Kpep Nditọ Fo

Obio Ubọn̄ Oro Edikpụhọrede N̄kpọ ke Ofụri Isọn̄

EKERE ke ewe Obio Ubọn̄ ke itịn̄ iban̄a?— * Edi enye emi Jesus ekekpepde nnyịn ete ibọn̄ akam iben̄e. Enye ekekpep nnyịn ete iben̄e Abasi ite: “Yak obio ubọn̄ fo edi.” (Matthew 6:9, 10) Ke se ikperede ndisịm isua 2,000, mme anditiene Jesus ẹmebọn̄ akam ẹben̄e Abasi ẹte Obio Ubọn̄ Esie edi. Ndi afo emesibọn̄ akam eben̄e oro?—

Ana ọfiọk se idide edidem edieke anade ọfiọk se obio ubọn̄ edide. Edidem edi owo emi adade ubọn̄. Ẹkot obio m̀mê ebiet emi enye akarade obio ubọn̄. Ebiet emi Obio Ubọn̄ Abasi akarade esịne ofụri isọn̄. Obio Ubọn̄ Abasi ama edi, kpukpru owo ke isọn̄ ẹyenyene mme edidiọn̄ emi ukara esie edidade isọk mme owo.

Obio Ubọn̄ Abasi edi ukara eke heaven. Bible etịn̄ ke Isaiah 9:6 aban̄a Andikara ukara emi. Kop se itien̄wed oro etịn̄de mi aban̄a enye: “Koro eyen amanade ọnọ nnyịn, . . . ubọn̄ onyụn̄ odoro enye ke afara; ẹnyụn̄ ẹsio enye enyịn̄ . . . Ọbọn̄ Emem.”

Anie edi akakan Edidem eke heaven?— Afo emenen edieke ọkpọdọhọde ke edi Jehovah. Bible ọdọhọ ke enye edi “Ata Edikon̄ ke ofụri ererimbot.” (Psalm 83:18) Ẹwak ndikot Jesus “Eyen Abasi” ke Bible. Ntak kiet edi ke Jehovah okobot Jesus. Jehovah edi ata Ete Jesus.—Luke 1:34, 35; John 1:34, 49; 3:17; 11:27; 20:31; Utom 9:20.

Obio Ubọn̄ Abasi oro Jesus ekekpepde nnyịn ete ibọn̄ akam iben̄e edi san̄asan̄a ukara. Jehovah emek Jesus Eyen esie Andikara, m̀mê Edidem Obio Ubọn̄ oro. Edi ndi afo ama ọfiọk ke ẹyemek mbon en̄wen ẹtiene ẹkara nte ndidem ye Jesus ke Obio Ubọn̄ Ete esie?— Yak ineme iban̄a mmọ.

Esisịt ini mbemiso Jesus akakpade, enye ama asian mme apostle oro ẹkesọn̄ọde ẹda ye enye ke imọ imọn̄ inyọn̄ ika “ufọk” Ete imọ ke heaven. Enye ọkọdọhọ ete: ‘Ami nnyọn̄ n̄ka nditịm itie nnịm nnọ mbufo man mbufo n̄ko ẹkpedu ke ebiet eke ami ndude.’ (John 14:1-3) Ndi afo ọmọfiọk se mme apostle ye mbon eken oro ẹmekde ẹdinamde ke heaven ye Jesus?— Mmọ “[ẹyekara] nte ndidem  ye enye.” Bible akam asian nnyịn owo ifan̄ emi ẹdikarade nte ndidem ye Jesus. Mmọ ẹdidi owo 144,000.—Ediyarade 14:1, 3; 20:6.

Afo ekere ke n̄kpọ editie didie ke isọn̄ ke ini Ọbọn̄ Emem ye owo 144,000 oro ẹmekde ẹdikarade?— Edidi utịbe! Ekọn̄ ididụhe aba. Unam ẹyetie ke emem ye kiet eken ẹnyụn̄ ẹtie ye nnyịn. Owo ndomokiet ididọn̄ọke idinyụn̄ ikpaha. Enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan, mbụn̄ọ eyefehe itọk onyụn̄ enek nte edop. Isọn̄ oyon̄wụm nti udia ọnọ kpukpru owo. Ndien kpukpru owo ẹyema kiet eken nte Jesus ekekpepde mme mbet esie ete ẹma. (John 13:34, 35) Yak ikụbọde ika mme ufan̄ikọ oro ẹwetde mi ke n̄wed Isaiah inyụn̄ ikot mme utịbe utịbe n̄kpọ oro ẹdidade itie.—Isaiah 2:4; 11:6-11; 25:8; 33:24; 35:5, 6; 65:21-24.

Tọn̄ọ Jesus ekekpep mme owo ete ẹbọn̄ akam ẹte “yak obio ubọn̄ Fo edi,” ata ediwak owo ẹmekpep ẹban̄a Obio Ubọn̄ oro. Se mmọ ẹkpepde emi omokpụhọde uwem mmọ. Idibịghike, ke ini Obio Ubọn̄ emi edidide edida itie kpukpru ukara ke isọn̄, kpukpru owo oro ẹnamde n̄kpọ Jehovah Abasi ye Andikara emi enye emekde, kpa Jesus Christ, ẹyenyene emem, ẹkop nsọn̄idem, ẹnyụn̄ ẹkop inemesịt.—John 17:3.

[Ikọ Idakisọn̄]

MBỤME:

▪ Anie edi Andikara Obio Ubọn̄ Abasi?

▪ Mmanie ẹditiene Jesus ikara ke Obio Ubọn̄ Ete esie?

▪ N̄kpọ editie didie ke isọn̄ ke ini Jesus akarade?