E kaya o Steven: “Dua na ka noqu rarawa niu sa sega tale ni veibuku kei noqu itau. Dua na ka na noqu yalolailai. Sa bau dua dina na ka mosimosi au se qai sotava vakadua ena noqu bula.”

 O sa bau sotava tale ga qori? Ke io, ena vukei iko na ulutaga qo.

•  Ka o vakila

•  Ka o rawa ni cakava

 Erau na vakila ruarua na mosi e rua ni sa sega na veibuku.

•  Ke o tinia na veibuku, de vinaka mo nanuma na ka e tukuna o Jasmine, e kaya, “E dau vakaleqa noqu lewaeloma niu vakamosia na lomana e dua au kauaitaka, au na sega tale ni cakava.”

•  Ke o sega ni tinia nomudrau veibuku, o na rairai taura rawa na vuna era tukuna kina eso ni vaka na mate-lekaleka. E tukuna e dua goneyalewa o Janet: “E vakavuna sara ga meu lolosi, au sega ni via vakabauta, au cudru, rarawa, yalobibi, oti e dua na yabaki, au sa qai ciqoma ni keirau sa sega ni veibuku.”

 Me nanumi: Na leqa qo e rawa ni vakavuna na yalolailai kei na rarawa. E tukuna e dua na dauvola iVolatabu: “Na yalorarawa e vakaotia na igu.”​—Vosa Vakaibalebale 17:22.

•  Vosa vua na itokani matua. E tukuna na iVolatabu: “Na itokani dina e loloma ena veigauna, e tacida ena gauna ni rarawa.” (Vosa Vakaibalebale 17:17) Ena yaga sara vakalevu ke o talaucaka na lomamu vua na nomu itubutubu se dua na itokani matua.

   “Sa va vula noqu sega ni veimaliwai se meu talanoataka na ka au sotava. Ia era rawa ni vukei keda na noda itokani me seavu noda rarawa. Au sa qai vakila na vakacegu niu tukuna vei ira na noqu leqa.”​—Janet.

•  Vuli mai na ka e yaco. E tukuni ena dua tale na vosa vakaibalebale: “Mo rawata na vuku, mo rawata na yalomatua.” (Vosa Vakaibalebale 4:5) Nida sotava eso na ituvaki e rarawataki, ena rawa ni vakavulici keda qori meda dikevi keda tale, da kila tale ga na ka me caka.

   “Niu sa sega ni veibuku, e tarogi au sara e dua noqu itokani, ‘Na cava o vulica ni o sa sega ni veibuku, ena vukei iko vakacava qori ke o mani veibuku tale kei na dua?’”​—Steven.

•  Masu. E tukuna na iVolatabu: “Biuta vei Jiova na nomu icolacola bibi, ena tokoni iko o koya.” (Same 55:22) E yaga na masu ena gauna ni rarawa, me donu tale kina nomu rai.

   “Kua ni cegu na masu. E kila o Jiova na nomu rarawa, e kila vinaka tale ga na kemu ituvaki.”​—Marcia.

•  Vukea eso tale. E kaya na iVolatabu: “Oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.” (Filipai 2:4) Na levu ga ni nomu vukei ira eso tale, na donu tale ga kina nomu rai me baleta na veibuku.

   “Ni dua sa sega ni veibuku e vaka ga sa sega ni yaga na bula, e lailai tale na momosi ni yago. Ia ni toso na gauna sa na seavu yani. E taura na gauna, meu tauri au tale ga vakamalua.”​—Evelyn.