‘Ẹyekwọrọ Eti Mbụk Obio Ubọn̄ Emi’

“Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—MATTHEW 24:14.

Se Emi Ọwọrọde: Luke andiwet Gospel ọdọhọ ke Jesus ama “asan̄a to ke obio sịm obio, onyụn̄ oto ke obio-in̄wan̄ esịm obio-in̄wan̄, ọkwọrọ onyụn̄ atan̄a eti mbụk obio ubọn̄ Abasi.” (Luke 8:1) Jesus ke idemesie ọkọdọhọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Enye ama onyụn̄ ọdọhọ mme mbet esie ẹka mme obio ye obio-in̄wan̄ ẹkekwọrọ ikọ, ekem owụk mmọ ete: “Mbufo ẹyetie ntiense ẹban̄a mi . . . tutu esịm ata utịt ikpehe isọn̄.”—Utom 1:8; Luke 10:1.

Nte Mme Akpa Christian Ẹkenamde Emi: Mme mbet Jesus ikabiatke ini ndinam se enye ọkọdọhọde mmọ ẹnam. “Kpukpru usen ke temple ye ke ufọk ke ufọk mmọ [ẹma] ẹka iso ye unana edikpa mba ndikpep nnyụn̄ ntan̄a eti mbụk aban̄ade Christ.” (Utom 5:42) Idịghe sụk ibat ibat mme ọwọrọiso owo ẹkekwọrọ ikọ. Neander emi ekedide ewet mbụkeset ọkọdọhọ ke “Celsus emi ekedide akpa owo emi ekewetde n̄kpọ abiat mme Christian akasasak ndikụt nte mme ọdọk ideterọn̄, mme ọdiọn̄ ikpaukot, mme akwat-ikpa, ye mme ata usụhọde owo oro mîkakaha ufọkn̄wed, ẹkwọrọde gospel ifịk ifịk.” Jean Bernard ekewet ke n̄wed esie oro The Early Centuries of the Church ete: “[Mme Christian] ẹkenyene ndikwọrọ ikọ ke kpukpru ebiet nnọ kpukpru owo. Mmọ ẹkenyene ndinam emi ke ọkpọusụn̄, ke obio ke obio, ke an̄wa obio, ye ke ufọk ke ufọk. Akana mmọ ẹkwọrọ ikọ ẹnọ kpukpru owo tutu esịm utịt ererimbot . . . edide mme owo ẹma ukwọrọikọ mmọ m̀mê imaha.”

Mmanie Ẹnam Emi Mfịn? David Watson,  oku Ufọkabasi Anglican ewet ete: “Se inamde ererimbot abiara ntem edi emi mme ufọkabasi mîdaha edikwọrọ ikọ ye edikpep mme owo n̄kpọ ke akpan n̄kpọ.” Ke n̄wed esie oro Why Are the Catholics Leaving? José Luis Pérez Guadalupe ama ọdọhọ ke mbon Evangelical, Adventist, ye mbon ufọkabasi eken “isikwọrọke ikọ ke ufọk ke ufọk.” Edi enye ọkọdọhọ ke Mme Ntiense Jehovah “ẹsikwọrọ ikọ ke ufọk ke ufọk, ibehe ufọk ndomokiet.”

Ẹma ẹwet se Jonathan Turley eketịn̄de ẹsịn ke n̄wed Esop Anana Ntọn̄ kiet emi ẹkotde Cato Supreme Court Review, 2001-2002 ẹte: “Ama asasiak Mme Ntiense Jehovah, ediwak owo ẹyesọsọp ẹti mme ọkwọrọikọ emi ẹsikade ufọk owo ini ekededi. Mmọ inamke emi man mme owo ẹfiọk ufọkabasi mmọ, edi ukwọrọikọ akam edi akpan utom ufọkabasi mmọ.”

[Ekebe ke page 9]

Ndi Omokụt Se Ẹdade Ẹdiọn̄ọ Mmọ?

Ke ima ikada N̄wed Abasi idụn̄ọde se ẹdade ẹdiọn̄ọ ata mme Christian ke mme ibuotikọ emi, afo ekere ke mmanie mfịn ẹdi ata mme Christian? Kpa ye oro ata ediwak ufọkabasi ẹdọhọde ke idi mme Christian, ti se Jesus ọkọdọhọde mme mbet esie ete: “Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi emi odude ke heaven edidụk.” (Matthew 7:21) Ndidiọn̄ọ mbon emi ẹnamde uduak Ete—kpa mbon emi ẹdide ata mme Christian—nnyụn̄ ntiene mmọ n̄kpono Abasi ekeme ndinam nnyịn ibọ mme edidiọn̄ Obio Ubọn̄ Abasi ke nsinsi. Mbọk dọhọ Mme Ntiense Jehovah emi ẹkenọde fi magazine emi ẹnam fi ọfiọk mme n̄kpọ efen emi ẹban̄ade Obio Ubọn̄ Abasi ye mme edidiọn̄ emi enye edidade edi.—Luke 4:43.