AVALE BÔTE be nga yametane si, nne fe abé é nga ke nalé. Eyoñe te, nkulu mejô éziñ a mbe éyôlé na Hénoc a mbe a kañe Zambe étame si se. A mbe a kate bôte bese na, éyoñe j’azu, nje Yéhova a ye mane wôé mbia be bôt. Ja’a nalé, abé é nga to ve nenenen. Beéngele béziñe be nga lume Yéhova mvus a li’i étaba’a jap e yôp été. Be nga suane si a jaé menyôle me bôt a lu’u binga, a biaé bon. Bone bap be mbe mingugul. Be mbe be loene be na Benephilim. Mimbañe mi bôte mite mi nga jalé si a éngôgôm. Ane Zambe a nga wô’ô nlem abé amu si jé é nga mane ndaman.

Éyoñe Hénoc a wuya, môte wua a nga to a sela’ane mbia be bôte ya éyoñe te. A mbe éyôlé na Noé. Noé a nda bôte jé be nga bo mame me ne mvaé mise me Zambe. Éyoñe Zambe a nga tyi’i na a mane wôé mbia be bôte bese, a nga kômbô nyii Noé a betite bese ya si. Nde Zambe a nga jô nye na a lôñe arche. Arche a nga to ane beta éwolo. Nne Noé a nda bôte jé ése a avale tit ése b’aye nyii été na be nyiñe Ndône mendim. Noé a nga bo Zambe mewôk, nde a nga lôñe arche tañe mimbu 40 nge 50. Nté ôte ôse, a nga to fe “nkate foé ya mame ya zôsô.” (2 Pierre 2:5) A nga bemene bôt ajô ya Ndône mendim, ve be nga bo melo. Éyoñ é nga kpwane na Noé a nda bôte jé a betite bese be nyii arche été, ane Zambe a nga dibe mbé ya arche. Nde mveñ é nga taté nnoñan.

Mbia ngule mveñ a nga nnoñe si tañe mimôse 40 a melu 40, akekui si se é nga mane jañe mendime si. Ane mbia be bôte be nga mane wu. Éyoñe bengone be lôteya, mendime me nga se’eban ôte’ete’e ôte’etek, a zu kui éyoñ arche a nga zu sa’abe abôbône nkôl. Noé, a mvoñe bôte jé, a betite bese be mbe arche be mbe ngule ya kui nseñ ataté éyoñe te. Nne éto ya arche é nga mane valé. Ane Noé a nga ve Yéhova metuna’a asu mvean akéva. Zambe a nga yalane Noé a nda bôte jé ése, a ve be ngaka’a na, teke môs ôfe a ye beta zu Ndône mendim é zu wôé bôte ya si. Ajô te Yéhova a nga ve be ndem, nje é mbe ndudum, ndemben b’aye simesane mbamba ngaka’a wé.

Éyoñe Ndône mendim é lôteya, Zambe a nga beta ve bôte mimfefé metiñ. A nga ve be ngule ya di tit. Ve jame da, a nga tyili be ndiane metyi. A nga beta fe jô mvoñe bôte Noé na be mialan a si se; ve bevo’o ya été be nga bo njôan ôte melo. Ane Nimrod a nga futi bôt éjôé jé si. Ane be nga loñe beta ôzomezome nda étisone Babel. É nga loenebane mvuse ya valé na Babylone. Nsôñane wop ô nga to na be tyame njôane Zambe ô mbe na be yametane si se. Ve Zambe a nga jo’otane minkobô zañe jap; môte te fe wô’ô jôme nyi mbo’ a jô. Éyoñe jo’ojo’o ate a kuiya, ane bese be nga mane fias ajô ya nlôñane beta nda ate. Ane môt ase a nga yale zene jé.

​—Nkañete ôte wo so kalate Metata’a kabetôlô 6 akekui 11; Jude 14, 15.