Ka pwal eáni ekkena esin kapas eis? Ika ina, iwe esap chék en. Aramasen unusen fénúfan ra ekieki usun ekkena esin kapas eis mi lamot lón manawer. Ka tongeni kúna pélúwer?

Fite million aramas ra tongeni erá, “Ewer!” Pwata? Pún ra kúna pwe Paipel a pélúwenéchú ar kewe kapas eis. Ka mochen silei met ewe Paipel a apasa? Ika ina, iwe neman kopwe mochen pwapwaiti ewe kókkótun káé Paipel ren Chón Pwáraatá Jiowa, nge ese kamé. *

Pwúngún, ikkeei meefien ekkóch aramas lupwen ra ekieki ika ra mochen etittina Paipel: “Ua kon tawengaw.” “Mi kon áweires.” “Ua pireir ika mi lamot upwe pwal féri och mettóch.” Nge ekkóch a sókkóló ekiekiir. Iir ra pwapwa le awora fansoun le káé met áitien Paipel. Sipwe ppii meefien ekkóch leir:

• “Ua fiti felin Katolik, Pirostan, me Sikh, ua ló lón eú leeni fán iten ekkewe chón pin chón Buddha, me ua káé usun pekin lamalam lón university. Iwe nge, a chómmóng ai kewe kapas eis usun Kot rese pélú. Mwirin, emén Chón Pwáraatá Jiowa a tori imwei we. Ua ingeló ren pélúwen ai kewe kapas eis a áiti ngeniei seni Paipel, iwe ua tipeeú ngeni ai upwe káé Paipel.”​—Gill, England.

• “A chómmóng ai kapas eis usun manaw, nge use menemenéch ren pélúwan me ren nei we pastor. Iwe nge, emén Chón Pwáraatá Jiowa a pélúweniir ren an néúnéú ewe chék Paipel. Lupwen a eisiniei ika ua pwal mochen alapaaló ai káé, ua fókkun etiwa fán pwapwa.”​—Koffi, Benin.

• “Ua mochen silei ika met a fis ngeni ekkewe mi máló. Ua lúkú pwe ekkewe mi máló ra tongeni efeiengawa ekkewe mi manaw, nge ua mochen silei met ewe Paipel a apasa. Iwe, ua poputá káé ewe Paipel ren emén chienei, i Chón Pwáraatá.”​—José, Brazil.

• “Ua sótuni le álleani ewe Paipel nge use tongeni weweiti. Mwirin, ekkewe Chón Pwáraatá Jiowa ra etto chuuriei me a fataffatéch ar áweweei ekkóch oesini lón Paipel. Ua mochen silei ika pwal met ua tongeni káé.”​—Dennize, Mexico.

• “Ua mochen silei ika Kot mi enletin ekiekiei. Iwe ua filatá ai upwe iótek ngeni ewe Kot Paipel a fós usun. Lón ewe rán mwirin, ekkewe Chón Pwáraatá ra fichifich wóón asamei we, me ua tipeeú ngeni ai upwe káé Paipel.”​—Anju, Nepal.

Ekkena pwóróus ra áchema ngenikich alon Jesus we lón Mateus 5:3, ewe a apasa, “Ra feiöch chon silei pwe ra wöüngau lon pekin ngünür.” Ewer, a pwúkún lamot ngeni aramas ar repwe silei Kot. Nge Kot chék i a tongeni atufichi ena, me a féri ena me ren an we Kapas, ewe Paipel.

Iwe, met a fis lón eú káéén Paipel? Ifa usun kopwe kúna feiéch seni? Ekkeei kapas eis repwe pélú me lón ewe lesen mwirin ei.