‘Mmanam Ẹfiọk Enyịn̄ Fo’

“Mmayarade enyịn̄ fo nnọ mme owo emi afo okosiode ke ererimbot ọnọ mi. . . . Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk.”—JOHN 17:6, 26.

Se Emi Ọwọrọde: Jesus ama anam ẹfiọk enyịn̄ Abasi ke ndisisiak enyịn̄ oro ke ini enye ọkwọrọde ikọ. Sia Jesus ekesimade ndikot N̄wed Abasi, anaedi enye ama esikot ata enyịn̄ Abasi. (Luke 4:16-21) Enye ama ekpep mme mbet esie ndibọn̄ akam ntem: “Ete, yak ẹnam enyịn̄ fo asana.”—Luke 11:2.

Nte Mme Akpa Christian Ẹkenamde Emi: Apostle Peter ama obụk ọnọ nyobiowo ke Jerusalem nte ke Abasi ama osio mme owo ke otu mme idụt ‘ọnọ enyịn̄ esie.’ (Utom 15:14) Mme apostle ye mbon eken ẹma ẹkwọrọ ẹte ke “ẹyenyan̄a kpukpru owo eke ẹsemede ẹkot enyịn̄ Jehovah.” (Utom 2:21; Rome 10:13) Mmọ n̄ko ẹma ẹsiwewet enyịn̄ Abasi ke mme n̄wed mmọ. The Tosefta, kpa n̄wed ibet mme Jew emi ẹkewetde ẹma ke isua 300 E.N. etịn̄ aban̄a mme n̄wed Christian oro mme asua ẹkefọpde, ete: “Ẹma ẹfọp mme Gospel ye mme n̄wed minim [ẹkeda mbon minim nte mme Jew emi ẹdide mme Christian]. Ẹma ẹsifọp mme n̄wed emi, . . . ye mme ebiet oro ẹkesiwetde Enyịn̄ Abasi.”

Mmanie Ẹnam Emi Mfịn? Ẹwet ke Mbemiso Ikọ Bible Revised Standard Version, emi National Council of the Churches of Christ ke United States ọkọnọde odudu ete ẹsio, ẹte: “Mbemiso eyo mme Christian, Ido Ukpono Mme Jew ẹma ẹtetre ndinọ Abasi kierakiet ata enyịn̄ nte n̄kpọ eke ẹdọhọde ke mme abasi efen ẹdu, emi ẹyomde ndiwụt ukpụhọde ke ufọt esie ye mmọ. Mmọdo, idotke n̄ko mme Christian ke ofụri ererimbot ndinọ Abasi ata enyịn̄.” Ntem, mmọ ẹma ẹsio enyịn̄ Abasi ẹfep ẹnyụn̄ ẹwet “ỌBỌN̄” ke itie oro. Ke ata ndondo emi, mme akama ukara Ufọkabasi Catholic ẹdọhọ mme bishop Catholic ẹte: “Owo inyeneke ndisiak m̀mê ndikot enyịn̄ Abasi, oro edi, YHWH * ke edinam ufọkabasi.”

Mmanie mfịn ẹsikot ẹnyụn̄ ẹnam ẹdiọn̄ọ ata enyịn̄ Abasi? Ke ini Sergey ekedide ekpri akparawa ke Kyrgyzstan, enye ama ese fim emi okowụtde ke enyịn̄ Abasi edi Jehovah. Enye ikokopke enyịn̄ Abasi aba ke isua duop oro ẹketienede. Nte ini akade, Sergey ama ọnyọn̄ United States ndien owo iba ke otu Mme Ntiense Jehovah ẹma ẹdi ufọk esie ẹdiwụt enye enyịn̄ Abasi ke Bible. Sergey ama enen̄ede enem esịt ndikụt mbon oro ẹkotde enyịn̄ Jehovah. Enem ndifiọk nte ke Webster’s Third New International Dictionary ọdọhọ ke “Jehovah Abasi” edi “akakan Abasi ye n̄kukụre Abasi emi Mme Ntiense Jehovah ẹdiọn̄ọde ẹnyụn̄ ẹtuakde ibuot ẹnọ.”

[Ikọ Idakisọn̄]