Era “Lotu vaKarisito” Dina o Ira Kece Era Kaya Nira Lotu vaKarisito?

E VICA era lotu vaKarisito? E tukuni ena ivola na Atlas of Global Christianity, ni voleka ni 2.3 na bilioni na lotu vaKarisito e veiyasa i vuravura ena 2010. Ia e tukuna tale ga na ivola ya ni o ira na lotu vaKarisito qori era lewena e sivia na 41,000 na matalotu qai dui tiko na nodra ivakavuvuli kei na lawa me baleta na itovo. Ni levu na lotu era kaya nira “lotu vaKarisito,” sa rauta mera veilecayaki se ra rarawa eso. Era rairai veinanuyaka: ‘Era lotu vaKarisito dina o ira kece era kaya nira lotu vaKarisito?’

Meda veivosakitaka mada qori nida raica e dua na kena ivakatautauvata. Ni bera ni curuvanua e dua na vulagi, ena vinakati me vakaraitaka vei ira na kena ivakalesilesi na vanua e cavutu mai kina. Me vakatakila tale ga na kena itukutuku dina ena nona rairai solia na nona pasipote. O koya tale ga e lotu vaKarisito dina me kua ni tukuna wale ga ni vakabauti Karisito, me vakadinadinataka qori ena so tale na ka e cakava. Na cava ya?

A tekivu vakayagataki na vosa “lotu vaKarisito” ni oti toka vakalailai na 44 S.K. A vola na daunitukutuku makawa ni iVolatabu o Luke: “E tekivu mai Anitioki nodra vakatokai na tisaipeli mera lotu vaKarisito.” (Cakacaka 11:26) O ira era vakatokai qori mera lotu vaKarisito era tisaipeli i Karisito. Na cava e vinakati me cakava e dua me tisaipeli i Jisu Karisito? E vakamacalataka na New International Dictionary of New Testament Theology: “Na ibalebale ni nona yaco e dua me tisaipeli i Jisu, oya me soli [koya] mai vu ni lomana . . . qai cakava qori ena nona bula taucoko.” Koya gona, na lotu vaKarisito dina e muria mai vu ni lomana na ivakavuvuli kei na ivakasala i Jisu a tauyavutaka na ivakavuvuli vaKarisito, qai cakava qori ena nona bula taucoko.

Era tiko beka eso va qori ena kedra maliwa era tukuna tiko nikua nira lotu vaKarisito? Na cava a tukuna sara ga o Jisu nira na kilai kina na nona imuri dina? Ena vinaka moni dikeva se sauma vakacava na iVolatabu na taro qori. Ena vica na ulutaga e tarava, eda na raica kina e lima na ka e tukuna o Jisu ni na vakatakilakilataki ira na nona imuri dina qai veivuke ena noda kilai ira. Ena vakamacalataki kina na sala era vakaraitaka vinaka kina na lotu vaKarisito ena imatai ni senitiuri na ivakatakilakila qori. Eda na saga tale ga meda raica o cei ena kedra maliwa na ilala levu era kaya tiko nikua nira lotu vaKarisito, era vakataki ira na lotu vaKarisito taumada.