ULUMÖN alüwöl lon Central Afrika ra mochen fiti ewe mwichelap. Ifa ussun repwe tikeri nge esor war me towauan 60 mwail, a pwal sonosonongaü me sutoputop ewe al? Ra ekiekin repwe tingor ülüfoch pasiken nge rese küna efoch mi öch ngeni ar säi.

Emön elter a rongorong ar osukosuk me a ereniir pwe repwe tongeni wawa waan we pasiken, a minen loom nge mi chüen öch. A apworausa ngeniir pwe i me ekkewe ekkoch ra fen föri och kokkot me loom pwe repwe tongeni fiti ewe mwichelap. Ewe elter a peseer pwe repwe wawafengen ewe pasiken. Mi mecheres ei kokkot nge mi lamot repwe otaöchü. Ifa ussun iir mi ülümön repwe wawa efoch chök pasiken lon ar säi?

Pokiten pwichikkaren ewe akkar, ekkewe alüwöl ra poputä ar säi lesossorusich chök me watä woon ewe pasiken pisekiir kewe meinisin. Emön me leir epwe le akkomw le ssä woon ewe pasiken, ekkewe rüüemön repwe fetälekäi me tapwelo mwirin. Mwirin eü le ülüngät mwail, ewe chon wawa epwe kaülo me likitatiu ewe pasiken ren efoch irä, ewe ia ekkewe rüüemön ra tapwoto repwe chuen küna me ie ewe pasiken pwe esap wor emön epwe soläni. Nge ewe mi akkomw wawa epwe chök sopwelo an fetäl.

Lupwen ekkewe rüüemön ra tori ewe pasiken, ewe arüüemönün epwele wawa ewe pasiken nge ewe aülümönün epwe chök sopwelo an fetäl pwal eü le ülüngät mwail, iwe mwirin epwap wii ewe emön. Ren ar achocho me akkotaöchü ar säi, ekkewe ülümön ra ekisaalo ar fetäl, pun itä ürürün repwe fetäl ükükün 60 mwail nge ra chök fetäl 40 mwail. A mmen öch ar achocho pun ra tongeni pwapwaiti ewe mwichelap me chiechifengen me pwiir kewe Chon Kraist. (Tut. 31:12) Lon ei ier, kopwe pwal fokkun achocho le fiti ewe mwichelap lon fönüom?