Armagedon—Unsay Giingon sa Pipila Bahin Niini?

“Unya, gitigom sila sa dapit nga [sa Hebreo] ginganlag Armageddon.”​—⁠REBELASYON 16:​16, Biblia sa Kristohanong Katilingban.

UNSAY imong mahunahunaan kon madungog nimo ang pulong nga “Armagedon”? Lagmit mosantop sa imong hunahuna ang dagkong kalamidad. Bisag kas-a lang makita sa Bibliya kining pulonga, kini balikbalik nga gihisgotan sa mga balita ug sa mga lider sa relihiyon.

Ang gituohan ba karon sa kadaghanan bahin sa Armagedon nahiuyon sa gitudlo sa Bibliya? Hinungdanong mahibaloan ang tubag niana. Ngano? Kay ang kamatuoran bahin sa Armagedon makapahigawas nimo sa dili-angayng kahadlok, makatabang sa pagbatog positibong panglantaw sa umaabot, ug makaimpluwensiya sa imong panghunahuna bahin sa Diyos.

Tagda ang mosunod nga tulo ka pangutana, ug itandi ang gituohan sa kadaghanan bahin sa Armagedon sa kon unsay tinuod nga gitudlo sa Bibliya.

  1. ANG ARMAGEDON BA MAOY KATALAGMANG GIPAHINABO SA TAWO?

Ang mga reporter ug tigdukiduki sagad naggamit sa pulong nga “Armagedon” sa paghubit sa mga kalamidad nga gipahinabo sa tawo. Pananglitan, ang Gubat sa Kalibotan I ug II gitawag ug Armagedon. Human niadtong mga gubata, ang mga tawo nabalaka nga basig gamiton sa United States ug Soviet Union ang atomikong hinagiban batok sa usag usa. Ang media nagtawag nianang posibleng paggubatay ingong Armagedon nga gipahinabo sa nukleyar nga mga hinagiban. Karon, ang mga tigdukiduki nga nahadlok nga ang polusyon magpahinabog dakong kausaban sa klima sa yuta nagpasidaan bahin sa nagsingabot nga “Armagedon nga ipahinabo sa klima.”

Ang gipasabot sa ilang paghubit: Nagdepende sa tawo ang kaugmaon sa yuta ug sa tanang kinabuhi diha niana. Kon ang mga gobyerno dili molihok nga maalamon, ang yuta permanenteng madaot.

Ang gitudlo sa Bibliya: Dili motugot ang Diyos nga laglagon sa tawo ang yuta. Ang Bibliya nagpasalig kanato nga si Jehova * wala maglalang sa yuta “sa wala lamay kapuslanan.” Hinunoa, siya nag-umol niini “aron pagapuy-an.” (Isaias 45:18) Inay tugtan ang mga tawo nga bug-os maglaglag sa yuta, ang Diyos ‘magalaglag sa mga nagalaglag sa yuta.’​—⁠Pinadayag 11:⁠18.

2. ANG ARMAGEDON BA MAOY KINAIYANHONG KATALAGMAN?

Ang mga reporter mogamit usahay sa pulong nga “Armagedon” alang sa dagkong kinaiyanhong katalagman. Pananglitan, sa 2010, ang usa ka report naghisgot bahin sa “‘Armagedon’ sa Haiti.” Gihubit niini ang pag-antos, kadaot, ug pagkakalas sa kinabuhi tungod sa grabeng linog nga miigo nianang nasora. Ang mga reporter ug tighimog pelikula naggamit niana nga termino dili lang sa mga panghitabo sa nangagi kondili usab nianang sa ilang gikahadlokang mahitabo pa. Pananglitan, ilang gigamit ang pulong nga “Armagedon” sa paghubit sa ilang gihunahunang epekto sa asteroid nga mahagsa sa yuta.

Ang gipasabot sa ilang paghubit: Ang Armagedon maoy sulagmang panghitabo nga makapatay bisan sa mga inosente. Wala kay mahimo sa pagpanalipod sa imong kaugalingon.

Ang gitudlo sa Bibliya: Ang Armagedon dili sulagmang panghitabo nga makapatay kang bisan kinsa. Hinunoa, sa Armagedon, ang mga daotan lang ang mapapha. Ang Bibliya nagsaad nga sa dili madugay “ang daotan mawala na; ug pagasusihon mo gayod ang iyang dapit, ug siya mawala diha.”​—⁠Salmo 37:⁠10.

3. LAGLAGON BA SA DIYOS ANG YUTA SA ARMAGEDON?

Daghang relihiyosong tawo ang nagtuo nga duna unyay kataposang panag-away tali sa maayo ug daotan nga moresulta sa pagkalaglag sa atong planeta. Gipakita sa usa ka surbi nga gihimo sa United States sa Princeton Survey Research Associates nga 40 porsiyento sa mga hamtong ang nagtuo nga ang kalibotan matapos sa “usa ka gubat sa Armagedon.”

Ang gipasabot sa ilang pagtulon-an: Ang tawo wala lalanga aron mabuhi sa yuta sa walay kataposan,  ni ang yuta gidisenyo nga magpabilin hangtod sa hangtod. Ang Diyos naglalang sa tawo sa tuyo nga silang tanan mangamatay ra pag-abot sa panahon.

Ang gitudlo sa Bibliya: Ang Bibliya tin-awng nag-ingon nga “gitukod [sa Diyos] ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.” (Salmo 104:⁠5) Mahitungod sa mga molupyo sa yuta, ang Bibliya nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”​—⁠Salmo 37:⁠29.

Tin-aw nga kasukwahi sa gitudlo sa Bibliya ang gituohan sa kadaghanan karon bahin sa Armagedon. Busa, unsa man gyoy tinuod?

[Footnote]