jô.

David a nga kômbô na a loñe Yéhova temple. Ve jame da, Yéhova a nga jô David na, mone wua ya mvoñe bôte jé a ye loñe je. Salomon, mone wé, nye a nga lôñe temple ate. Nalé fe Zambe a nga ve David ma’an amu mbamba ôsimesan a nga bi, na a lôñe nye nda; ane a nga bo élat a nye: ajô te bejô bôte ya Israël b’aye so nvoñe bôte jé a dañe menda me bôte mese mevok. Nne fe Nyii bôt, nge ke Mvoñe Zambe a nga ka’ale afup Éden j’aye so été. Mvoñ éte é ne Messie, nge na nyi a ne “Ñwo’ane mbon”, ntobane Zambe ôbien. Yéhova a nga ka’ale fe na, Messie ate a ye bo Njô ya Éjôé jé, nje éte j’aye tabe nnôm éto.

Ane David a nga kôan abui or a cuivre a argent asu melôñe ya temple, amu mbamba nkômban a nga to nye nlem. David a nga beta fe tili abui besam avale Zambe a nga jô nye na a tili. Ôsusua na a wu, David a nga kañese na: “Nsisime Yéhova ô nga kobô a ma, A ôyeme viam ô nga kobô mejô mé.”​—2 Samuel 23:2.

​—Nkañete ôte wo so kalate 1 Samuel; 2 Samuel; 1 Minkañete; Ésaïe 9:7; Matthieu 21:9; Luc 1:32; Jean 7:42.