Kanus-a Mahitabo ang Armagedon?

“Nakita ko, ug, tan-awa! usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan . . . ang nakalabang sa dakong kasakitan.”​—⁠PINADAYAG 7:​9, 14.

HAPIT nang mahitabo ang gubat sa Armagedon. Nganong makaingon ta niana?

Naglungtad na ang tibuok-kalibotang asosasyon sa katawhang nag-alagad kang Jehova ug nagkinabuhi sumala sa hataas nga moral nga sukdanan sa Bibliya. Sa tabang sa Diyos, minilyon gikan sa tanang kanasoran, tribo, ug pinulongan ang nagkatigom sa usa ka nahiusa ug mahigugmaong panag-igsoonay. Kana nga panag-igsoonay naglungtad taliwala sa mga Saksi ni Jehova.​—⁠Juan 13:⁠35.

Sa dili madugay, tigomon ni Satanas ang iyang mga puwersa ug himoon ang kinadak-ang pag-atake niining malinawon ug daw way-panalipod nga katawhan. (Ezequiel 38:​8-12; Pinadayag 16:​13, 14, 16) Nganong makaseguro ka niana? Gihubit sa Bibliya ang espesipikong mga panghitabo nga motabang nato sa pagkahibalo kon kanus-a mahitabo ang Armagedon. Daghan niana ang nagakatuman na.

Mga Panghitabo nga Nagakatuman Na

Ang mga tinun-an ni Jesus nangutana kon sa unsang paagi mahibaloan nga haduol na ang “kataposan sa sistema sa mga butang.” (Mateo 24:⁠3) Si Jesus mitubag pinaagi sa paghisgot sa usa ka yugto sa dihang, sumala sa iyang giingon, “ang nasod motindog batok sa nasod ug ang gingharian batok sa gingharian, ug aduna unyay mga kanihit sa pagkaon ug mga linog sa nagkalainlaing mga dapit.” Dayon siya miingon: “Kining tanan maoy sinugdanan sa mga kaul-ol sa kasakit.” (Mateo 24:​7, 8) Si apostol Pablo naghubit niining yugtoa ingong “kataposang mga adlaw,” nga nag-ingong kadto maoy “makuyaw nga mga panahong lisod sagubangon.” (2 Timoteo 3:⁠1) Imo bang nakita nga natuman karon kanang mga tagnaa?

Nganong lisod man kaayo kining yugtoa? Gihatag ni apostol Juan ang rason. Iyang gitagna nga dunay ‘hamubong panahon’ diin isentro  ni Satanas ug sa iyang mga demonyo ang ilang kalihokan dinhi sa yuta. Si Satanas gihubit ingong may “dakong kasuko” niining panahona. (Pinadayag 12:​7-12) Gibati ba nimong may espiritu sa kasuko ug kabangis ang mga tawo karon, dili lang sa usa ka dapit kondili sa tibuok yuta?

Si Jesus miingon usab nga niining malisod nga panahon, malampos ang usa ka talagsaong buluhaton. “Kining maayong balita sa gingharian [sa Diyos],” siya miingon, “igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Sa pagkakaron, sa kapig 235 ka kayutaan, ginasangyaw sa mga Saksi ni Jehova ang maayong balita sa Gingharian sa Diyos sa kapig 500 ka pinulongan. Ang duha ka binase-sa-Bibliyang mga basahon nga ilang gipatik, Ang Bantayanang Torre ug Pagmata!, mao ang labing kaylap nga naapod-apod nga mga magasin sa tibuok kalibotan. Nahubad usab sa mga Saksi ang Bibliya ngadto sa mga 100 ka pinulongan. Ang ilang buluhaton gihimo sa mga boluntaryo ug bug-os nga gisuportahan sa kinabubut-ong mga donasyon. Kini bang talagsaong buluhaton sa pagsangyaw maoy katumanan sa tagna ni Jesus?

Gipakita usab sa Bibliya ang mga panghitabo nga direktang motultol sa gubat tali ni Jehova nga Diyos ug niadtong mosupak kaniya. Tagda ang tulo sa maong mga tagna nga imong makitang matuman.

Mga Panghitabo nga Hapit na Nimong Makita

Tagna 1. Ang Bibliya nag-ingon nga ang mga magmamando sa kanasoran mohimog hinungdanong deklarasyon nga “kalinaw ug kasegurohan.” Lagmit maghunahuna sila nga hapit na nilang masulbad ang dagkong problema. Apan ang mga panghitabo human niini nga deklarasyon dili gayod malinawon.​—⁠1 Tesalonica 5:​1-3.

Tagna 2. Sunod, ang lainlaing gobyerno moatake sa mga relihiyon sa kalibotan. Sa Bibliya, kini nga mga gobyerno gisimbolohan sa mapintas nga mananap; ug ang bakak nga mga relihiyon gisimbolohan sa babayeng nagsakay sa maong mananap. (Pinadayag 17:​3, 15-18) Dili masayod ang simbolikong mananap nga himoon niini ang gipabuhat sa Diyos kaniya nga paglaglag sa mga relihiyon nga bakak nga nangangkong nagrepresentar sa Diyos.

Masambingayong gihubit ni apostol Juan ang panghitabo niining paagiha: “Ang napulo ka sungay nga imong nakita, ug ang mapintas nga mananap, kini sila magadumot sa bigaon ug magalaglag ug magahubo kaniya, ug magakaon sa iyang unod ug magaugdaw kaniya sa kalayo. Kay gibutang kini sa Diyos sa ilang mga kasingkasing aron buhaton ang iyang hunahuna.”​—⁠Pinadayag 17:​16, 17.

Tagna 3. Human niining malamposong pag-atake batok sa bakak nga relihiyon, tigomon ni Satanas ang mga ahensiya sa gobyerno ug sa militar aron atakehon ang mga magsisimba ni Jehova nga Diyos.​—⁠Pinadayag 7:14; Mateo 24:⁠21.

Sa Unsang Paagi Ka Maapektohan?

Kon wala pa nimo matun-i pag-ayo ang Bibliya, malisdan ka tingali sa pagtuo nga mahitabo ang gihubit sa ibabaw. Apan makataronganong mosalig nga ang matag detalye matuman ug nga kini mahitabo sa dili madugay. Ang daghang tagna sa Bibliya nga nangatuman na maoy pasalig niana. *

Nganong dili nimo susihon kon nganong kombinsido ang mga Saksi ni Jehova nga ang “gubat sa dakong adlaw sa Diyos nga Labing Gamhanan” haduol na gayod ug nganong dili ka angayng mahadlok niana? Pasaysaya sila kon unsay giingon sa Bibliya nga kinahanglan nimong buhaton aron mahilakip niadtong panalipdan ni Jehova nga Diyos. (Pinadayag 16:14) Ang imong makat-onan mahimong magbag-o sa imong panglantaw sa umaabot.

[Footnote]

[Blurb sa panid 8]

Katumanan ba sa tagna sa Bibliya ang buluhaton sa mga Saksi ni Jehova?