Kpep N̄kpọ To Ikọ Abasi

Anie Edi Abasi?

Ibuotikọ emi obụp mme mbụme emi ẹkemede ndidi emesibụp n̄ko onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Anie Edi Abasi?

Ata Abasi okobot kpukpru n̄kpọ. Bible okot enye “nsinsi Edidem,” ndien emi ọwọrọ ke enye inyeneke ntọn̄ọ inyụn̄ inyeneke utịt. (Ediyarade 15:3) Nnyịn ikpenyene ndituak ibuot nnọ enye ikpọn̄-ikpọn̄ sia enye ọnọ nnyịn uwem.—Kot Ediyarade 4:11.

2. Abasi etie didie?

Akananam baba owo kiet ikwe Abasi sia enye edide Spirit, ndien emi ọwọrọ ke enye enen̄ede okon̄ akan mme owo ke isọn̄. (John 1:18; 4:24) Mme n̄kpọ oro Abasi obotde anam ifiọk mme edu Abasi. Ke uwụtn̄kpọ, nsio nsio mfri ye mme flawa emi Abasi obotde owụt ke enye enyene ọniọn̄ onyụn̄ ama nnyịn. Akaka ekondo nnyịn owụt ke Abasi enyene odudu.—Kot Rome 1:20.

Bible n̄ko ekeme ndikpep nnyịn n̄kpọ en̄wen mban̄a Abasi. Ke uwụtn̄kpọ, Bible anam ifiọk se Abasi amade ye se enye asuade, nte enye esinamde n̄kpọ ye mme owo, ye nte enye esinamde n̄kpọ ke ini n̄kpọ etịbede.—Kot Psalm 103:7-10.

3. Ndi Abasi enyene enyịn̄?

Jesus ọkọdọhọ ete: “Ete nnyịn emi odude ke heaven, yak ẹnam enyịn̄ fo asana.” (Matthew 6:9) Okposụkedi emi Abasi enyenede ediwak udorienyịn̄, enyịn̄ kiet kpọt ke enye enyene. Ẹkot enyịn̄ emi ẹtiene nte usem kiet kiet etiede. Nnyịn isikot enye “Jehovah” m̀mê “Yahweh” nte ẹsinyụn̄ ẹkotde ke Ikọmbakara.—Kot Psalm 83:18.

Ẹsion̄o enyịn̄ Abasi ẹfep ke ediwak Bible ẹnyụn̄ ẹda mme udorienyịn̄ nte Ọbọn̄ m̀mê Abasi ẹdọn̄ ke mme ebiet emi enyịn̄ emi okpodude. Edi ke ini ẹkewetde Bible, enyịn̄ emi ama odu ebe utịm ike-7,000. Jesus ama anam mme owo ẹfiọk enyịn̄ Abasi ke ndisikot enyịn̄ emi ke ini enye ọkọkwọrọde Ikọ Abasi ọnọ mmọ. Enye ama an̄wam mme owo ẹfiọk Abasi.—Kot John 17:26.

  4. Nte Jehovah ekere aban̄a nnyịn?

Jehovah esikop akam oro nnyịn owo kiet kiet ibọn̄de, ndien emi owụt ke enye ekere aban̄a nnyịn. (Psalm 65:2) Ndi ekese ndutụhọ oro ikụtde ọwọrọ ke Abasi ikereke iban̄a nnyịn? Ndusụk owo ẹdọhọ ke Abasi esitụhọde owo man odomo owo ese, edi emi idịghe akpanikọ. Bible ọdọhọ ke ‘ata Abasi isinamke se idiọkde.’—Job 34:10; kot James 1:13.

Abasi ọnọ nnyịn ifụre ndibiere se iyomde ndinam. Ndi nnyịn imaha nte Abasi ọnọde nnyịn ifụre ndibiere m̀mê iyanam n̄kpọ esie m̀mê idinamke? (Joshua 24:15) Ekese ndutụhọ emi ikụtde mfịn edi koro ediwak owo ẹmekde ndinam mbon en̄wen idiọk. Esinen̄ede abiak Jehovah ndikụt utọ n̄kpọ emi.—Kot Genesis 6:5, 6.

Jehovah ọmọn̄ adada Jesus etre ndutụhọ onyụn̄ osobo mbon oro ẹnamde owo okụt ndutụhọ. Edi enyene eti ntak emi anamde Jehovah ayak mme owo ẹkụt ndutụhọ ke esisịt ini. Ibuotikọ en̄wen ke ikpehe emi eyetịn̄ ntak emi Abasi ayakde mme owo ẹkụt ndutụhọ.—Kot Isaiah 11:4.

5. Nso ke Abasi oyom inam?

Jehovah okobot nnyịn ke usụn̄ oro ikemede ndifiọk nnyụn̄ mma enye. Enye oyom inen̄ede ifiọk orụk owo emi imọ idide. (1 Timothy 2:4) Edieke ikpepde Bible, iyọfiọk Abasi inyụn̄ idi ufan esie.—Mme N̄ke 2:4, 5.

Akpana ima Jehovah ikan nte imade owo ekededi sia enye ọnọ nnyịn uwem. Nnyịn imekeme ndiwụt ke imama Abasi ke ndisibọn̄ akam nnọ enye nnyụn̄ nnam se enye ọdọhọde. (Mme N̄ke 15:8) Jehovah oyom inam n̄kpọ ye mme owo ke ima.—Kot Mark 12:29, 30; 1 John 5:3.

Edieke oyomde ndifiọk n̄kpọ en̄wen, se ibuot 1 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

[Ndise ke page 17]

Ndi eti ntak odu emi akpanamde Abasi ayak owo okụt ndutụhọ ke esisịt ini?