Itä Jises ewe Kot mi Unusen Tekia?
Pölüwan me ren Aramas:
▪ “Ewer, Jises I ewe Kot mi Unusen Tekia.”
▪ “Kot, i Jises, atun a wiliti futuk.”
Met Jises a apasa?
▪ “Are oupwe echeniei, ämi oupwe pwapwa ren, pwe üpwe feila ren Semei, pun Semei a tekia seniei.” (Jon 14:28) Jises a affata pwe iir me Seman rese löllö.
▪ “Upwe feita ngeni Semei pwal Sememi, o ngeni ai Kot pwal ami Kot.” (Jon 20:17, TF) Jises ese apasa pwe i Kot, nge a apasa pwe Kot, pwal emön mi sokko seni i.
▪ “Pun ngang use mo kapas seni pwisin ngang, pwe ewe Sam mi tinieito a fen ereniei minne upwe apasa, pwal minne upwe ani kapas.” (Jon 12:49, TF) Minne Jises a eäni afalafal ese popu seni pwisin i pwe seni ewe Sam.
JISES a apasa pwe i Nöün Kot, nge sap i ewe Kot mi Unusen Tekia. Ika Jises mi Kot, iön ewe a iotek ngeni atun a nonnom woon fönüfan? (Mattu 14:23; 26:26-29) Enlet, Jises ese chök pwomweni pwe a foffos ngeni pwal emön!
Lupwen rüüemön me lein nöün Jises kewe chon käeö ra tingorei pwe repwe eäni wis tekia lon an we Mwu, Jises a pölüweniir: “Nge esap wor ai pwüüng ai üpwe filätä iö epwe mot lepelifichi me lepelimöngi. Ekei leni Semei a amolätä fän iten chokewe i a filiiretä.” (Mattu 20:23) Itä Jises a mwaken lupwen a apasa pwe esor an pwüüng an epwe apwönüetä ar tingor? Aapwi! Iwe nge, a tipetekison le affata pwe Kot chök a wor an pwüüng an epwe wisen filatä. Jises a pwal aweweei pwe mei wor ekkoch mettoch iir me ekkewe chonläng rese silei, nge Seman we chök a silei.—Mark 13:32.
Itä Jises a kis seni Kot atun chök i emön mwän woon fönüfan? Aapw. Paipel a affata pwe pwal mwo nge mwirin an we mälo me manausefäl, Jises a nom fän nemenien Kot. Ewe aposel Paul a ächchema ngenikich pwe “Kot möküren Kraist.” (1 Korint 11:3) Ewe Paipel a apasa pwe lon mwachkkan “lupwen ekewe mettoch meinisin ra nom fän nemenien Kraist, mürin ewe Nau epwe püsin anomu i fän nemenien Kot, i ewe mi anomu mettoch meinisin fän nemenian. Iwe, Kot epwe unusen nemeni mettoch meinisin.”—1 Korint 15:28.
A ffatöch pwe esap Jises ewe Kot mi Unusen Tekia. Ina popun a kör ngeni Seman we “ai we Kot.”—Pwarata 3:2, 12; 2 Korint 1:3, 4. a
[Footnote]
a Ren pwal ekkoch pworaus woon ei itelap, ppii pekin taropwe 39-41 lon ewe puk, En Kopwe Tongeni Manau Tori Feilfeilo Chök lon Paratis won Fonufan, förien Chon Pwäratä Jiowa.
[Sasing lon pekin taropwe 7]
Jises a apasa pwe mei wor ekkoch mettoch iir me ekkewe chonläng rese silei nge Seman we chök a silei