Ikatulo: Ang Tanang Maayong Tawo Moadto sa Langit

Unsay sinugdanan niining tinumotumong pagtulon-an? Sa sinugdan sa ikaduhang siglo C.E., pagkamatay sa mga apostoles ni Jesus, ang mga Amahan sa Simbahan nahimong inila. Sa pagbatbat sa ilang mga pagtulon-an, ang New Catholic Encyclopedia (2003), Tomo 6, panid 687, nag-ingon: “Ang kasagarang gitudlo mao nga human maputli ang kalag nga nabulag gikan sa lawas sa tawong namatay, kini mosaka dayon sa langit.”

Unsay giingon sa Bibliya? “Malipayon ang mga malumog-buot, sanglit sila magapanunod sa yuta.”—Mateo 5:5.

Bisag gisaaran ni Jesus ang iyang mga tinun-an nga siya ‘mag-andam ug dapit’ alang kanila sa langit, iyang gipaila nga dili tanang matarong moadto didto. (Juan 3:13; 14:2, 3) Dili ba nga siya nag-ampo nga ang kabubut-on sa Diyos matuman unta “sa langit, mao man usab sa yuta”? (Mateo 6:9, 10) Sa pagkatinuod, usa sa duha ka ganti ang maangkon sa mga matarong. Ang limitadong gidaghanon moadto sa langit aron magmando kauban ni Kristo, ug ang kinabag-an magpuyo sa yuta sa walay kataposan.—Pinadayag 5:10.

Sa lakat sa panahon, nausab ang panglantaw sa simbahan bahin sa papel niini dinhi sa yuta. Unsay resulta? “Ang simbahan inanayng mipuli sa gilaomang Gingharian sa Diyos,” matod sa The New Encyclopædia Britannica. Ang simbahan nagpalig-on sa gahom niini pinaagi sa pag-apil-apil sa politika, ug kini wala magtagad sa tin-awng mga pulong ni Jesus nga ang iyang mga sumusunod ‘dili angayng makigbahin sa kalibotan.’ (Juan 15:19; 17:14-16; 18:36) Tungod sa pag-impluwensiya sa Romano nga si Emperador Constantino, gisagolan sa simbahan ug tinumotumong mga doktrina ang pipila sa mga pagtulon-an niini, ug ang usa niana naglangkit sa kinaiyahan mismo sa Diyos.

Itandi ang mosunod nga mga teksto sa Bibliya: Salmo 37:10, 11, 29; Juan 17:3; 2 Timoteo 2:11, 12

KAMATUORAN:

Ang kadaghanan sa maayong mga tawo magpuyo sa yuta sa walay kataposan—dili sa langit

[Picture Credit Line sa panid 6]

Art Resource, NY