Akam

6 Ndi Ayan̄wam Nnyịn?

NDI akam enyene ufọn ọnọ nnyịn? Ih, Bible owụt ke akam mme anam-akpanikọ asan̄autom Abasi esinen̄ede enyene ufọn ọnọ mmọ. (Luke 22:40; James 5:13) Ke nditịm ntịn̄, akam ekeme ndinen̄ede nnam ufọn nnọ nnyịn ke kpukpru usụn̄. Didie?

Ọfọn, yak idọhọ ke ẹnọ eyen fo enọ. Ndi afo ekpekpep enye ke ekem ndikekere ke owo oro ọnọde enye enọ anam etieti? Mîdịghe ndi afo ekpekpep enye ndikọm owo oro? Ke ini isiode se ikerede-kere itịn̄, nnyịn inam ẹfiọk ekikere nnyịn inyụn̄ isọn̄ọ ekikere oro. Ndi edi ntre ke ini ibọn̄de akam inọ Abasi? Ih! Kere ban̄a ndusụk uwụtn̄kpọ.

Akam ekọm. Ke ini ikọmde Ete nnyịn kaban̄a nti n̄kpọ oro ibọde, nnyịn isitịn̄ iban̄a mme edidiọn̄ nnyịn. Ndien emi ekeme ndinam nnyịn inen̄ede iwụt esịtekọm, ikop inemesịt, inyụn̄ ikere nti n̄kpọ.—Philippi 4:6.

Uwụtn̄kpọ: Jesus ama owụt esịtekọm aban̄a nte Ete esie okokopde onyụn̄ eyerede akam esie.—John 11:41.

Akam ediben̄e edidahado nnọ. Ke ini iben̄ede ite Abasi adahado ọnọ nnyịn, nnyịn inam ubieresịt nnyịn enen̄ede ọfọn, inen̄ede ikabade esịt, inyụn̄ inen̄ede ikụt nte idiọkn̄kpọ nnyịn ọdiọkde. Emi esinyụn̄ anam esịt ibiomke nnyịn aba.

Uwụtn̄kpọ: David ama ọbọn̄ akam man owụt ke imakabade esịt inyụn̄ itua n̄kpọfiọk.—Psalm 51.

Akam ediben̄e ndausụn̄ ye ọniọn̄. Ndiben̄e Jehovah ada nnyịn usụn̄ m̀mê ọnọ nnyịn ọniọn̄ man inam nti ubiere ekeme ndinam nnyịn inen̄ede isụhọde idem. Emi ekeme ndinam iti mmeme nnyịn onyụn̄ anam inen̄ede ibuọt idem ye Ete nnyịn eke heaven.—Mme N̄ke 3:5, 6.

Uwụtn̄kpọ: Solomon ama osụhọde idem eben̄e ndausụn̄ ye ọniọn̄ man ekeme ndikara Israel.—1 Ndidem 3:5-12.

Akam ini nnanenyịn. Edieke in̄wan̄ade esịt nnyịn inọ Abasi ke ini esịt etịmerede nnyịn, iyokop inemesịt inyụn̄ iberi edem ke Jehovah utu ke idem nnyịn.—Psalm 62:8.

Uwụtn̄kpọ: Edidem Asa ama ọbọn̄ akam ke ini asua akadade mfịna etiene enye.—2 Chronicles 14:11.

Edibọn̄ akam nyom ufọn mbon en̄wen. Utọ akam oro isiyakke nnyịn ikere iban̄a idem nnyịn kpọt, edi esinam inyene esịtmbọm inyụn̄ ikere iban̄a mbon en̄wen.

Uwụtn̄kpọ: Jesus ama esịn mme anditiene enye ke akam.—John 17:9-17.

Akam itoro. Edieke itorode Jehovah ke utịbe utịbe utom ye nti edu esie, iyenen̄ede ikpono inyụn̄ iwụt esịtekọm inọ enye. Utọ akam emi ekeme n̄ko ndinam itetịm isan̄a ikpere Abasi ye Ete nnyịn.

Uwụtn̄kpọ: David ama enen̄ede otoro Abasi ke se Abasi obotde.—Psalm 8.

Edidiọn̄ en̄wen oro akam esidade edi edi “emem Abasi emi akande kpukpru ekikere.” (Philippi 4:7) Ndinyene emem ke ererimbot afanikọn̄ emi edi edidiọn̄ oro mîmemke utom ndinyene. Enye akam ekeme ndinam idem ọsọn̄ owo. (Mme N̄ke 14:30) Edi ndi ukeme oro nnyịn ke idem nnyịn isịnde kpọt esinam inyene emem emi? Mîdịghe ndi odu akpan n̄kpọ en̄wen oro esinamde emi?

[Se ẹwetde ke ikpọ abisi ke page 10]

Akam enyene ufọn ke kpukpru usụn̄, akpan akpan ke n̄kan̄ eke spirit