Kpep Nditọ Fo

Abasi ye Mme Ufan Esie Ẹma Ẹma Enye

IDỤHE eke ọdiọn̄ọde enyịn̄ esie mfịn. Isikot enye idian Jephthah ete esie. Ẹyak ise se Bible etịn̄de aban̄a ete ye eyen emi. Nnyịn iyokụt ke Abasi ama adiaha Jephthah, mme ufan esie ẹnyụn̄ ẹma enye n̄ko.

Mbụk Jephthah ye adiaha esie odu ke n̄wed Judges ibuot 11. Sia Jephthah ekedide anam-akpanikọ asan̄autom Abasi, anaedi enye ama esineme Ikọ Abasi ye adiaha esie.

Nditọ Israel ikenyeneke edidem ke eyo Jephthah. Jephthah ama okop odudu onyụn̄ ekeme ndin̄wana ekọn̄. Ntre, nditọ Israel ẹma ẹdọhọ enye edida ye mmimọ an̄wana ye nditọ Ammon emi mîkayakke mmọ ẹbọ emem.

Jephthah okoyom Abasi anam imọ ikan nditọ Ammon, ntre enye ama anam un̄wọn̄ọ ọnọ Abasi. Enye ọkọdọhọ ke edieke Jehovah edinamde imọ ikan, ke iyọnọ akpa owo oro ediwọrọde ke ufọk imọ idisobo ye imọ ke ini idinyọn̄de idi okodụn̄ ke ataya Abasi ke nsinsi anam n̄kpọ Abasi. Ndi ọmọfiọk akpa owo emi ọkọwọrọde edisobo ye enye?— *

Ih, ekedi adiaha esie. Jephthah ama ofụhọ etieti sia eyen kiet emi kpọt ke enye  ekenyene. Edi enye ama ọn̄wọn̄wọn̄ọ ọnọ Jehovah, ntre enye ekenyene ndinam se enye ọkọn̄wọn̄ọde. Adiaha esie ama ọdọhọ inikiet inikiet ete: “Ete mi, edieke edide afo ama atat inua fo ke akan̄a ọnọ Jehovah, nam ye ami se ikọwọrọde fi ke inua.” Ekem enye ọdọhọ ete esie ọnọ imọ ọfiọn̄ iba ikasan̄a ke enyọn̄ obot itua. Ntak emi enye okoyomde ndikatua? Sia un̄wọn̄ọ ete esie idiyakke enye ọdọ ebe onyụn̄ aman nditọ. Edi enye ikekereke iban̄a idemesie ikaha. Se ikenen̄erede ibehe enye ekedi ndikop uyo ete esie nnyụn̄ nsọn̄ọ nda ye Jehovah. Ndi emekere ke se enye akanamde emi ama enem Jehovah ye ete esie esịt?—

Jephthah ama ayak adiaha esie asan̄a ye mme ufan esie aka akatua ọfiọn̄ iba. Ke enye ama ọkọnyọn̄ edi, ete esie ama anam enye okodu ke ataya Jehovah ke Shiloh ke ofụri eyouwem esie nte enye ọkọn̄wọn̄ọde. Nditọiban Israel ẹma ẹsika Shiloh kpukpru isua ẹkesịn udọn̄ ẹnọ enye.

Ndi ọmọfiọk nditọwọn̄ emi ẹsikopde uyo ete ye eka ẹnyụn̄ ẹmade Jehovah?— Ọfọn esinam ufan ye utọ nditọ emi. Edieke anamde n̄kpọ nte adiaha Jephthah, okopde item onyụn̄ ọsọn̄ọde ada ye Jehovah, afo nde eyenyene nti ufan. Esịt eyenem ete ye eka afo, Jehovah oyonyụn̄ ama fi.

Kụbọde Bible Fo Kot

Deuteronomy 6:4-6

Judges 11:30-40

1 Corinth 7:37, 38

[Ikọ Idakisọn̄]