ESKI OU TI KONNEN?

Ki mannyer bann moulen ti ganny servi dan letan ansyen?

Bann moulen ti ganny servi pour kraz lagrenn ki vin lafarin pour fer dipen. Dan preski tou lakour bann madanm oubyen servant ti servi sa bann moulen toulezour pour fer lafarin. Dan letan ansyen sa pti tapaz moulen ti ganny asosye avek lavi toulezour.​—Egzod 11:5; Zeremi 25:10.

Lar ek skilptir ansyen Lezip i montre konman sa ti ganny fer. Lagrenn ti ganny mete lo en ros ki son sirfas ti form en kre. En lot non ki zot ti donn sa ros i saddle-quern. Sa dimoun ki kraz lagrenn ti azenou devan sa moulen e avek son de lanmen i ti atrap sa pli pti ros e frot li ale vini lo sirfas sa ros kre pour kraz lagrenn. Dapre en rapor, sa bann pti ros pour kraz lagrenn ti pez ant 2 a 4 kilo. Sa ros ti kapab touy en dimoun si i ti ganny servi konman en zouti.​—Ziz 9:50-54.

Kraz lagrenn ti telman enportan pour byennet en fanmir ki dapre Labib, Bondye ti defann pour sezi moulen en dimoun konman en garanti. Deterononm 24:6 i dir, “Personn pa devret sezi en moulen oubyen en parti sa moulen konman garanti pour en lón akoz sa ti pou priv sa fanmir antye zot dipen toulezour.”

Ki vedir sa lekspresyon “pros avek leker”?

Labib i dir ki Zezi i “pros avek leker son Papa.” (Zan 1:18) Sa lekspresyon pe montre ki Zezi i annan laprouvasyon Bondye e ki zot annan en relasyon vreman pros. Sa parol i refer avek en koutim Zwif letan zot ti pe pran en repa.

Dan letan Zezi bann Zwif ti alonze lo bann sofa ki ti ganny mete otour latab manze. Zot latet ti vir direksyon latab e zot lipye ti lwen avek latab, an menm tan ki zot ti apiy lo en kousen avek zot koud kote gos. Sa pozisyon ti fer ki zot lanmen drwat ti reste lib. Lefet ki zot ti alonz lo zot kote gos pre dan bor kanmarad, dapre en rapor “latet en zonm ti pre avek pwatrin sa lot zonm ki ti par deryer li e alor pour sa rezon i ganny dir ki sa zonm ti ‘pros avek leker’ sa lot.”

I ti en privilez spesyal oubyen menm en loner pour asiz pros avek leker sef fanmir oubyen sa met lakour kot en festen ti pe ganny fer. Alor pandan dernyen repa Lapak ki Zezi ti fer se zapot Zan “sa disip ki Zezi ti kontan” ki ti alonz pros avek leker Zezi. Alor Zan ti kapab “apiy lo pwatrin Zezi” pour demann li en kestyon.​—Zan 13:23-25; 21:20.

[Portre lo paz 9]

[Sorti kot]

© The Art Archive/​Mize Ashmolean/​Art Resource, NY