Osian dza Bible no kyerɛkyerɛ ntsi, Jehovah Adasefo wɔ ɔsom mu siantsir ahorow bi a ɔmma wonngyina ɔfã biara wɔ amansɛm mu. Yɛmmfa hɛnho nnhyehyɛ amansɛm mu, yɛnntow aba mma amanyɛkuw anaa n’ananmusinyi biara, yenngyina mma wɔnntow aba mma hɛn, na yɛmmfa hɛnho nnhyɛ ndzeyɛɛ biara a wɔdze sesã aban no mu. Yɛgye dzi dɛ Bible no ma hɛn siantsir a odzi mu a ɔma yetum yɛ hɛn adze dɛm.

• Yedzi Jesus a ɔpowee dɛ ɔbɛgye amanyɛ hokwan biara ato mu no nhwɛdo ekyir. (John 6:15) Ɔkyerɛkyerɛɛ n’esuafo no dɛ “wommfi wiadze,” na ɔmaa no mu daa hɔ kofee dɛ mma wonngyina ɔfã biara wɔ amansɛm mu.​—John 17:14, 16; 18:36; Mark 12:13-17.

• Yedzi nokwar ma Nyankopɔn Ahenman no, ɔno na Jesus kãa ho asɛm dɛ: “Na ahenman ho asɛmpa yi, wɔbɛkã wɔ wiadze nyina dze edzi amanaman nyina dase.” (Matthew 24:14) Dɛ Nyankopɔn Ahenman ho ahembɔfo a wɔahyɛ hɛn dɛ yɛnkã Ahenman no mbae ho asɛm no, yenngyina ɔfã biara wɔ ɔman biara amansɛm mu, a ɔman a yɛtse mu so kã ho.​—2 Corinthfo 5:20; Ephesusfo 6:20.

• Osian ɔfã biara a yenngyina ntsi, yetum kã Nyankopɔn Ahenman no ho asɛmpa kyerɛ obiara ɔmmfa ho amanyɛkuw a ɔdɔm no. Yɛbɔ mbɔdzen dze hɛn anomu nsɛm nye hɛn ndzeyɛɛ kyerɛ dɛ yɛdze hɛn ho to Nyankopɔn Ahenman no do dɛ ɔno na obedzi wiadze yi haw ahorow ho dwuma.​—Ndwom 56:11.

• Osiandɛ yekwetsir mpaapaamu a amansɛm dze ba no ntsi, yɛkã bɔ mu yɛ amanaman ntamu enuanom. (Colossaefo 3:14; 1 Peter 2:17) Dza ɔnye iyi bɔ ebira no, ɔsom ahorow a wɔdze hɔnho hyɛ amansɛm mu no dze mpaapaamu ba hɔn nkorɔfo mu.​—1 Corinthfo 1:10.

Obu ma aban ahorow. Ɔwɔ mu dɛ yɛmmfa hɛn ho nnhyɛ amansɛm mu dze, naaso yɛkyerɛ obu ma aban ahorow a yɛhyɛ hɔn ase no. Iyi nye Bible ahyɛdze yi hyia: “Hom mma akra nyina mbrɛ hɔnho adze mma etum a ɔkrɔn.” (Romefo 13:1) Yedzi mbra ahorow no do, yetua tow, na yɛpen mbɔdzen a aban bɔ dɛ ɔbɛma ɔmamfo no edzi yie no do. Dɛ nkyɛ yɛdze hɛn ho bɛhyɛ mbɔdzen a afofor bɔ dɛ wɔbɔsoɛr etsia aban no mu no, yedzi Bible no afotusɛm a ɔse yɛmbɔ mpaa “mma ahemfo nye hɔn a wodzi tum nyina” no do, nkanka aber a worisisi gyinae ahorow bi a ɔfa hokwan a obi wɔ dɛ ɔpaw ɔsom a ɔpɛ ho no.​—1 Timothy 2:1, 2.

Yɛkyerɛ obu so ma hokwan a afofor wɔ dɛ wosisi hɔnankasa hɔn gyinae ahorow a ɔfa amansɛm ho no. Dɛ mfatoho no, sɛ wɔrotow aba a, yɛnnyɛ biribiara mmfa nnsɛɛ no, na yennsiw hɔn a wɔpaw dɛ wɔbɔtow aba no so kwan.

Aso ɔfã a yenngyina no yɛ adze fofor bi a afei na yɛreyɛ? Oho. Asomafo no nye Christianfo a wodzi kan no sii gyinae kor yi ara wɔ aban tumdzi ahorow ho. Buukuu a wɔato dzin Beyond Good Intentions no kã dɛ: “Ɔwɔ mu dɛ nna Christianfo a wodzi kan no gye dzi dɛ ɔsɛ dɛ wodzi aban etumfo no nyi dze, naaso nna wɔgye dzi dɛ ɔnnsɛ dɛ wɔdze hɔnho hyehyɛ amansɛm mu.” Dɛmara so na On the Road to Civilization buukuu no kã dɛ nna Christianfo a wodzi kan no “nndzi tum biara wɔ ɔman mu.”

Aso ɔfã biara a yenngyina wɔ amansɛm mu no dze ɔman no eyiedzi to esian mu anaa? Oho. Yɛyɛ ɔman mba a yɛdɔ asomdwee, na onnhia dɛ aban mpanyimfo no suro hɛn wɔ ɔkwan biara do. Susũ amandzɛɛbɔ bi a National Academy of Sciences of Ukraine no dze mae wɔ mfe 2001 mu no ho hwɛ. Aber a amandzɛɛbɔ no rekã ɔfã biara a yenngyina ho asɛm no, ɔkãe dɛ: “Ibia ndɛ ibinom enyi renngye gyinae yi a Jehovah Adasefo si no ho; iyi tsitsir ntsi na tsetse Nazi nye Communist tumdzi ahorow no soɛree tsiaa hɔn no.” Aber mpo a nna Soviet tumdzi no rehyɛ Adasefo no do no, Adasefo no “kɔr do ara yɛɛ ɔman mba pa a nna wodzi mbra do. Wotuu hɔnho nyinara mae fi nokwardzi mu yɛɛ edwuma wɔ nhaban akɛse nye edwumayɛkuw akɛse mu, na wɔammfa ehunahuna biara ammba Communist tumdzi no do.” Amandzɛɛbɔ no dze ba ewiei dɛ, dɛmara na ndɛ so, Jehovah Adasefo hɔn gyedzi nye ndzeyɛɛ ahorow no, “mmfa ɔman biara n’eyiedzi anaa asomdwee nnto esian mu.”