ANG mangloy (Copiphora gorgonensis) sa kasagbotan sa South America dunay dalunggan nga dili moabot ug usa ka milimetros ang gitas-on, pero ang obra niini kaamgid sa dalunggan sa tawo. Ang insekto makaila ug lainlaing mga frequency sa sound gikan sa lagyong mga distansiya. Pananglitan, kini makaila sa kalainan sa tingog sa laing mangloy ug sa ultrasound nga ipagawas sa kuwaknit nga nangitag makaon.

Hunahunaa: Ang dalunggan sa mangloy anaa sa iyang duha ka pangunahang tiil. Sama sa dalunggan sa tawo, ang dalunggan sa mangloy mosagap ug sound, ug ang sound nga masagap usbon, ug dayon analisahon ang frequency niini. Apan ang mga siyentista nakadiskobre nga dunay talagsaong organo sa sulod sa dalunggan niini—usa ka pressurized nga lungag nga punog pluwido nga ang hitsura morag ininat nga paburot. Kini nga organo, nga ilang gitawag ug acoustic vesicle, samag obra sa cochlea sa mammal pero mas giming. Ang acoustic vesicle maoy nakahatag sa mangloy ug talagsaong igdulungog.

Si Propesor Daniel Robert, sa School of Biological Sciences sa University of Bristol sa United Kingdom, miingon nga kini nga impormasyon makatabang sa mga inhenyero sa “pag-imbento ug sinundog gikan sa kinaiyahan nga hearing device nga mas gamay ug mas tukma.” Ang mga siyentista nagtuo nga magamit gayod kini diha sa mas high-tech nga ultrasonic nga teknolohiya sa inhenyeriya, lakip na sa mga imaging system sa mga ospital.

Unsay imong hunahuna? Ang talagsaon bang igdulungog sa mangloy mitungha lang pinaagig ebolusyon? O kini ba gidisenyo?