Niadtong 2011 sa Italy, ang nahalin nga bisikleta mas daghan kay sa awto. Tingali tungod kini sa krisis sa ekonomiya, mahal nga gasolina, ug gastoso nga pagmentinar ug awto. Sa laing bahin, ang bisikleta dili mahal mentinahon, dali gamiton, ug mas kombenyente.

Ang European Court of Human Rights nagpakanaog ug desisyon nga gilapas sa gobyerno sa Armenia ang katungod sa 17 ka batan-ong lalaki, tanan mga Saksi ni Jehova, kinsa gipriso tungod sa pagdumili sa pagserbisyo sa komunidad ubos sa pagdumala sa militar. Ang gobyerno giobligar sa pagbayad ug danyos ngadto sa 17 ka batan-on ug sa nagasto labot sa kaso.

Tali sa mga bata nga nabiktima sa krimen tungod sa mga social networking site, 63 porsiyento kanila wala mapasidan-i sa ilang ginikanan bahin sa mga kapeligrohan niini. Sa 599 ka kaso nga gisusi, 74 porsiyento sa mga gidudahang tigmolestiya miadmitir nga gigamit nila kini nga mga website aron makapamiktima ug mga bata.

Aron mamenosan ang trapik, gilimitehan sa dagkong mga siyudad ang pagparehistro ug bag-ong mga sakyanan. Pananglitan sa Beijing, 240,000 ka plaka lang ang ilang ihatag kada tuig. Niadtong Agosto 2012, mga 1,050,000 ka tawo ang nangaplay para sa 19,926 ka plaka, nga giapod-apod pinaagig raffle. Sa ato pa, 1 lang kada 53 ka aplikante ang makakuhag plaka.